Read Runyoro - rutooro 2Tim 2 Bible Online

2Tim 2 - Runyoro - rutooro bible

2Tim 2

¹Hati iwe, mwana wange, ba w'amaani habw'obukoonyezi bwa Kristo Yesu.

²Ebi nakugambiire omumaiso g'abakaiso baingi, obikwase abantu abeesigwa, abalisobora kwegesa n'abandi.

³Na iwe nk'omuserikale omurungi owa Kristo Yesu, gumira okubonabona kwawe.

⁴Tiharoho muserikale anyakuli ha mulimo gwe anyakwetaba omu bigambo by'abatali barwani, habwokuba naagenderra kusiimwa ayamukomere.

⁵Omuzaani w'empaka taheebwa kondo, rundi buli naahondera ebiragiro by'okuzaana.

⁶Omulimi omwekambi nuwe asemerra kubanza kuganura ebyokulya ebi ayereze.

⁷Weetegereze ebi ndukugamba, habwokuba MUKAMA naija kukukoonyera kukenga byona.

⁸Ijuka Yesu Kristo ayahumbuukire omu bafu kandi mwijukuru wa Daudi, nkooku kyarangirwe omu Makuru Amarungi aga nabatebiize.

⁹Amakuru Amarungi ago nugo ndukubonabonera, mboherwe omu njegere nk'omuntu enkozi y'ebibi. Baitu ekigambo kya Ruhanga tikibohwa.

¹⁰Habweki ngumiisiriza byona habw'abakomerwemu, nukwo nabo batunge okujunwa n'ekitiinisa eky'ebiro n'ebiro omu Kristo Yesu.

¹¹Ekigambo kinu ky'amazima ekirukugamba kiti: Obu turaaba twafiire hamu nawe, buli tulyomeera hamu nawe;

¹²obu turaaba nitugumiisiriza hamu nawe, buli tulirema hamu nawe; obu turaaba nitumwehooga, nawe alitwehooga.

¹³Noobu turaaba tutali beesigwa, baitu Uwe aikara ali mwesigwa, habwokuba tasobora kwehakaniza.

¹⁴Ebi oikalege noobibaijukya, kandi obateererre omumaiso ga MUKAMA: beerinde empaka ezitaleeta karungi, baitu zihwerekereza abazihurra.

¹⁵Wekambe okweyoleka oli muntu kwo arukusiimwa Ruhanga, omukozi atarukukwatwa nsoni, arukwegesa kurungi ekigambo ky'amazima.

¹⁶Werinde embazo ezitarumu kutiina Ruhanga, habwokuba nizongera kuhabisa abantu,

¹⁷kandi ebigambo byabo bigenda nibirya nk'ekookoro. Omuli abo nuho hali Himenaayo na Fileeto,

¹⁸abaahabire amazima nibagamba ngu, okuhuumbuka kukahingura ira. Nukwo bajuumika okwikiriza okw'abantu abamu.

¹⁹Baitu omusingi gwa Ruhanga ogugumire gwikaraho, guroho emanyikirizo erukugamba eti: “MUKAMA, abe naabamanya”, kandi eti: “Weena anyakwatura ibara lya MUKAMA, aruge omu bubi.”

²⁰Omunju enkooto tihabamu bikwato ebya zaabbu n'efeeza byonka, baitu habamu ebibaizirwe n'ebibumbirwe. Ebimu biba by'emirimo ey'ekitiinisa, ebindi by'emirimo etali y'ekitiinisa.

²¹Omuntu kakuba ayeihaho byona ebitali birungi; obu, alifooka kikwato ky'omulimo gw'ekitiinisa, kintu ekyeziibwe kandi ekirukugasira nyineeka, kiteekaniziibwe okukora omulimo gwona omurungi.

²²Habweki oyetantale okwegomba kubi okw'obusigazi, oyemarre ha buhikiriire, ha kwikiriza, ha kugonza, na ha businge, nookwataniza n'abo abeeta ibara lya MUKAMA, baina omutima ogurukwera.

²³Wecwereho kimu empaka ez'obudoma ezitaina makuru; na iwe omanyire nkooku izaara enkungani.

²⁴Omuheereza wa MUKAMA tasemerra kuba muntu w'enkungani, baitu aba munyambabazi ha buli muntu weena, mwegesa murungi kandi anyakugumiisiriza,

²⁵omuntu arukuhana mpora abarukumuteeza empaka. Rundi Ruhanga asobora kubaha kwegarukamu kandi bakamanya amazima,

²⁶nukwo basobole kutabuka emitego Sitaani ei yabakwatiiremu, bakole ebi Ruhanga yagondeze.