Read Runyoro - rutooro 2Tim 4 Bible Online

2Tim 4 - Runyoro - rutooro bible

2Tim 4

¹Ninkuteererra omumaiso ga Ruhanga n'aga Kristo Yesu ow'alicwera omusango aboomiire n'abafiire, ninkurahiza okugaruka kwe n'obukama bwe:

²Rangirra ekigambo, kyekambire omu busumi obusemeriire n'obutasemeriire. Hwitura, hana kandi teererra; otaterebuka omu kugumiisiriza n'omu kwegesa.

³Halibaho akasumi abantu obu balyanga kuhurra enyegesa ey'amazima, habw'okugira amatu agarukubanulirra, balyesorooleza abeegesa abarukubeegesa ebi barukwenda.

⁴Balyanga kuhurra amazima, baburanganire omu nganikyo z'okwehangahanga.

⁵Baitu iwe otalitengeeta, gumiisiriza emihito, kora omulimo ogw'omugambizi ow'Amakuru Amarungi, ohikirize kurungi obuheereza bwawe.

⁶Habwokuba nyowe ndi haihi n'okutambwa; obwire bwange obw'okuruga omunsi buhikire.

⁷Nyowe nkarwana masaija, empaka z'okwiruka nzimazire, okwikiriza nkugumize.

⁸Okuruga hati nsigaize okutunga ekondo ey'obuhikiriire eyanteekaniriziibwe--MUKAMA, omucwi w'emisango omwinganiza, ei alimpa ha Kiro kiri. Taligiha nyowe nyenka, baitu na boona abaataire omutima ha kugaruka kwe.

⁹Kora kyona eki orukusobora ompikeho bwango.

¹⁰Habwokuba Deema anyakugonza ensi enu enyakuroho, akandugaho yagenda Teesalonika. Kereseke akagenda Galatiya, Tito yagenda Dalamatiya.

¹¹Luka wenka nuwe nsigaire nawe. Yeta Maliko, oije nawe; habwokuba nangasira muno omu gw'obuheereza.

¹²Tikiko nkamutuma Efeeso.

¹³Obu oliba noija, oleete omwegereko ogu nasigire Turoha mba Karipo. Ondeetere n'ebitabu, baitu okukira muno eby'emizingo y'empu.

¹⁴Alekizanda, omuheesi w'emiringa, akankora kubi muno; MUKAMA alimusasura habw'ebi yakozire.

¹⁵Na iwe omwerinde, habwokuba enyegesa yaitu akagihakaniriza kimu.

¹⁶Omu kwetonganirra kwange okw'okubanza, busaho n'omu ayansagikire; boona bakandugaho. Hati ninsaba baleke kukijunaanwa!

¹⁷Baitu MUKAMA akanyemerraho, yampa amaani ag'okurangirirra kimu ekigambo kye, nukwo Abanyamahanga boona basobole kukihurra. Na nyowe nukwo natabukire nti akanwa k'entale.

¹⁸MUKAMA alintabura akabi koona kandi alinjuna, antwale omu bukama bwe obw'omwiguru. Ekitiinisa kibe hali Uwe, ebiro n'ebiro. Amiina.

¹⁹Ondamukize Pirisika n'Akwila n'ab'omuka ya Onesiifooro.

²⁰Erasito akasigara Korinto, Turofimo nkamusiga Mileeto arwaire.

²¹Lengaho oku orukusobora kwija obusumi bw'obutiti butakahikire. Yubulo, Pudensi, Liino, Klaudiya n'ab'oruganda boona bakuramukize.

²²MUKAMA aikale n'omwoyo gwawe. Embabazi za Ruhanga ziikale na inywe.