Read Runyoro - rutooro Tit 1 Bible Online

Tit 1 - Runyoro - rutooro bible

Tit 1

¹Nyowe Paulo, omuheereza wa Ruhanga kandi omukwenda wa Yesu Kristo, ayatumirwe okugumya okwikiriza kw'abantu abaakomerwe Ruhanga n'okubamanyisa amazima g'ediini,

²amazima agasobora kubaleetera obwomeezi obutahwaho, Ruhanga atabiiha, obu yanihiize okuruga kara,

³kandi omukasumi akahikire obu yayolekere omu kigambo kye, Ruhanga anyakutujuna, eki yankwasize kurangirra;

⁴ninkuhandiikira iwe Tito, omwana wange mali omu kwikiriza itwena oku tukuraatira. Ninkugondeza embabazi n'obusinge ebiruga hali Ruhanga Isiitwe na Kristo Yesu Omujuni waitu.

⁵Eki nakusigiire Kureete, nkenda ohikirize byona ebitarakozirwe, n'okukoma abakuru omu buli rubuga, nkooku nakuragiire,

⁶Okome omuntu ataina eki barukumuhyemera, omusaija ayaswire omukazi omu, kandi aina abaana abarukwikiriza. Muntu atarukurangwaho ngeso mbi kandi atali ntahurra.

⁷Omuroleerezi nkooku ali omukeeto wa Ruhanga, asemeriire kuba ataina eki barukumuhyemera; tasemeriire kwemanyaho muno rundi kubiihirwa bwango. Atali mutamiizi, omunyakiniga, rundi arukururukira ebintu;

⁸baitu abe w'amakune, engonzi y'oburungi, arukwerema wenka, mwinganiza, ata omutima ha bya Ruhanga, kandi muntu arukwerinda.

⁹Asemeriire kugumira ha bigambo eby'amazima nkooku yabyegesiibwe, nukwo asobole kusoborra abantu omu nyegesa enungi kandi asingule abarukugihakaniza.

¹⁰Haroho abantu baingi entahurra, abarukubaza ebitarumu, engobya, okukira muno ab'omu kitebe ky'abasazirwe.

¹¹Abo basemeriire kuculeezibwa, habwokuba nibajuumika amaka maingi, nibeegesa ebi batasemeriire kwegesa, nukwo beetungire sente.

¹²Omu hali bo, omurangi waabu nyakabara, akagira ati: “Abakureete obutoosa babiiha ebisuba, nyamaiswa mbi, b'omukoijo kandi bagara.”

¹³Kandi binu ebi yagambire by'amazima. Nahabweki Abakureete obacoomere n'amaani, nukwo bafooke bagumu omu kwikiriza.

¹⁴Baleke kuta omutima ha nganikyo ez'okwehangahanga ez'Abayudaaya, rundi ha nyegesa ez'abantu abarukwanga amazima.

¹⁵Hali abasemiire, ebintu byona bisemera; baitu hali abasiisikaire n'abatarukwikiriza, busaho ekisemera; habwokuba emitima yabu yonyini n'ebiteekerezo byabu bikasiisikara.

¹⁶Bagamba ngu, bamanyire Ruhanga, baitu omu bikorwa byabu bamwanga. Bali bantu abanugwa, ntahurra, abatasobora kukora akantu koona akarungi.