Read Runyoro - rutooro Tit 2 Bible Online

Tit 2 - Runyoro - rutooro bible

Tit 2

¹Baitu iwe Tito, oyegese ebirukuhikaana n'enyegesa ey'amazima.

²Teererra abagurusi babe beegendereza, beekambi, b'amagezi, bagumu omu kwikiriza, omu kugonza n'omu kugumiisiriza.

³Abakaikuru, nabo bateererre nkooku otereriire abagurusi. Babe n'engeso ezisemeriire abaikiriza, baleke kuhangirra, abantu kulemwa etamiiro; baitu beegese ebirungi,

⁴nukwo batendeke abakazi abato okugonza baibabo n'abaana baabu.

⁵Babeegese kuba abarukwetegereza, abatarukusiihana, babe bakazi abanyakutegeka amaka gaabu, banyambabazi kandi abarukworobera baibabo, nukwo ekigambo kya Ruhanga kireke kugaywa.

⁶Abasigazi nabo obeekambise, beege kwetanga.

⁷Omu byona ebi okora, weyoleke oli kyokurorraho, eky'ebikorwa ebirungi, kandi omu nyegesa yaawe weyoleke oli w'amazima kandi w'amaani.

⁸Oyegese ebigambo ebihikire kandi ebitasobora kugaywa, nukwo arukukuhakaniza akwatwe ensoni, aburwe ekibi eki arukutugambaho.

⁹Gambira abairu bahurre bakama baabu, kandi baboorobere omu byona, batarukubateeza mpaka.

¹⁰Baleke kwekomakoma ebintu, baitu boolekere kimu obwesigwa obw'amazima, nukwo omu byona basobole kuhaisa ekitiinisa enyegesa ya Ruhanga Omujuni waitu.

¹¹Habwokuba embabazi za Ruhanga zizookere omu nsi kujuna abantu boona,

¹²zaatwegesa okwanga obukafiiri n'okuteegomba eby'ensi, twikale tuli beerinzi, b'amananu, nitutiina Ruhanga omu nsi munu,

¹³tutegeriize okutunga eki twanihizibwe. Nukwo okuzooka okw'ekitiinisa okwa Ruhanga waitu Rutakirwa kandi n'Omujuni waitu Yesu Kristo,

¹⁴ayayehaireyo habwaitu okutucungura, naatwiha omu bubi bwona kandi naayeyereza abantu be, nubo abo abeekambira okukora ebirungi.

¹⁵Ebintu ebi, obirangirre. Kandi oteererre abantu baawe noohana n'obusobozi bwona. Otaikiriza muntu n'omu kukugaya.