Read Runyoro - rutooro Tit 3 Bible Online

Tit 3 - Runyoro - rutooro bible

Tit 3

¹Abantu baawe obaijukye okworobera abalemi n'ab'obusobozi. Obeegese okubahurra beeteekanize okukora omulimo gwona omurungi.

²Baleke kubazaaho kubi muntu weena. Beerinde enkungani, babe baculeezi, kandi booleke abantu boona amakune agahikire.

³Habwokuba na itwe kara tukaba tuli basema, ntahurra, bantu abahabire, abarukulemwa okwegomba okubi n'okwegonza kwa buli mulingo. Twaikaraga omu itima n'ihali, nitunobwa abantu kandi nitunobangana.

⁴Baitu embabazi za Ruhanga Omujuni waitu n'engonzi ze ha bantu obu zaazookere,

⁵yatujuna. Hatali habw'oburungi bw'ebi twakozire, baitu habw'embabazi ze. Akatwogya tuzaarwe obwa kabiri kandi tufooke bahyaka omu Mwoyo Ahikiriire.

⁶Mwoyo ogu Ruhanga akamutuseesiraho atarukubalirra, naamurabya omu Yesu Kristo Omujuni waitu,

⁷nukwo embabazi ze ituhikirize, tufooke bagwetwa abarukunihira kutunga obwomeezi obutahwaho.

⁸Ebigambo ebi by'amazima. Ebigambo ebi, ninyenda obiteho amaani, nukwo abo abaikiriize Ruhanga bateho omutima okukora ebikorwa ebirungi. Ebigambo ebi birungi kandi nibigasira abantu.

⁹Baitu oyetantale empaka ez'obudoma n'okurondereza eby'obuzaale. Oyetantale okukungana n'okuhakaniza ensoborra z'Ebiragiro, habwokuba ebi tibiri by'omugaso kandi tibirumu nsa.

¹⁰Omuntu arukkuteeza empaka, obu omara kumuhabura omurundi gumu rundi ebiri, omuleke;

¹¹noomanya omuntu arukukora ati nkooku amazire kuhaba kandi asiisire. Nawe wenka naayesingisa omusango.

¹²Obu ndikutumira Aritemisi rundi Tikiko, okole kyona eki orukusobora okumpikaho bwango, onsange Nikopoli, habwokuba oku nuho ncwiremu kumara ebiro by'obutiti.

¹³Okole kyona eki orukusobora kuboherra Zeena Looya hamu n'Apolo omu rugendo rwabu. Ocwe goona batunge ebi barukwetaaga.

¹⁴Abantu baitu leka beege okukora ebikorwa ebirungi, nukwo batungise bagenzi baabu ebi barukwetaaga, baleke kwikara kwonka bataina mugaso.

¹⁵Boona aba ndi nabo nibakuramukya. Na iwe oturamukize boona abanyakutugonza, abaturukuteerana nabo omu kwikiriza. Embabazi za Ruhanga zikale na inywe inywena.