Read Runyoro - rutooro Fil 1 Bible Online

Fil 1 - Runyoro - rutooro bible

Fil 1

¹Nyowe Paulo, omunyankomo habwa Kristo Yesu, na Timoteho mugenzi waitu. Nitukuhandiikira iwe Fileemoni omugonzibwa kandi omukozi mugenzi waitu,

²na Afiya munyaanya-itwe, na Arikipo omuserikale mugenzi waitu, n'ekitebe ky'abaikiriza abeesorooleza omu nju yaawe.

³Nitubagondeza emigisa n'obusinge ebiruga hali Ruhanga Isiitwe na hali MUKAMA Yesu Kristo.

⁴Obutoosa obu nkwijuka omu kusaba kwange, nsiima Ruhanga wange.

⁵Habwokuba mpurra ha kugonza n'okwikiriza ebi orukwoleka MUKAMA Yesu na bantu be boona.

⁶Kandi ninsaba ngu, okukwataniza n'abandi omu kwikiriza kunu kwongere kukukengesa ebirungi byona ebi twatungire omu Kristo.

⁷Mugenzi wange, engonzi zaawe zindetiire omuhimbo kandi zimpuumwize, habwokuba oruhurwire emitima y'abantu ba Ruhanga.

⁸Nukwo nu, noobu ndaaba ntarukutiina kukuragira omu Kristo okukora ekirukwetagwa,

⁹baitu habw'engonzi nyina eki ndukukusaba, nyowe Paulo omukwenda kandi omu kasumi kanu omunyankomo habwa Kristo Yesu.

¹⁰Ninkwesengereza habw'Oneesimo, ou nfoire mwana wange ndi omu nkomo. [

¹¹Kara akaba atarukukugasira, baitu hati omu mazima naakugasira muno, kandi na nyowe naangasira.]

¹²Ngugwo mmukugaruliire nk'arukukugarurra omutima gwange gwonyini.

¹³Naakugondeze kwikara nawe, ampeereze omu kiikaro kyawe, nkyali omu nkomo habw'Amakuru Amarungi.

¹⁴Baitu mmaliriire kutakora kintu na kimu otaikiriize, nukwo oburungi bwawe buleke kuba bw'akagemo, baitu bube bw'okwegondeza wenka.

¹⁵Rundi nikyo yakurugiireho kumara akaanya kake, nukwo osobole kugarukanganira kimu nawe,

¹⁶atakyali mwiru, baitu naakiraho. Afookere ow'oruganda omugonzibwa, okukira muno hali nyowe, kiraasura ki hali iwe, arukwikara nawe omu mubiri n'omu MUKAMA.

¹⁷Obu oraaba nonyeta mutaahi waawe, omujwahukirre nkooku waakujwahukiriire nyowe.

¹⁸Obu araaba yakusobiize rundi aina ibanja lyawe lyona, olitonge nyowe.

¹⁹Nyowe Paulo, kinu ninyija kukihandiika nyenka n'omukono gwange nti: Ibanja eri ndirisasura--tindukwenda n'okukwijukya nkooku onyinaho ibanja, kandi ibanja eri niiwe wonyini.

²⁰Nukwo mugenzi wange, ninyenda onkoonyere omu MUKAMA. Ohuumuze omutima gwange nk'omunyaruganda omu Kristo.

²¹Habw'okwesiga nkooku oli muhulizi, nkuhandiikire nimmanya nti: Oraakora ebindukukugamba, n'okubikizaaho obikizeeho.

²²Kandi ekindi, onteekanirize h'okuraara. Habw'okusaba kwanyu ninihira kulekerwa, mbagarukire.

²³Epafura, omunyankomo mutaahi wange omu Kristo Yesu, naakuramukya.

²⁴Mariko, Aristariko, Deema, na Luka abakozi bagenzi bange, nabo nibakuramukya.

²⁵Embabazi za MUKAMA Yesu Kristo zikale na iwe.