Read Runyoro - rutooro Baheb 10 Bible Online

Baheb 10 - Runyoro - rutooro bible

Baheb 10

¹Ebiragiro bya Musa tibirukutwoleka ebirungi byonyini ebirukugenda kwija, baitu kisisani kyabyo. Ebiragiro eby'emigenzo ey'okuhonga ebyonzira buli mwaka, tibisobora kweza abo abanyakuramya.

²Ebiragiro obu biraaba byasoboire kubeeza, ebyonzira ebi tibyakulekiirwe kutambwa? Abanyakuramya obu baraaba baayeziibwe omurundi gumu baamara, tibaakwongiire kwemanyaho ebibi.

³Baitu okuhonga ebyonzira ebi buli mwaka kuba nikwijukya abantu ebibi byabo.

⁴Habwokuba esagama ey'enimi n'ey'embuzi tesobora kwihaho bibi.

⁵Kristo obu yaizire omunsi, nikyo yagambiire ati: “Ebyonzira n'ebihongwa tobyenda, baitu okanteekaniriza omubiri,

⁶Ebihongwa ebyokeze kandi ebiheebwayo habw'ebibi tobyetaaga.

⁷Na nyowe nukwo kugira nti: ‘Ai Ruhanga, dara nyowe, nyizire kukora ebi orukwenda’, nkooku kyampandiikirweho omu kitabu ky'Ebiragiro.”

⁸Aho nambere yagambiire ati: “Toyenda kandi toyetaaga byonzira n'ebihongwa, noobu byakubaire ebihongwa ebyokeze kandi ebiheebwayo habw'ebibi” (ebi nibyo bihongwa ebisangwa omu Biragiro),

⁹akongera yagamba ati: “Dara nyowe, nyizire kukora ebi orukwenda.” Kristo nukwo yadibize ati ebyonzira eby'okubanza, agumye ekyonzira ekye,

¹⁰Kandi Kristo habw'okukora Ruhanga ebi yayenzire, itwe tukeezibwa omubiri gwe ogwahongerwe omurundi gumu kyahwa.

¹¹Buli nyakatagara ayemerra buli kiro naakora omulimo gwe, aikara naahonga ebyonzira ebi ebitasobora kwihaho bibi.

¹²Baitu Kristo obu yamazire kuhonga ekyonzira kimu eky'ebiro byona habw'ebibi, yaikarra ha mukono gw'obulyo ogwa Ruhanga.

¹³Okuruga obu, aikara naategereza okuhika abanyanzigwa be Ruhanga obu alibafoora akatebe k'ebigere bye.

¹⁴Omu kuhonga ekyonzira ekimu eki, abo aba ayeza akabahikiriza ebiro byona.

¹⁵Mwoyo Ahikiriire nawe naatunanura. Okubanza akagira ati:

¹⁶“MUKAMA akagamba ati: Akasumi ako obu kalihwaho, enu niyo ndagaano ei ndiragaana nabo: Ndita Ebiragiro byange omu mitima yabo, kandi mbihandiike omu biteekerezo byabo.”

¹⁷Kandi yayongera ati: “Tindigarukira kwijuka ebibi byabo n'ensobi zabo.”

¹⁸Ebibi obu bimara okuganyirwa, haba hatakyaroho kubihongerra.

¹⁹Habweki ab'oruganda, nitunihira okutaaha Ekiikaro Ekirukwera habw'esagama ya Yesu,

²⁰nituraba omu muhanda omuhyaka ogu yatutemiire kandi oguraba omu nyigamo eyomiire, nugwo mubiri gwa Kristo.

²¹Itwe abaina nyakatagara omukuru arukurolerra Enju yoona ya Ruhanga,

²²katwirre Ruhanga haihi twina omutima ogw'amazima n'okwikiriza okugumire. Emitima yaitu emazire kusemezibwa, erugire omu biteekerezo ebibi, kandi emibiri yaitu eyogiibwe n'amaizi amarungi,

²³katugumire ha kunihira oku twinakwo tutarukutengeta, habwokuba Ruhanga ayaraganiize, mwesigwa.

²⁴Katurole nkooku tusobora kwekambisangana omu ngonzi n'omu bikorwa ebirungi,

²⁵tutarukuba bagara omu kwesorooza kusaba, abamu nkooku bakora; baitu twimukyangane, okukira muno obu murukurora Ekiro nikirra haihi.

²⁶Kakuba twongera kusiisa, kunu tumazire kumanya amazima, haba hatakyaroho kyonzira eky'okwihaho ebibi;

²⁷baitu haba haroho kulindirra n'obutiini omusango ogulicwibwa n'ekibabu ky'omurro ogulimarraho kimu abeemi.

²⁸Omuntu anyakucwa Ebiragiro bya Musa obu arumurizibwa bakaiso babiri rundi basatu, aitwa hatali kuganyirwa.

²⁹Nimuteekereza omuntu ayagayire Omwana wa Ruhanga, yafurungura esagama ey'endagaano eyamwereze, yabiihiza Mwoyo ow'embabazi, ogu alitunga ekifubiro ekirukwinganaha?

³⁰Ningira nitumanya ayagambire ati: “Okuhoora enzigu kwange, ninyowe ndihoora.”

³¹Kintu kya mahano okugwa omu mikono ya Ruhanga omwomeezi.

³²Mwijuke ebiro ebyahingwire obu mwamazire kumulikirwa, mukabanza kurwana n'amaani nimugumiisiriza emihito.

³³Obundi n'obundi mukeemerezibwa omu maiso g'abantu, babajume kandi babasaalize. Obundi mwabalirwaga omuli abo abaajumirwe bati.

³⁴Habwokuba mwagirraga abanyankomo embabazi, mwaikirizaaga n'omutima gumu kunyagwa ebintu byanyu, ningira mukaba nimumanya nkooku mwina itungo erirukukiraho oburungi kandi eritahwaho.

³⁵Nahabweki muleke kusiisa obwesige bwanyu obulibarugiramu empeera enkooto.

³⁶Nimwetaaga kugumiisiriza, nukwo mukole Ruhanga ebi agonza kandi mutunge ebi yaraganiize.

³⁷Kikahandiikwa kiti: “Hasigaire akasumi kake, ogu arukwija aije, kandi tarukwija kukerererwa;

³⁸omuheereza wange omwesigwa aligumira ha kwikiriza, baitu obu aligaruukirra, omwoyo gwange tigulimusiima.”

³⁹Itwe tituli omuli abo abagaruukirra bakahwerekerra, baitu tuli omuli abo abaina okwikiriza, bakajuna emyoyo yabo.