Read Runyoro - rutooro Baheb 12 Bible Online

Baheb 12 - Runyoro - rutooro bible

Baheb 12

¹Habweki nu, nkooku twehinguliriziibwe ekitibe ky'abakaiso abo boona, na itwe tweiheho ekintu kyona ekirukututanga, n'ekibi kyona ekirukutuboha; kandi twiruke n'okugumiisiriza kalitango enyakutairweho omu maiso gaitu.

²Amaiso tugahangire Yesu omutembuzi kandi omuhikiriza ow'okwikiriza kwaitu. Habw'okusemererwa oku akaba naarora omumaiso yagumiisiriza omusaraba, yagaya ensoni zaagwo, kandi hati asingire ha mukono ogw'obulyo ogw'ekitebe ky'obukama bwa Ruhanga.

³Muteebwa ogu ayagumiisiriize enobi erukwinganaho abasiisi ei baamugiriire, nukwo muleke kujwaha n'okugwa ensazi.

⁴Omu kurwanisa ebibi, timukabaire kugumisiiriza kuhika ha kuseesa esagama yanyu.

⁵Kandi obu, mweberwe Ruhanga eki arukubahabura nk'abaana be naagamba ati: “Mwana wange, otagaya okuhana kwa MUKAMA, kandi otaterebuka obu akufubira.

⁶Habwokuba MUKAMA ou agonza, nuwe ahana; kandi ou ayeta mwana we, nuwe ateera.”

⁷Okufubirwa kurugwamu okugumiisiriza. Ruhanga abarolerra nk'abaana; kandi mwana ki atafubirwa ise?

⁸Obu muraaba mutarukufubirwa boona nkooku bafubirwa, buli muli bitwekano, timuli baana kwo.

⁹Kandi na itwe tukaba twina baisiitwe ab'omunsi abaatufubiraga, twabatamuga ekitiinisa. Titwakukizire muno kuhurra Omuzaire w'emyoyo yaitu, nukwo tukoomera?

¹⁰Habwokuba baisiitwe ab'omunsi baatufubiraga okumara akasumi kake nkooku baagonzaaga; baitu Ruhanga atufubira nukwo tube barungi kandi tubagane ha buhikiriire bwe.

¹¹Omu kasumi kanu, okufubirwa kwona nikutusaaliza kwonka, titurukukusiima; baitu abaakuliire omu kufubirwa kunu, kulibarugiramu ebikorwa eby'obuhikiriire n'obusinge.

¹²Habweki mugumye emikono yanyu erukuteba n'amaju ganyu amaceke.

¹³Mutemere ebigere byanyu emihanda eterekeriire; nukwo omuli inywe arukucumbagira aleke kuhendekeramu, baitu akire.

¹⁴Mwekambe okuba n'obusinge n'abantu boona, kandi mwitanire obuhikiriire, habwokuba nambere butali, tiharoho alirora Ruhanga.

¹⁵Mwerinde, hatabaho n'omu arukusubwa obukoonyezi bwa Ruhanga. Hataikara kumera omuli inywe “ekimera ekirukusarra” kikaleeta obutwa oburukurwaza baingi.

¹⁶Hatabaho omusiihani rundi arukugaya ebya Ruhanga, nk'Esau ayatunzire obugwetwa bwe habw'ekiihuro ekimu.

¹⁷Baitu hanyuma obu yagondeze okugarulirwa omugisa, akangirirwa nkooku murukumanya. Noobu araaba yagusabire narra, baitu atatunge kasumi ak'okwegarukamu.

¹⁸Inywe mwijuke nkooku mutairiire haihi orusozi oruroho omurro ogurukwaka, omwirima, ekibunda, ekiyaga,

¹⁹iraka ery'engwara, kandi n'iraka eryagambire ebigambo ebyakangire abaabihuliire bayesengereza ngu, haleke kubaho ebigambo ebindi ebiribagambirwa.

²⁰Habwokuba batasobole kwemera ekiragiro ekyatairweho, ekirukugamba kiti: “Buli kihangwa kyona, noobu kyakubaire ekisoro, kakuba nikirra haihi n'orusozi, kiraaterwa amabaale.”

²¹Mazimakwo ebi baarozire bikaba nibitiinisa muno, nukwo Musa kugamba ati: “Nintukumira habw'obutiini.”

²²Baitu hati inywe muhikire ha rusozi Siyoni, na ha rubuga rwa Ruhanga Atafa, Yerusaalemu orw'omwiguru orunyakurumo bamalaika abatarukubarwa abeesoroliize ha bugenyi.

²³Mwizire ha rusorrokano orw'emizigaijo eyahandiikirwe omwiguru, muhikire hali omucwi w'emisango Ruhanga owa boona, na hali emyoyo y'abarungi abahikiriziibwe.

²⁴Muhikire hali Yesu omuteeraniza wa Ruhanga n'abantu omu ndagaano empyaka, na ha sagama ye eyaseesekere erukwamirra kukira esagama y'Abeli.

²⁵Mwegendereze, muleke kwanga kuhuliriza Ruhanga arukubaza. Abaayangire kuhuliriza ogu ayabahabwire ali ha rusozi, obu baliba bataratabukire, kiraasura ki itwe kakuba twanga kuhuliriza anyakuhabura naayema omu iguru?

²⁶Obu nubwo iraka lye lyatengeseze ensi; baitu hati araganiize ati: “Ninyija kugaruka kutengesa ensi; teri nsi yonka, baitu n'iguru.”

²⁷Obu yagambire ati: “Ninyija kugaruka kutengesa ensi”, akaba naamanyisa ebihangwa ebyatengesiibwe nkooku birihwaho, nukwo ebitasobora kutengesibwa biikaleho.

²⁸Nahabweki, tusiime Ruhanga habw'okutuha obukama obutasobora kutengesibwa, kandi tumuramye nkooku kimusemeriire nitumuha ekitiinisa kandi nitumutiina,

²⁹habwokuba Ruhanga waitu murro kahwerekereza.