Read Runyoro - rutooro Baheb 2 Bible Online

Baheb 2 - Runyoro - rutooro bible

Baheb 2

¹Nikyo tusemeriire kuta muno omutima hali ebi twahuliire, tutaikara kubirugaho.

²Baitu Ebiragiro ebyagambirwe bamalaika, obu biriba byabaire by'amaani gati, nukwo weena atarukubihondera rundi atarukubihurra akaheebwa ekifubiro ekimusemeriire,

³itwe tulitabuka tuta obu tulinagaija okujunwa okurukwingana aho? MUKAMA nuwe yabandize kukuturangirra, hanyuma abo abaamuhuliire nabo bakatumanyisa okujunwa oku.

⁴Ruhanga nawe yakugumyaga n'oburorwaho, ebihuniriza, n'ebyamahano ebitali bimu, hamu n'ebisembo bya Mwoyo Ahikiriire ebi agaba nkooku agonza.

⁵Bamalaika tibali nubo Ruhanga yahaire obusobozi bw'okulema ensi erukugenda kwija, ei turukubazaaho.

⁶Haroho nambere kyahandiikirwe kiti: “Omuntu kintu ki, Iwe kumwijuka, rundi omwana w'omuntu, Iwe kumutaho omutima?

⁷Okamumaza akaanya, atakaingaine bamalaika; wagaruka wamujweka ekondo y'ekitiinisa n'ey'okutiinwa,

⁸wamuha okulema ebintu byona; byona okabita omu mikono ye.” Ruhanga obu yamuhaire okulema ebintu byona, taina na kimu eki ataramuhaire okulema. Baitu kuhika hati, titukarozire ebintu byona nibimuhurra.

⁹Kwihaho Yesu ogu ayamazire akaanya atakaingaine bamalaika, hati nitumurora ajwaire ekondo ey'ekitiinisa kandi ey'okutiinwa eyamurugiire omu kufa oku yarabiremu; nukwo, habw'embabazi za Ruhanga, akaba naasobora kufa habw'abantu boona.

¹⁰Ruhanga anyakuhanga kandi anyakwikazaaho ebintu byona, obu yagondeze kutaahya abantu baingi omu kitiinisa kye, akaba asemeriire kubanza kuhikiriza ogu ayabaleetiire okujunwa naamurabya omu busaalizi.

¹¹Habwokuba ogu anyakweza, aina obuzaale bumu n'abo abanyakwezibwa. Nikyo atakwatirwa nsoni kubeeta bagenzi be,

¹²naagamba ati: “Ebikubyo byawe ndibirangirra bagenzi bange, ndikunyumiza omu kitebe hagati.”

¹³Na handi ati: “Ruhanga ndamwesiga.” Kandi ati: “Dora ndi hanu, hamu n'abantu Ruhanga aba yampaire.”

¹⁴Nahabweki abaana ab'oruganda rumu nkooku basisaniza omubiri n'esagama, na Yesu nukwo yayefoire muntu nka bo, nukwo habw'okufa kwe asobole kuhwerekereza ogu anyakulema orufu, nuwe Sitaani,

¹⁵n'okujuna abo boona abaamazire obwomeezi bwabo omu bwiru bw'okutiina orufu.

¹⁶Mazimakwo bamalaika tibali nubo yaizire kujuna, baitu akaija kujuna baijukuru ba Abburahamu.

¹⁷Habweki kikamuhikirra kusisana bagenzi be omu buli kintu, nukwo asobole kufooka nyakatagara omukuru, ow'embabazi kandi omwesigwa omu kuheereza Ruhanga, aleherre abantu habw'ebibi byabo.

¹⁸Uwe wenyini nkooku yabonabonesiibwe kandi yayohebwa, nikyo arukusoborra kukoonyera abo abarukwohebwa.