Read Runyoro - rutooro Baheb 3 Bible Online

Baheb 3 - Runyoro - rutooro bible

Baheb 3

¹Nahabweki ab'oruganda abarukwera, inywe abaayesirwe kubagana obwomeezi obw'omwiguru, mute ebiteekerezo byanyu hali Yesu omukwenda wa Ruhanga kandi nyakatagara omukuru ow'enyikiriza yaitu.

²Akaba ali mwesigwa hali Ogu ayamutaireho, nka Musa nawe oku yabaire mwesigwa omunju ya Ruhanga yoona.

³Baitu Yesu akaba asemeriire kuheebwa ekitiinisa kingi okukira Musa, omwombeki w'enju nkooku aheebwa akitiinisa okukira enju enyakwombekwa. [

⁴Habwokuba buli nju yoona egira anyakugyombeka, baitu omwombeki w'ebintu byona nuwe Ruhanga.]

⁵Musa akaba ali mwesigwa omu nju ya Ruhanga nk'omuheereza kandi kaiso w'okugumya ebintu Ruhanga akaba ali w'okusoborra hanyuma;

⁶baitu Kristo akaba ali mwesigwa omunju ya Ruhanga nk'omutabani. Na itwe tuli nju ya Ruhanga obu turaaba nitugumiza kimu obwesige bwaitu kandi nitwenyumiza habw'ebi tunihira kutunga.

⁷Nikyo Mwoyo Ahikiriire yagambiire ati: “Kiro kinu obu murahurra iraka lye,

⁸mutagumanganiza emitima yanyu nk'abaanyemiire omwirungu ha kiro kyabo eky'okulengesibwa,

⁹nambere baisenkuru inywe baanjwahisize, kunu bakaba bamazire emyaka makumi ana nibarora ebi ndukukora.

¹⁰Nikyo nabiihiriirwe ab'obusinge bunu, nagamba nti: ‘Obutoosa bahaba omu biteekerezo byabo; kandi tibamanyire mihanda yange’

¹¹Nikyo narahiriire nyina ekiniga nti: ‘Tibali b'okutaaha omu buhuumuro bwange.’ ”

¹²Bagenzi bange mwegendereze, tihaikara kubaho omu omuli inywe arukugira omutima mubi, ogutarukwikiriza, ogurukutwaliriza okuruga hali Ruhanga omwomeezi.

¹³Baitu muhanangane buli kasumi. Obu muba mukyaina “akasumi”, haleke kubaho n'omu omuli inywe agumanganizibwa obugobya bw'ekibi.

¹⁴Kakuba tugumiza kimu obwesige bwaitu obwabandize, tukabuhikya ha mpero, nitwija kubagana ha birungi bya Kristo.

¹⁵Nikyo kyahandiikiirwe kiti: “Kiro kinu obu murahurra iraka lye, mutagumanganiza emitima yanyu nk'abaanyemiire.”

¹⁶Nibaha abo abaahuliire, bakagaruka baayema? Tinubo abo boona abaarugire Misiri beebembiirwe Musa?

¹⁷Kandi nibaha aba yabiihiriirwe okumara emyaka makumi ana? Tinubo abo abasiisire, kandi emitumbi yabo yagaramirana omwirungi?

¹⁸Nibaha aba yarahiriire ngu, tibali b'okutaaha omu buhuumuro bwe? Tinubo abo abaayemere?

¹⁹Habweki niturora nkooku baalemerwe kutaaha habw'okutaikiriza kwabo.