Read Runyoro - rutooro Baheb 4 Bible Online

Baheb 4 - Runyoro - rutooro bible

Baheb 4

¹Nahabweki obu hakyaroho okunihira okw'okutaaha omu buhuumuro bwa Ruhanga, twerinde tihaikara kubaho omu hali inywe arukusangwa alemerwe kubutaahamu.

²Na itwe Amakuru Amarungi tukagahurra nka bo oku baagahuliire, baitu ebigambo ebi baahuliire bitabagasire, habwokuba abaabihuliire bakasangwa bataina kwikiriza.

³Itwe abaikiriize, tulitaaha omu buhuumuro obu, obu yabalizeho ati: “Nikyo narahiriire nyina ekiniga nti: ‘Tibali b'okutaaha omu buhuumuro bwange.’ ” Kandi kunu emirimo ye yoona ekaba ehoire okuruga obu yahangire ensi.

⁴Haroho na handi omu Byahandiikirwe nambere yabalize ha kiro kya musanju ati: “Ruhanga akahuumura ha kiro kya musanju, amazire emirimo ye yoona.”

⁵Aho nuho yasigikiire kugamba ati: “Tibali b'okutaaha omu buhuumuro bwange.”

⁶Hakabaho abo abaabandize kuhurra Amakuru Amarungi, baalemwa kutaaha omu buhuumuro bwa Ruhanga habw'obutaikiriza bwabo; baitu haroho abandi ab'okubutaaha.

⁷Nikyo Ruhanga yateerireho akasumi akarukwetwa “Kiro kinu”, naabaliza omu Daudi haahingwireho emyaka nyingi, omu bigambo ebi naruga kujurra nti: “Kiro kinu obu murahurra iraka lye, mutagumanganiza emitima yanyu.”

⁸Kakuba Yoswa yahikize Abaisirairi omu buhuumuro obu, Ruhanga tiyaakugarukire kubazaho kiro ekindi.

⁹Nukwo nu, hakyaroho ekihuumuro ekirukusisa ekya Sabbato, ekyahuliirwe abantu ba Ruhanga,;

¹⁰kandi weena anyakutaaha omu buhuumuro bwa Ruhanga aleka emirimo ye, Ruhanga nkooku yalekere eye.

¹¹Nahabweki, katwekambe okutaaha omu buhuumuro obu, haleke kubaho n'omu arukunagwa obutaikiriza nk'obu.

¹²Habwokuba ekigambo kya Ruhanga kyomiire kandi nikikora; kitoire okukira empirima ey'amoogi abiri. Kicumita nikitaaha omunda okubaganiza omutima n'omwoyo, okubaganiza engiga n'omusoina. Kyetegereza ebiteekerezo by'omuntu n'entegeka y'omutima gwe.

¹³Busaho kihangwa na kimu ekiserekerwe amaiso ga Ruhanga, byona nibirorwa kurungi kandi bisuukuliirwe amaiso g'Ogu ou turukwija kwetonganaho.

¹⁴Obu turaaba twina nyakatagara omukuru ayatembere omwiguru, nuwe Yesu Omwana wa Ruhanga, katugumire ha enyikiriza yaitu.

¹⁵Habwokuba titwina nyakatagara omukuru atarukusobora kuganya na itwe omu buceke bwaitu; baitu twina ogu ayayohiibwe omu miringo yoona nka itwe, kyonka tiyasiisa.

¹⁶Aho nu, katwirre haihi ekitebe kya Ruhanga ow'embabazi tutarukutiina, nukwo tusobole kuganyirwa n'okutunga emigisa ey'okutukoonyera omu bwire obu turukugyetaagiramu.