Read Runyoro - rutooro Baheb 5 Bible Online

Baheb 5 - Runyoro - rutooro bible

Baheb 5

¹Nyakatagara omukuru weena anyakukomwa omu bantu, ateebwaho kumarra abantu ebyabo ebiina obukwatane na Ruhanga, okuhonga ebisembo, n'okutamba ebyonzira habw'ebibi byabo.

²Naasemerra kukwata mpora abatarukwetegereza n'abahabire, habwokuba nawe aina obuceke nk'abo.

³Nahabweki kimuhikiriire kutamba ekyonzira habw'ebibi bye wenka, na habw'ebibi by'abandi.

⁴Kandi busaho n'omu ayeha wenka obukuru obu, baitu ayetwa Ruhanga, nk'Arooni oku yayesirwe.

⁵Kristo nawe ateekuze wenka nukwo afooke nyakatagara omukuru baitu akateebwaho Ogu ayamugambireho ati: “Iwe oli mwana wange, nkuzaire kiro kya hati.”

⁶Na handi naagamba ati: “Iwe oli nyakatagara ebiro byona, ow'omu mulingo gwa Melikizedeki.”

⁷Yesu, obu akaba ali omunsi, akasaba kandi akeesengereza naayamuza kandi narra amaizi, nayamirra Ogu ow'akaba naasobora kumujuna orufu; kandi Ruhanga akamuhurra habw'okwebundaaza omumaiso ge.

⁸Noobu araaba yabaire Mwana wa Ruhanga, baitu okubonabonesibwa kwe kukamwegesa kuba muhulizi.

⁹Obu yamazire kuhikirizibwa, yafooka ndugirro ey'okujunwa okutalihwaho habw'abo boona abamuhurra;

¹⁰ningira Ruhanga akamurangirra nkooku ali nyakatagara omukuru, ow'omu mulingo gwa Melikizedeki.

¹¹Hali nyakatagara ogu, twina bingi eby'okubazaaho, baitu kigumire kubisoborra, habwokuba biro binu mufookere abatarukwetegereza bwango.

¹²Omu kasumi kanu, noobu muraaba musemeriire kufooka beegesa b'abandi, nabwo nimwetaaga ondi ow'okubeegesa buhyaka engiga enkuru ez'ekigambo kya Ruhanga. Nimwetaaga amata, baitu bitali byokulya ebirukuguma.

¹³Weena arukukuzibwa amata, takeetegeriize kurungi enyegesa enyakutuhikya ha kuhikirra, habwokuba akyali mwana.

¹⁴Baitu ebyokulya ebirukuguma, biba by'abantu bakuru abamanyiire okwahurana oburungi n'obubi.