Read Runyoro - rutooro Baheb 7 Bible Online

Baheb 7 - Runyoro - rutooro bible

Baheb 7

¹Melikizedeki ogu, omukama wa Saleemu kandi nyakatagara wa Ruhanga Rutakirwa, akaitirana Abburahamu naaruga ha bulemu nambere baitiire abakama, yamusabira omugisa.

²Nubwo Abburahamu yamubaganiriizeeho ekicweka ekya ikumi ekya byona ebi yanyagire. Amakuru g'okubanza ag'ibara Melikizedeki nganu: omukama w'obuhikiriire, kandi lyongera limanyisa omukama wa Saleemu, amakuru gaakyo: omukama w'obusinge.

³Omu Byahandiikirwe tibatwoleka ise rundi nyina, noobwakubaire obuzaale bwe. Tibooleka myaka ye nambere yabandiize noobwakubaire nambere agarukira; baitu bamusisaniza Omwana wa Ruhanga; aikara ali nyakatagara ebiro byona.

⁴Murole omuntu ogu nkooku ali w'ekitiinisa! Isenkuru itwe Abburahamu akamuha ekicweka kimu ekya ikumi ky'eminyago yoona.

⁵N'abaijukuru ba Leevi, abo abatunga omulimo ogw'obunyakatagara, baikirizibwa omu Biragiro okwihaho abantu bagenzi baabo ekicweka kya ikumi, kandi kunu nabo baijukuru ba Abburahamu.

⁶Baitu omusaija ogu ataina buzaale nabo, Abburahamu akamuha kimu kya ikumi kandi yasabira omugisa Abburahamu ogu, Ruhanga ou yaragaine nawe.

⁷Na hati kimanyirwe kurungi omukuru nuwe asabira omuto omugisa.

⁸Biro binu ekicweka ekya ikumi kitungwa banyakatagara abanyakufa, baitu omu biro kya Melikizedeki kikatungwa nyakatagara ogu ou kyahandiikirweho ngu, tarukwija kufa.

⁹Omuntu asobora kugamba ngu, Omuleevi ogu, hati anyakutunga ekicweka ekya ikumi, nawe akakiha nyakatagara ogu naaraba omu Abburahamu,

¹⁰habwokuba akaba akyali mu sagama ya Abburahamu isenkuru obu yaitiraine Melikizedeki.

¹¹Hati nu obuhikiriire obu buraaba bwatungiirwe omu bunyakatagara bw'Abaleevi (nambere abantu baaheeriirwe Ebiragiro), bulyo ki obwakwetaagisize nyakatagara ondi ow'arukuruga omu rukarra rwa Melikizedeki, atali ow'omu rukarra orurukwetwa: “orw'Arooni”?

¹²Ningira obu habaho empinduka omu bunyakatagara, buli n'omu Biragiro hasemeriire kubamu empinduka.

¹³Kandi ogu arukugambwaho ebi byona, akaba atali w'oruganda orwarugwamuga muntu n'omu ow'okuheereza ha itambiro.

¹⁴Kimanyirwe kurungi MUKAMA waitu nkooku yarugire omu ruganda rwa Yuda, kandi Musa taina na kimu eki yagambire ha bunyakatagara oburukuruga omu ruganda oru.

¹⁵Eki nikigumibwa kurungi obu harukwija nyakatagara ondi arukusisana Melikizedeki ogu

¹⁶ayafookere nyakatagara atarukusigikira ha migenzo y'obuzarranwa, baitu anyakusigikira ha busobozi obw'obwomeezi obutali bw'okuhwaho.

¹⁷Habwokuba kikamuhandiikwaho kiti: “Iwe oli nyakatagara obusinge bwona, ow'omu mulingo gwa Melikizedeki.”

¹⁸Ha rubaju rumu entegeka eyabandize ekaihwaho habw'obuceke n'obutagasa bwayo,

¹⁹(habwokuba Ebiragiro bitaleete kuhikirra kwona); baitu ha rubaju orundi haizire okunihira okurukukira oburungi kandi okurukusobora kutwiriza haihi na Ruhanga.

²⁰Kandi eki kitakorwe hataroho ekirahiro.

²¹Abo abaabandize kuba banyakatagara, bakaheebwa obukuru bwabo hataroho kurahira; baitu Yesu, uwe akabuheebwa n'ekirahiro ekirukugamba kiti: “MUKAMA akarahira kandi talyeijukya eki yarahiire ati: Oli nyakatagara obusinge bwona.”

²²Eki nikyo kyafoire Yesu okuba mwema w'endagaano erukukira oburungi.

²³Baanyakatagara abaabandize bakaba bali baingi nibahonderangana, habwokuba orufu rwabaihaga ha mulimo gwabu.

²⁴Baitu Yesu aikara ali nyakatagara obusinge bwona kandi obunyakatagara bwe bw'oruteekerro, tibugweterwa ondi.

²⁵Habweki ebiro byona asobora kujuna abo abeebinga Ruhanga nibaraba omuli uwe, habwokuba abaho okubatonganirra obutoosa.

²⁶Aho nu kikaba nikisemerra itwe kutunga nyakatagara omukuru nk'ogu, ahikiriire, ataina kabi noobu kakubaire kabara, asoroirwe omu basiisi, anyumiziibwe okukira eby'omu iguru byona.

²⁷Uwe tarukwetaaga kuhonga ebyonzira buli kiro nk'abanyakatagara abo abaabandize: rundi habw'ebibi bye, rundi habw'eby'abandi. Eki akakikora omurundi gumu yamara, obu yayehongere wenka.

²⁸Mazimakwo Ebiragiro bikataho abantu abaceke babe banyakatagara abakuru; baitu anyakutairweho ekirahiro ekyahozirwe hanyuma, nuwe Mwana anyakuhikiriziibwe obusinge bwona.