Read Runyoro - rutooro Baheb 8 Bible Online

Baheb 8 - Runyoro - rutooro bible

Baheb 8

¹Ekikuru omuli ebi turukugamba nikyo kinu: Twina nyakatagara omukuru anyakwikaliire ha mukono ogw'obulyo ogw'Ekitebe ky'Anyakusinga omwiguru,

²omuheereza ow'omu kiikaro ekirukwera kandi ow'omu heema nyakabara etarasimbirwe bantu, baitu eyasimbirwe MUKAMA.

³Buli nyakatagara mukuru weena ateebwaho kuhonga ebisembo n'okutamba ebyonzira; nahabweki nyakatagara waitu ogu nawe asemeriire kugira eky'okuhonga.

⁴Kakuba abaire akyali omu nsi, tiyaakubaire nyakatagara mukuru naakake, habwokuba haroho banyakatagara abandi abarukuhonga ebisembo Ebiragiro nkooku bituragira.

⁵Omu byona ebi bakora bahondera ekyokurorraho kandi ekisisani ky'ebi ebikorwa omu kiikaro ekirukwera eky'omwiguru. Habwokuba Musa, obu akaba ayeteekanize kwemereza eheema, Ruhanga akamuhabura naagamba ati: “Taho omutima okukora ebintu byona noohondera ekisisani eki wayolekerwe ha rusozi.”

⁶Kya mazima kugamba ngu, Kristo akaheebwa obuheereza oburukukira obwa ira ekitiinisa, habwokuba nuwe muteeraniza wa Ruhanga n'abantu omu ndagaano erukukiraho oburungi, enyakukoliirwe ha byaraganiziibwe ekirukukira oburungi.

⁷Kakuba endagaano eyabandize etarabairemu nsobi, tihaakubaireho bulyo obw'okukora eya kabiri.

⁸Baitu Ruhanga akarora abantu be nkooku basobeze, nukwo kugira ati: “MUKAMA akagamba ati: ‘Akasumi kalihika nkole endagaano empyaka na bantu ba Israiri n'oruganda rwa Yuda.

⁹Endagaano etarukusisana n'eri ei nakozire n'abaisenkurubo ha kiro eki nabakwasire ha mukono nimbaiha omunsi ya Misiri. Bbo batagumire ha ndagaano yange, nikyo na nyowe nabaihiireho omutima.’

¹⁰MUKAMA naayongera ati: Enu niyo ndagaano ei ndiragaana n'abantu ba Isirairi: ebiro ebi obu birihwaho ndita ebiragiro byange omu biteekerezo byabo, mbihandiike omu mitima yabo; kandi ndiba Ruhanga wabo, nabo babe bantu bange.

¹¹Abantu tibalyegesangana rundi omuntu kuhabura mugenzi we ati: ‘Manya MUKAMA’. Habwokuba boona balimmanya, okubandiza h'arukukira obuto omuli bo okuhika h'arukukirra kimu obukuru.

¹²Na nyowe ndibaganyira obubi bwabo, kandi ebibi byabu tindigaruka kubiijuka.”

¹³Ruhanga obu arukubaza ha ndagaano empyaka, buli naadibya eya ira. Ningira kyona ekidiba kikakura, kiba kisigaize kuhwaho.