Read Runyoro - rutooro Baheb 9 Bible Online

Baheb 9 - Runyoro - rutooro bible

Baheb 9

¹Endagaano eya ira nayo ekaba ina emigenzo ey'okuramya, hamu n'ekiikaro kyayo ekirukwera omunsi.

²Hakaba haroho eheema. Omu rwemo rwayo orw'omu maiso nuho haikaraga ekikondo ky'etaara, emeeza, hamu n'omugaati ogw'Empongano. Orwemo oru rwayetwaga Ekiikaro Ekirukwera.

³Enyuma y'enyigamo eya kabiri hakaba haliyo orwemo orwayetwaga Ekiikaro Ekirukwera ky'ebirukwera,

⁴rurumu ekiswa kya zaabbu eky'okwoterraho omugaju, n'esanduuko ey'endagaano ehunzirwe zaabbu embaju zoona, nambere haikaraga ekibindi kya zaabu ekirumu maanu,[1] omwigo gw'Arooni ogwarokiire, kandi ebibbali by'amabaale ag'endagaano.

⁵Haruguru yayo haroho bamalaika ab'ekitiinisa ab'ekihanda ky'Abakerubbi, basiikiriize ekiikaro ky'okuganyirraho. Ebintu ebi byona, hati titusobora kubitondogorra.

⁶Ebi obu byamazire kuteekanizibwa biti, banyakatagara baikaraga nibataaha omu rwemo orw'okubanza, nibakoramu emirwa yabo.

⁷Baitu omu rwemo orwa kabiri hataahamuga omukuru w'abanyakatagara wenka, kandi yataahamuga omurundi gumu omu mwaka gwona, naatwara esagama ei yahayoga habwe na habw'ebibi by'abantu.

⁸Omu ntegeka ezi ibiri, Mwoyo Ahikiriire naayoleka omuhanda ogurukutaaha omu kiikaro ekirukwera nkooku gutakabaire kukingurwa, orwemo orw'okubanza rukyaroho.

⁹(Nurwo rumanyisa obusinge oburoho.) Entegeka egi nkooku ekaba eri, haaheebwayo ebisembo n'ebyonzira ebikaba bitarukusobora kuhikiriza omutima gw'omuntu arukuramya.

¹⁰Nukwo kugamba, emirwa egi yakwataga ha byokulya, na ha byokunywa, na ha kunaaba okw'okweyeza okutali kw'omulingo gumu. Niyo mirwa eyatairweho kulinda emibiri yaitu okuhika ha kasumi ak'okugarra byona buhyaka obu kalihika.

¹¹Baitu Kristo obu yaizire ali nyakatagara omukuru ow'ebirungi ebiri by'okwija, akakingura enyigamo y'eheema erukukira obukuru n'obuhikiriire (etarakozirwe mikono y'abantu. Nukwo kugamba etali y'ensi enu).

¹²Akataaha omu Kiikaro Ekirukwera ky'ebirukwera omurundi gumu yamara. Atatwalemu sagama y'embuzi rundi ey'enyana, baitu akatwara esagama ye yonyini, nukwo yatutungiire ati okucungurwa okutalihwaho.

¹³Abantu abasiisi okubamiisira esagama y'embuzi, n'ey'enimi, rundi iju ery'ekyonzira ky'enyana, obu kuraaba nikweza omubiri,

¹⁴esagama ya Kristo ayarabire omu Mwoyo Atahwaho kwehayo hali Ruhanga ataina kamogo, terikira muno kweza emitima yanyu okugiiha omu bikorwa ebifiire, nukwo muheereze Ruhanga Atafa!

¹⁵Nahabweki Kristo nuwe muteeraniza ow'Endagaano Empyaka, nukwo abo abanyakwetwa, batunge obugwetwa obutahwaho obwaraganiziibwe. Okufa kwe okwabaireho nukwo kwabacungwire omu bibi ebi baakozire bakyali omu ndagaano eyabandize.

¹⁶Okugweta tikubaho batakagumize ngu, kigweta afiire.

¹⁷Batandika kugweta okurugirra ha kufa kwe, habwokuba okugweta tikubaho kigweta akyayomiire.

¹⁸Noobwakubaire endagaano eyabandize ekagumibwa nihaseeswa esagama.

¹⁹Musa obu yamazire kumanyisa abantu boona ebi baaragiirwe omu Biragiro, yakwata esagama ey'enyana n'ey'embuzi, hamu n'amaizi, naakozesa ebyoya by'entaama erukugaajuka n'akati ak'okumiisa, yamiisira ekitabu ky'endagaano n'abantu boona,

²⁰naagamba ati: “Enu niyo sagama ey'endagaano Ruhanga ei yabaragiire kuhondera.”

²¹Kandi omu mulingo nugwo gumu yamiisira eheema n'ebikwato byona ebikozesibwa omu kuramya.

²²Mazimakwo omu Biragiro bya Musa haihi ebintu byona byezibwa, n'esagama kandi nambere hatali kuseesa sagama, tiharoho kuganyirwa ebibi.

²³Nahabweki ebintu ebirukusisana eby'omwiguru byasemerraga kwezibwa n'emirwa ey'okuseesa esagama; baitu ebintu byonyini eby'omwiguru, byo bisemerra kwezibwa n'ebyonzira ebirukukira binu oburungi.

²⁴Habwokuba Kristo atataahe omu Kiikaro Ekirukwera ekyakozirwe emikono y'abantu kandi ekirukusisana eky'omu iguru, baitu akataaha omu iguru lyonyini, nukwo azooke omu maiso ga Ruhanga kututonganirra.

²⁵Baitu uwe ateetaage kwikara naayehonga nk'omukuru wa banyakatagara oku ataaha omu Kiikaro Ekirukwera ky'ebirukwera buli mwaka, naahonga esagama etali ye nyabwe.

²⁶Kakuba kyabaire kiti, yakwikaire naabonabonesibwa okuruga ha kuhangwa kw'ensi. Baitu akasumi ako, obu kahoireho, akazooka omurundi gumu yamara, nukwo aiheho ebibi naayehonga wenka.

²⁷Kandi abantu boona nkooku baateerirweho okufa omurundi gumu, hanyuma bakacwerwa omusango,

²⁸Kristo nawe akatambwa omurundi gumu nayetweka ebibi by'abaingi, kandi alizooka obwakabiri atarukwizirra ebibi, baitu kujuna abo abamutegeriize n'ekihika.