Read Runyoro - rutooro Yak 1 Bible Online

Yak 1 - Runyoro - rutooro bible

Yak 1

¹Nyowe Yakobbo, omuheereza wa Ruhanga kandi owa MUKAMA Yesu Kristo, nimbaramukya inywe ab'enganda ikumi na ibiri abaararangiire omu mahanga.

²Bagenzi bange, obu muraahikwahoga emihito etali y'omulingo gumu, mugiitanire n'okusemererwa.

³Okulengwa kw'okwikiriza kwanyu kurugwamu okuguma.

⁴Kandi muleke okuguma oku kuhikirize omulimo gwakwo, nukwo musobole kufooka abahikiriire kandi abagumire omu by'omutima mutaina ekirukubaburaho.

⁵Omuli inywe obu haraaba haroho anyakubuzirwe amagezi, agasabe Ruhanga anyakugabira abantu boona atarukubalirra kandi atarukweijukya, mazimakwo aligaheebwa.

⁶Baitu asabe aina okwikiriza kandi atarukugurukyagurukya, habwokuba anyakugurukyagurukya asisana ekigonzi ky'enyanja ekinyakutwarwa kandi ekinyakucundwacundwa omuyaga.

⁷Anyakugurukyagurukya aleke kuteekereza ngu, omuntu ow'emitima ebiri kandi ow'atagumire omu ngeso ze zoona

⁸aina eki alitunga hali MUKAMA.

⁹Muleke mugenzi wanyu omunaku ayesiime, Ruhanga obu amunyumiza,

¹⁰kandi omuguuda ayesiime Ruhanga obu amubundaaza, habwokuba abaguuda balihwaho nk'orwakyo rw'ebimera.

¹¹Izooba obu lituruka liina ekibabu kyalyo ekisiiriiza kandi ekihotokya ebimera, orwakyo rwabyo rukunkumuka n'oburungi bwabyo buhwaho. Omuntu omuguuda nawe nukwo alihwaho ati, nakyaserra itungo.

¹²W'omugisa omuntu ogu anyakugumiisiriza omu kwohebwa, habwokuba obu alimara kusingura, aliheebwa ekondo ey'obwomeezi Ruhanga ei yaraganiize abamugonza.

¹³Omuntu obu ayohebwa aleke kugira ati: “Nyohiibwe Ruhanga”, habwokuba Ruhanga tayohebwa kukora ebibi, kandi tayohya muntu n'omu;

¹⁴baitu buli muntu ayohebwa obu abiihwabiihwa kandi atwalirizibwa okwegomba kwe okubi.

¹⁵Hanyuma okwegomba obu kumara kwija, kuzaara ekibi; kandi ekibi obu kimara kukura, kirugwamu kufa.

¹⁶Bagenzi bange abagonzibwa, muleke kubiihwabiihwa.

¹⁷Ekintu kyona ekirungi n'ekisembo kyona ekihikire biruga omu iguru hali Kazooba Nyamuhanga, atahindahinduka kandi tali nk'ekituuru ekigenda nikiihwaho.

¹⁸Akacwamu kutufoora baana be natwoleka enyegesa ye ey'amazima, nukwo tube omuganuro gw'ebi yahangire.

¹⁹Bagenzi bange abagonzibwa, kinu mukimanye: omuntu weena ahurre bwango, baitu atanguhiriza kubaza rundi kukwatwa ekiniga,

²⁰habwokuba anyakwina ekiniga tarukwija kuhika ha buhikiriire Ruhanga obu ayenda.

²¹Nahabweki mweiheho obubi bwona n'engeso mbi zoona. Mwikirize n'obuculeezi ekigambo Ruhanga eki yataire mu mitima yanyu ekirukusobora kubajuna.

²²Baitu ekigambo eki mukite omu nkora, mutali nk'abarukukihurra kwonka, mukebiihabiiha.

²³Omuntu obu ahurra ekigambo atakihikiriize, asisana nk'anyakwerorra omu ndolerwamu.

²⁴Obu ayerora, agenda, kandi ahonaaho ayebwa nkooku arukusisana.

²⁵Baitu ogu arukwetegereza Ebiragiro ebihikire, nibyo ebiragiro ebitwiha mu bwiru, akabyekambira, atali muhulizi arukwebwa baitu mukozi arukukora, nuwe aliheebwa omugisa omu ebi arukukora.

²⁶Kakuba habaho arukuteekereza nkooku ali muntu w'ediini, kandi kunu tarukulema rulimi rwe, baitu nayebiihabiiha, ediini y'omuntu ogu busamu kantu.

²⁷Ediini nyakabara kandi etaina kamogo omumaiso ga Ruhanga Isiitwe niyo enu: kusuura enfuuzi n'abafaakati abali omu mihito, n'okwerinda okusiiswa ensi.