Read Runyoro - rutooro Yak 2 Bible Online

Yak 2 - Runyoro - rutooro bible

Yak 2

¹Bagenzi bange, inywe abarukwikiriza MUKAMA waitu Yesu Kristo, MUKAMA w'ekitiinisa, muleke kusoroora omu bantu.

²Kakuba haija omuntu anyakujwaire empeta eza zaabbu hamu n'ebijwaro ebirungi, ataaha nambere mwesoroliize; hakaija n'omunaku anyakujwaire obutengo,

³mukata omutima hali ogu anyakujwaire kurungi, mukamugamba muti: “Weza ikarra hanu”; kandi omunaku mukamugambira muti: “Yemerra hali”, rundi muti: “Ikarra hansi aho ha bigere byange”,

⁴obu, nimuba mutasoroire mu bantu, mukacwamu mutaina bwinganiza?

⁵Bagenzi bange abagonzibwa, mutege amatu! Ruhanga akakoma abanaku ab'omunsi babe baguuda omu kwikiriza kandi bagwetwa b'obukama obu yaraganiize abo abamugonza.

⁶Baitu inywe, omunaku ogu, mumugayire. Kandi abaguuda tinubo babaita kubi? Tinubo babacunda nibabatwara omu kooti?

⁷Tinubo abajuma ibara eri ery'ekitiinisa inywe Abakristo eri mwarukirwe?

⁸Kakuba muhikiriza kwo ekiragiro ekikuru, Ebyahandiikirwe nkooku birukugamba biti: “Ogonzeege mutaahi waawe nkooku oyegonza wenka”, obu mukora kurungi.

⁹Baitu obu musoroora, buli mukozire ekibi kandi Ekiragiro kibasingisa omusango, mwafooka basiisi.

¹⁰Habwokuba weena anyakulemwa kukwata ekintu kimu ekiri omu Biragiro, aba asingirwe omusango gw'okutahikya Ebiragiro byona.

¹¹Ningira Ogu ayagambire ati: “Otalisiihana”, nuwe yagambire ati: “Otaliita”. Kakuba otasiihana baitu okaita, buli ocwire Ebiragiro byona.

¹²Nahabweki mubazeege kandi mukolege nk'abantu abalicwerwa omusango, nk'Ebiragiro ebitwiha omu bwiru oku bitegeka.

¹³Ataraagizire mbabazi, alicwerwa omusango ogutarumu mbabazi; habwokuba embabazi zimuganyiza omusango.

¹⁴Bagenzi bange, nikigasa ki omuntu kugamba ngu, aina okwikiriza, baitu ataina ebi arukukora? Okwikiriza oku kusobora kumujuna?

¹⁵Kakuba mugenzi wanyu omusaija rundi omukazi aba naajwara ebitahikire kandi ataina byokulya ebya buli kiro,

¹⁶baitu omu omuli inywe akamugambira ati: “Genda n'obusinge, otagate kandi oigute”, atamuhaire ebi omubiri gurukwetaaga, eki nikigasa ki?

¹⁷Habweki, okwikiriza kwonka obu kuraaba kutarumu bikorwa, kuba kufiire.

¹⁸Baitu haroho asobora kugamba ati: “Iwe oina okwikiriza, na nyowe nyina ebikorwa.” Hati nu onyoleke okwikiriza kwawe okutarumu bikorwa, na nyowe habw'ebi nkora, ndakwoleka okwikiriza kwange.

¹⁹Oikiriize Ruhanga nkooku ali omu, kandi ohikya kwo. Nangwa n'amasitaani eki gakiikiriza n'okukankana nigakankana.

²⁰Mutaahi wange, iwe omudoma, nooyenda bakwoleka okwikiriza okutarumu bikorwa nkooku kutarukugasa?

²¹Ebikorwa tinibyo byahikiriize isenkuru itwe Abburahamu obu yahaireyo omutabani Isaaka ha itambiro?

²²Aho noorora, okwikiriza kukagendera hamu n'ebikorwa bye, kandi okwikiriza kukahikirizibwa ebi yakozire.

²³Nahabweki Ekyahandiikirwe kikahikirizibwa ekirukugamba kiti: “Abburahamu akaikiriza Ruhanga, kandi eki kyamurugiramu obuhikiriire”; yayetwa nganjani ya Ruhanga.

²⁴Aho nuho murukurorra omuntu nkooku ahikirizibwa ebikorwa, kutali kwikiriza kwonka.

²⁵Nikyo kimu Rahabbu, omunyarwanju ogu, nawe akahikirizibwa ebikorwa obu yakuniire entasi yabaragirra omuhanda gundi.

²⁶Omubiri ogutarumu mwoyo nkooku guba gufiire, n'okwikiriza okutarumu bikorwa nukwo kuba kufiire kuti.