Read Runyoro - rutooro Yak 3 Bible Online

Yak 3 - Runyoro - rutooro bible

Yak 3

¹Bagenzi bange, haleke kubaho baingi omuli inywe abarukugonza kwefoora beegesa b'abandi, habwokuba nimumanya itwe abarukwegesa nkooku tulicwerwa omusango ogurukukira ogw'abandi.

²Ningira itwena tusobya emirundi nyingi. Kandi omuntu kakuba atasobya omu bigambo abaza, ogu aba ahikiriire kandi asobora kulema omubiri gwe gwona.

³Itwe tuta ebyoma omu kanwa k'embaraasi nukwo zitworobere, tulema emibiri yazo yoona, tuzitwara nambere turukwenda.

⁴Murole n'emeeri; noobu ziba ziri nkooto zita, kandi niitwarwa emiyaga y'amaani, baitu zirungikwa engahi entaito muno hoona omurungiki h'arukwenda.

⁵Orulimi narwo kacweka kataito k'omubiri, baitu rwenyumiriza ha bintu ebikuru. Ka kyamahano okurora ekibira ekikooto nikyokebwa akarro kake!

⁶Orulimi narwo ruba murro. Omu bicweka by'omubiri orulimi niyo ndugirro y'ebibi byona, rusiisa omubiri gwona, rurugwamu omurro ogukwokya obuhangwa bwaitu bwona; kandi orulimi oru rucumika omurro ogu rwiha okuzimu Nyabuyonga.

⁷Buli mulingo gw'ebisoro, n'ebinyonyi, n'ebyekurra, n'encu ez'omu nyanja bisobora kulemwa kandi bikalemwa ira abantu;

⁸baitu tiharoho muntu asobora kulema orulimi ruba bubi obutahuumura, rwijwire obusegwe obwita.

⁹Nurwo tweyambisa kukugiza MUKAMA Isiitwe, kandi turukyenesa abantu abaahangirwe omu nsisana ya Ruhanga.

¹⁰Omu kanwa ako konyini harugamu okukugiza n'okukyena. Bagenzi bange, eki tikisemeriire kuba kiti.

¹¹Ensoro emu esobora kurugwamu amaizi amarungi n'amabi?

¹²Nyabura inywe, omutini gusobora kwana ebijuma eby'omuti Oliva, rundi omuzaabbibbu kwana eby'omutini? Amaizi g'ekisura nago tigasobora kurugwamu amarungi.

¹³Nooha omuli inywe anyakwina amagezi n'okwetegegereza? Leka akigumye n'engeso ze enungi n'ebikorwa ebi akora n'obuculeezi obunyakurumu amagezi.

¹⁴Baitu omu mitima yanyu obu muraaba mwinamu ihali lingi rundi okwegonza, muleke kwenyumiza n'okusereka amazima.

¹⁵Amagezi nk'ago tigaruga omwiguru, baitu garuga omunsi; tigali g'abantu baitu g'Omwohi.

¹⁶Nambere hali ihali n'okwegonza, nuho haba okutaikirraniza, hamu n'ebikorwa ebibi byona.

¹⁷Baitu amagezi agaruga omwiguru, eky'okubanza gaba marungi, gongera galeeta obusinge n'obuculeezi, gaikiriza eby'obulyo, gaijwire embabazi, garugwamu ebikorwa ebirungi, tigasoroora mu bantu kandi tigarumu bugobya.

¹⁸Okuhikirra niryo igesa ly'embibo ezabyairwe kurungi abantu abaserra obusinge.