Read Runyoro - rutooro Yak 4 Bible Online

Yak 4 - Runyoro - rutooro bible

Yak 4

¹Kiki ekireeta amalemu n'empaka omuli inywe? Tikuli kwegomba okubi okurukurwanira omu bicweka by'emibiri yanyu?

²Inywe mwegomba ebintu; baitu obu mulemwa kubitunga, mwikiriza n'okwita abandi. Mwegomba eby'abandi, baitu obu mulemwa kubitunga, nubwo mucwa obulemu kandi murwana. Ekibatanga kutunga, habwokuba timubisaba Ruhanga.

³Kandi obu musaba mutaheebwa, habwokuba musabire kubi. Mukaba nimwenda kubimarra omu kwegomba kwanyu okubi.

⁴Ha! Bantu inywe abateesigwa! Timurukumanya okuganjana n'ensi nkooku nubwo obunyanzigwa hali Ruhanga? Nahabweki weena anyakugonza kuganjana n'ensi, ayefoora muzigu wa Ruhanga.

⁵Rundi nimuteekereza ngu, Ekyahandiikirwe kigambira busa ekirukugira kiti: “Omwoyo Ruhanga ogu yatutairemu, tarukwenda kugwegarurra?”

⁶Baitu emigisa ei atuha neekiraho, nikyo kyahandiikirwe kiti: “Abeekuza, Ruhanga abahakaniza; baitu abeebundaaza abaha emigisa.”

⁷Nahabweki mworobere Ruhanga; murwanise Omwohi, nawe naija kubarugaho.

⁸Mwirre haihi Ruhanga, nawe alibairra haihi. Inywe abasiisi munaabe engaro zanyu, na inywe ab'emitima ebiri, mugisemeze.

⁹Mutuntule, muganye, kandi murre. Enseko zanyu ifooke kurra, n'okusemererwa kwanyu kufooke bujune.

¹⁰Mwebundaaze omumaiso ga MUKAMA, nawe alibanyumiza.

¹¹Bagenzi bange, muleke kubazanganaho kubi. Anyakubazaaho kubi mugenzi we, rundi anyakumucwera omusango, buli nabazaaho kubi Ekiragiro kikuru eky'engonzi kandi nakigaya. Kakuba ogaya Ekiragiro ekikuru, buli torukukihikya, baitu oyefoire mukama wakyo.

¹²Haroho omu wenka anyakutaho Ebiragiro kandi aba mukama wabyo. Nuwe ogu arukusobora kujuna n'okuhwerekereza. Baitu iwe niiwe oha arukucwera mugenzi waawe omusango?

¹³ Muhurre inywe abanyakugamba muti: “Hati rundi nyenkya turaagenda omu rubuga nanka, tumaleyo omwaka nitusuubura, nukwo twiheyo amagoba”,

¹⁴kunu mutarukumanya ebiraabaho nyenkya. Obwomeezi bwanyu kintu ki? Muli nk'ekiho ekinyakuzooka akacu kake, hanyuma kikakya.

¹⁵Haakire mugambe muti: “MUKAMA obu alisiima, na itwe tuba tukyaroho, turaakora kinu na kiri.”

¹⁶Baitu hati nimwemanyaho muno, nikyo murukwenyumiriza. Kandi okwenyumiza nk'oku kuba kubi.

¹⁷Weena anyakumanya eki asemeriire kukora baitu akalemwa kukikora, eki kimufookera kibi.