Read Runyoro - rutooro Yak 5 Bible Online

Yak 5 - Runyoro - rutooro bible

Yak 5

¹Hati nu inywe abaguuda, murre kandi muteere empamo habw'enaku erukwija kubaizira.

²Itungo lyanyu hati lijunzire, n'ebijwaro byanyu biriirwe enkugutu.

³Ezaabbu yanyu n'efeeza bimomere, kandi obumomi bwabyo bulibasingisa omusango, nibulya emibiri yanyu nk'omurro. Itungo eri mwayahwire, liribahindukira omu biro bya ha mpero.

⁴Mwetegereze, empeera mwagobiize abakozi abaagesire emisiri yanyu neeyamuza; kandi emikungo y'abagesi ehulirwe MUKAMA w'amahe.

⁵Mukaikara omunsi nimwejaahiika kandi nimusemererwa; mukalya, mwaiguta nkooku mwagondeze omu biro abahikiriire ebi baitiirwemu.

⁶Mukasingisa omusango omuntu ahikiriire kandi mwamwita; kunu nuwe ogu atarabarwanisize.

⁷Habweki bagenzi bange, mugumiisirize okuhika MUKAMA obu aliija. Murole omulimi, alindirra omusiri gwe kurugwamu ebirimwa by'omugaso. Agumiisiriza okuhika obu gugwerwa enjura ey'itoigo n'ey'irumbi.

⁸Na inywe mugumiisirize. Mutaterebuka habwokuba MUKAMA amaliize kuhika.

⁹Bagenzi bange, muleke kunyegerrangana, mutaikara kujunaanwa mumaiso g'omucwi w'emisango; habwokuba na hati ali ha irembo nategereza.

¹⁰Bagenzi bange, ekyokurorraho eky'okugumiisiriza n'okubonabona nubo abarangi abaabalize omu ibara lya MUKAMA.

¹¹Mumanye ngu, abaagumiisirize tubeeta bahiirwa. Mukahurra Yobu nkooku yagumiisiriize kandi mwarora Mukamu nkooku yamulinzire. Abakwo munyambabazi kandi muganyizi.

¹²Baitu bagenzi bange, ekikuru muno: mutalirahira iguru noobu yaakuba ensi, rundi endahiro endi yoona. Ekigambo kyanyu: Ego, kiikale kiri: Ego; kandi ekigambo kyanyu: Nangwa, kiikale kiri: Nangwa, nukwo muleke kusingwa omusango.

¹³Omuli inywe obu haraaba haroho anyakwina obulemeezi, asabe. Obu haraaba haroho arukusemererwa, azine eby'okukugiza Ruhanga.

¹⁴Omuli inywe obu haraaba haroho anyakurwaire, leka ayete abakuru ab'ekitebe ky'abaikiriza, bamusabire nibamusiiga amagita omu ibara lya MUKAMA;

¹⁵kandi okusaba oku okunyakurumu okwikiriza nikwija kukiza omurwaire, na MUKAMA naija kumwimukya. Obu araaba yakozire ebibi, araabiganyirwa.

¹⁶Nahabweki mwaturrangane ebibi byanyu, musabirangane nukwo mukire. Okusaba kw'omuntu ahikiriire kwina amaani kandi nikugasa muno.

¹⁷Eriya akaba ali muntu nka itwe, baitu akasaba ataireho omutima ngu, enjura ereke kugwa, kandi enjura yamara emyaka esatu n'ameezi mukaaga etarukugwa ha nsi.

¹⁸Kandi akagaruka yasaba, iguru lyanaga enjura, n'ensi yameza ebimera byayo.

¹⁹Bagenzi bange, obu haraaba haroho omuli inywe omuntu anyakuhabire, yaruga ha mazima, kandi hakabaho arukumugarra,

²⁰ogu amanye nkooku weena anyakugarra omusiisi, akamwiha omu nsobi ei yahabiiremu, alijuna omwoyo gw'omusiisi ogu, kandi ebibi ebitabarwa biriswekerwa.