Read Runyoro - rutooro 1Pet 2 Bible Online

1Pet 2 - Runyoro - rutooro bible

1Pet 2

¹Nahabweki, muleke itima lyona n'obugobya bwona, muleke obuteesigwa, ihali n'okuhangirra kwona.

²Abaana enkerembe abaakazarwa juba nkooku beetaaga amata ag'omubiri, na inywe mwetaaga amata amarungi ag'omwoyo, nukwo gabakuze, gabahikye ha kujunwa;

³habwokuba “Muroleze ha burungi bwa MUKAMA”, nkooku kyahandiikirwe.

⁴Mwije hali ogu. Nuwe ibaale eryomeezi, ibaale abantu eri baayangire; baitu eryakomerwemu Ruhanga kandi ery'omuhendo.

⁵Na inywe mube nk'amabaale agoomeezi, agombekerwemu enju ey'omwoyo, mube abanyakatagara abarukwera, nukwo mutambe ebyonzira eby'omwoyo, ebyonzira ebirukusiimwa Ruhanga omu Yesu Kristo.

⁶Ebihandiiko Ebirukwera nibigamba biti: “Dara, nimbyara omu Siyoni ibaale ery'obugumizo, ibaale eryakomerwe kandi ery'omuhendo. Weena anyakumwikiriza, talikwatwa nsoni.”

⁷Habweki, hali inywe abaikiriza, ibaale eri, ly'omuhendo; baitu habw'abo abataikiriza: “Ibaale lyonyini abombeki eri baayangire, niryo lyafookere bugumizo bw'enju.”

⁸Kyayongera kiti: “Lyaba ibaale eriritabaijura abantu, kandi mwandara ogulibanaga”; batabaijuka habwokuba tiboorobera kigambo, nkooku Ruhanga yakibategekiire.

⁹Baitu inywe muli ruganda orukomerwemu, orwina abanyakatagara b'oruganda rwa MUKAMA, ihanga erirukwera, bantu ba Ruhanga mali, nukwo mumanyise ebikorwa ebirukuhuniriza eby'Ogu ayabeesire, yabaiha omu mwirima yabataahya omu musana gwe ogw'amahano.

¹⁰Ira mukaba mutali bantu be, baitu hati muli bantu ba Ruhanga. Ira mukaba mutagiriirwe mbabazi, baitu hati muzigiriirwe.

¹¹Abagonzibwa, nimbeesengereza nk'abantu abali mu mahanga kandi abaazaahire, mwetantale okwegomba okw'omubiri okurukurwanisa emyoyo yanyu.

¹²Mugire engeso nungi omu Banyamahanga, noobu baraaba nibabeeta nkozi z'ebibi, baitu leka barole ebirungi ebi mukora, nukwo bakugize Ruhanga ha kiro eki aliiziramu.

¹³Habwa MUKAMA, mworobere ab'obusobozi boona abarukubalema, noobu araaba ali Kaisaali, habwokuba nuwe mukuru,

¹⁴rundi abalemi abakuru abatumirwe Kaisaali kufubira abo abanyakukora kubi, n'okusiima abo abanyakukora kurungi.

¹⁵Ningira Ruhanga kinu nikyo agonza, inywe okukora ebihikire, nukwo muculeeze obutamanya bw'abadoma.

¹⁶Mube bantu b'obugabe, baitu obugabe bwanyu mutabufoora byekwaso by'okusiisa; kyonka mwikale muli baheereza ba Ruhanga.

¹⁷Abantu boona mubatemuga ekitiinisa. Mugonzeege ab'oruganda. Mutiinege Ruhanga. Kandi Kaisaali mumuhe ekitiinisa.

¹⁸Inywe abaheereza b'abantu, mworobere bakama banyu nimubatamu ekitiinisa kyona. Mutoorobera ab'embabazi rundi ab'amakune bonka, baitu n'abanyamwaga.

¹⁹W'omugisa ogu anyakugumiisiriza enaku ezi bamuboneseza busa habwa Ruhanga.

²⁰Karungi ki aka mutunga obu mugumiisiriza kuteerwa habw'okukora kubi? Baitu obu mugumiisiriza kusaalizibwa habw'okukora kurungi, nimwija kusiimwa Ruhanga.

²¹Ningira eki nikyo mwayetiirwe, habwokuba Kristo nawe akabonesibwa habwanyu, yabasigira ekyokurorraho, nukwo na inywe muhondere ekirale kye.

²²Uwe atakole kibi; akanwa ke katabemu bugobya.

²³Obu yajumirwe, atajume; obu yabonesiibwe, atakange abaamuboneseze; baitu akeesiga Ruhanga anyakucwa emisango omu bwinganiza.

²⁴Kristo wonyini, omu mubiri gwe akeetweka ebibi byaitu yabihikya ha musaraba, nukwo tuzirre kimu ekibi, kandi twemarre ha buhikiriire. Ebihuta bye nibyo byabakirize.

²⁵Habwokuba mukaba muhabire nk'entaama, baitu hati muhabukire, mwagaruka hali Omuliisa kandi Omuroleerezi w'emyoyo yanyu.