Read Runyoro - rutooro 1Pet 3 Bible Online

1Pet 3 - Runyoro - rutooro bible

1Pet 3

¹Na inywe banyinabwenge, muhurrege ba iba-inywe, nukwo abamu mulibo noobu baraaba batarukwikiriza kigambo kya Ruhanga, baitu bahindurwe engeso zanyu enungi, mutaina eki murukubagambira,

²obu barora engeso zanyu enungi ezirumu kutiina Ruhanga.

³Oburungi bwanyu buleke kuba ha bintu ebirukuzooka, nimusiba isoke, nimwekunisa na zaabbu, nimujwara ebirukwandaara;

⁴baitu oburungi bwanyu bube bw'omunda omu mitima yanyu, nk'ekintu eky'omuhendo ekiikaraho, nugwo omwoyo gw'embabazi kandi omuculeezi, omwoyo ogw'omuhendo mali omumaiso ga Ruhanga.

⁵Abakazi abahikiriire aba ira abaanihiraga omu Ruhanga, nabo nukwo baayecumaga bati, kandi baahurraga baibabo,

⁶nka Saara oku yahurraga Abburahamu, naamweta mukama we. Hati na inywe muli bahara be obu muraaba nimukora ebihikire, mutarukwikiriza kintu na kimu kubakanga.

⁷Na inywe banyinamaka, mwikale n'abakazi banyu nimubataho omutima kandi nimubatamu ekitiinisa, habwokuba bbo b'amaani make. Baitu bagweterwa hamu na inywe ekisembo kya Ruhanga eky'obwomeezi. Obu muraakora muti, tiharukwija kubaho kintu kyona ekirukutanga okusaba kwanyu.

⁸Eky'okumalirra, inywena mube n'omwoyo gumu, mugirrangane embabazi, mugonze ab'oruganda, mugire omutima ogurukworoba kandi ogurukwebundaaza.

⁹Muleke kugarurrana obubi rundi okujumangana; baitu musabirangane omugisa. Ningira eki nikyo Ruhanga yabeetiire, nukwo abahe omugisa.

¹⁰Kikahandiikwa kiti: “Ogu anyakugonza obwomeezi n'okutunga obusinge, atange orulimi rwe kubaza ebibi, n'akanwa ke akatange kubaza eby'obugobya;

¹¹ayetantale ebibi, akole ebirungi; aserre obusinge kandi abwitanire.

¹²Habwokuba amaiso ga MUKAMA gaikara garoleriire abahikiriire, kandi amatu ge agatega okusaba kwabo. Baitu amaiso ga Ruhanga gakimba abo abakora kubi.”

¹³Nooha asobora kubakora kubi obu muraaba nimwekambira okukora ebirungi?

¹⁴Noobu muraaba nimubonesibwa habw'obuhikiriire, muliheebwa omugisa. Abantu abo mutabatiina kandi mutaharaza omutima,

¹⁵baitu muhe Kristo ekitiinisa mu mitima yanyu, abe MUKAMA wanyu. Mwikalege mweteekaniize okusoborra kurungi buli muntu anyakubakaguza ha kunihira oku mwinakwo;

¹⁶baitu nabwo mukikole muli baculeezi nimuha Ruhanga ekitiinisa. Kandi mwikale mwina omutima omurungi, nukwo abo abarukubaza kubi ha ngeso enungi ezi mwina habw'okuhondera Kristo, obu baraabajumaga bakwatwe ensoni.

¹⁷Haakire mubonabonesibwe habw'okukora ebirungi, Ruhanga obu araaba naakisiima, hatali okubonesibwa habw'okukora ebibi.

¹⁸Kristo akafa habw'ebibi omurundi gumu yamara. Ahikiriire akafeera abatahikiriire, nukwo asobole kutuhikya hali Ruhanga. Omubiri gwe bakagwita baitu omwoyo gwe Ruhanga akagwomeeza.

¹⁹Omwoyo ogu nugwo yagendiiremu kurangirra emyoyo y'abaafiire ei ekaba eri omu nkomo.

²⁰Nubo abantu abatarahuliire kara, Ruhanga obu akaba abagumiisiriize omu biro bya Noha, eryato erikooto obu likaba nirikorwa, abantu abake, nka munaana bonka eri baajunirwemu okutaitwa amaizi.

²¹Ekyokurorraho eki nikisisana okubatizibwa okurukujuna inywe. Okubatizibwa oku tikiri kintu ekirukwogya iko ha mubiri, baitu nukwo okusaba kwaitu, Ruhanga atuhe omutima ogwezire habw'okuhumbuuka kwa Yesu Kristo.

²²Nuwe ogu ayagenzire omwiguru, ali ha mukono ogw'obulyo ogwa Ruhanga, naalema ebitebe bya bamalaika, eby'ab'obusobozi, n'eby'amaani.