Read Runyoro - rutooro 1Pet 4 Bible Online

1Pet 4 - Runyoro - rutooro bible

1Pet 4

¹Kristo nkooku yabonabonesiibwe omu mubiri, na inywe mwikale mwina omutima ogugumire nk'ogwe, habwokuba weena anyakubonabonesibwa omu mubiri, alekeraho kukora ebibi,

²nukwo amale ebiro ebimusigaire akyaina omubiri atarukulemwa okwegomba kubi okw'abantu, baitu naalemwa entegeka ya Ruhanga.

³Omu biro ebyahingwire mukamara akasumi kaingi nimukora ebi Abanyamahanga basiima. Mukaikara omu busiihani, omu kworobera okwegomba kubi okw'omubiri, omu tamiiro, omu magenyi amabi, omu bididi ebirumu ebitamiiza, n'omu kuramya abacwezi.

⁴Hati Abanyamahanga nibahunirra okurora mutarukuteerana nabo omu ngeso mbi nk'ezi kandi nikyo barukubajumira.

⁵Baitu bbo balyetonganira hali Ogu anyakweteekaniza kucwera omusango aboomiire n'abafiire.

⁶Eki nikyo Amakuru Amarungi gaarangiriirwe na hali abantu abaafiire. Noobu baraaba baamazire kucwerwa omusango omu mubiri nk'abantu boona, baitu balisobora kuhika ha bwomeezi bwa Ruhanga omu myoyo yabo.

⁷Empero ya byona eri haihi; nahabweki mwikale nimwerinda kandi muteekaine nukwo musobole kubaza na Ruhanga.

⁸Okukira byona mwikale nimugonzangana, habwokuba engonzi iswekerra ebibi bingi.

⁹Mugirranganege amakune mutaina kahyeme.

¹⁰Buli omu nkooku yahairwe ekisembo, mubikozese kukoonyera abandi nk'abakeeto ba Ruhanga abarungi abaahairwe ebisembo ebitarukusisana.

¹¹Weena anyakubaza, abaze Ruhanga ebi amusuukuliire. Weena anyakuheereza, aheereze n'amaani Ruhanga aga amuhaire; nukwo omu byona Ruhanga akugizibwe omu Yesu Kristo, anyakwina ekitiinisa n'obulemi ebiro byona. Amiina.

¹²Abagonzibwa, muleke kuhunirizibwa ebirengeso eby'amaani ebirukubagwera, mukaba nk'abagweriirwe ihano.

¹³Baitu musemererwe muno habw'okubagana ha kubonesibwa kwa Kristo, nukwo ekitiinisa kye obu kirisuukurwa, mulikyanganuka kandi musemererwe.

¹⁴Kakuba babajuma habw'okwikiriza Kristo, muli b'omugisa, habwokuba Mwoyo ow'ekitiinisa, Mwoyo wa Ruhanga aikara hali inywe.

¹⁵Baitu hatabaho n'omu omuli inywe arukubonabonesibwa habw'obwisi, habw'obusuma, habw'okukora kubi, rundi habw'okwetaahya mu by'abandi.

¹⁶Kakuba omuntu abonabonesibwa habw'okuba Mukristo, aleke kukwatwa ensoni; baitu akugize Ruhanga habw'okwetwa ibara eri.

¹⁷Ningira akasumi ak'okucwa omusango kahikire. Okucwa omusango nikubandiza ha bantu ba Ruhanga, Obu kuraaba nikubandiza hali itwe, abo abataikiriza Amakuru Amarungi ga Ruhanga baliba bata?

¹⁸Kikahandiikwa kiti: “Omuntu ahikiriire obu araaba atarukwanguhirwa muno kujunwa, leero atarukutiina Ruhanga n'omusiisi baliba bata?”

¹⁹Nahabweki abo ababonabonesibwa nkooku Ruhanga agonza, baikale nibakora ebirungi, kandi obwomeezi bwabo babukwase Omuhangi omwesigwa.