Read Runyoro - rutooro 1Pet 5 Bible Online

1Pet 5 - Runyoro - rutooro bible

1Pet 5

¹Nahabweki ninteererra abakuru omuli inywe, nyowe omukuru nyakyabu, kaiso w'okubonesibwa kwa Kristo kandi arukubagana ha kitiinisa ekirukwija kusuukurwa:

²Murolerre igana lya Ruhanga eri mwakwasiibwe, mulirolerre mutarukuhambirizibwa, baitu nimugonza; mutarukukorra empeera, baitu nimuheereza n'omuhimbo.

³Mutalemesa ireme abo aba murukurolerra, baitu mube kyokurorraho ekirungi hali igana.

⁴Kandi Omuliisa omukuru obu alizooka, muliheebwa ekondo ey'ekitiinisa etacucuka.

⁵Na inywe abasigazi mworobere abakuru. Inywena mwekambire kuheerezangana nimwebundaaza, buli omu omu rubu rwe; habwokuba: “Ruhanga ahakaniza abeekuliiriza; baitu abeebundaaza, abaha omugisa.”

⁶Nahabweki mwebundaaze mwikirize kulemwa obusobozi bwa Ruhanga, nukwo akasumi obu kalihika asobole kubanyumiza.

⁷Okutuntura kwanyu kwona mukumukwase, habwokuba abataho omutima.

⁸Mwerinde kandi mwikale nimurora. Sitaani, omuzigu wanyu, naarabanganamu nk'entale erukubbukura, neeserra ou eraajunjubura.

⁹Mumwangirre, mugumiire omu kwikiriza kwanyu, nimumanya bagenzi banyu ab'omunsi yoona nkooku bahikwaho okubonesibwa nk'okwanyu.

¹⁰Kandi obu muliba mumazire kubonesibwa akacu kake, Ruhanga ow'embabazi nyingi, ayabeetiire ekitiinisa kye ekitahwaho omu Kristo, alibahuumuza, alibagumya, kandi alibongera amaani.

¹¹Obulemi bwikale nawe ebiro byona. Amiina.

¹²Mbahandiikiire ebbaruha enu engufu, ninkoonyerwa Siraasi ou ndukumanya nkooku ali w'oruganda omwesigwa. Nimbateererra kandi nimbamanyisa enyegesa enu nkooku erumu embabazi za Ruhanga ez'amazima; mugigumiremu.

¹³Ekitebe ky'abaikiriza abali Bbabbulooni, akyakomerwe Ruhanga nka inywe, nikibaramukya. Omwana wange Mariko nawe naabaramukya.

¹⁴Muramukyangane nimugwangana omu kifuba n'engonzi. Obusinge bwikale na inywe inywena abali omu Kristo!