Read Runyoro - rutooro 2Pet 1 Bible Online

2Pet 1 - Runyoro - rutooro bible

2Pet 1

¹Nyowe Simooni Petero, omuheereza kandi omukwenda wa Yesu Kristo, nimpandiikira inywe abaahairwe okwikiriza kw'omuhendo okurukwingana n'okwaitu, okunyakuruga omu buhikiriire bwa Ruhanga waitu kandi Omujuni waitu Yesu Kristo.

²Omugisa n'obusinge bikanye omuli inywe nkooku murukugenda nimweyongera kumanya Ruhanga n'okumanya Yesu MUKAMA waitu.

³MUKAMA waitu ogu, habw'amaani ge ag'obwaruhanga, akatuha ebirungi byona ebirukukwatana n'obwomeezi obuhyaka kandi n'okuheereza Ruhanga; yabituheera omu kumanya Ogu ayatwesire kubagana ha kitiinisa kye n'oburungi bwe.

⁴Ebi nibyo yatuheeriremu endagaano ze ez'omuhendo kandi enkuru, nukwo habwazo musobole kukira obubi obw'omunsi obuleetwa okwegomba okubi, kandi mubagane ha bwaruhanga bwe.

⁵Habw'obulyo obu, mwekambe nkooku murukusobora okwongera engeso nungi ha kwikiriza kwanyu, kandi ha ngeso nungi mwongereho okumanya,

⁶ha kumanya mwongereho okwetanga, ha kwetanga mwongereho okuguma, ha kuguma mwongereho okutiina Ruhanga,

⁷ha kutiina Ruhanga mwongereho okugirrangana embabazi nk'ab'oruganda, kandi ha kugirrangana embabazi nk'ab'oruganda mwongereho n'engonzi.

⁸Kakuba muba n'ebirungi ebi byona kandi bikeeyongera kukanya, nibiija kubatambira obugara rundi okutaba b'omugaso bibaleetere kumanyira kimu MUKAMA waitu Yesu Kristo.

⁹Weena ataina ebirungi nk'ebi, aba mufu w'amaiso, arora ebimuli haihi byonka, kandi aba ayeberwe nkooku yayogiibweho ebibi bye ebya ira.

¹⁰Habweki bagenzi bange, mweyongere okwekamba nukwo mwoleke boona nkooku mwayesirwe kandi mwakomerwe. Kakuba mukora muti, timurukwija kugwa;

¹¹kandi muliheebwa obugabe bw'okutaaha omu bukama obutahwaho obwa MUKAMA kandi Omujuni waitu Yesu Kristo.

¹²Nahabweki ndaatahoga omutima obutoosa okubaijukya ebirungi ebi, noobu muraaba mubimanyire kandi mugumire omu mazima aga mwahairwe.

¹³Ninteekereza nikihika okubeekambisa mbibaijukye ntakafiire,

¹⁴habwokuba nyetegeriize ndi haihi kufa, MUKAMA waitu Yesu Kristo nkooku yammanyisize.

¹⁵Ninyija kutaho omutima kubaijukyaga ebirungi binu akasumi koona, noobu ndiba mmazire kufa.

¹⁶Obu twabamanyisize ha busobozi na ha kwija kwa MUKAMA waitu Yesu Kristo, tutakuraatire ebigambo eby'okwehangahanga, baitu tukaba baakaiso abaayeroliire ekitiinisa kye,

¹⁷habwokuba Ruhanga Ise obu yamunyumiize namuha ekitiinisa, hakahulirwa iraka eryarugire omu Kitiinisa Kikuru kya Ruhanga, nirigamba liti: “Onu nuwe Mwana wange omugonzibwa ou nsiima muno.”

¹⁸Iraka eri tukalihurra niriruga omwiguru, habwokuba tukaba tuli nawe ha rusozi orurukwera.

¹⁹Nubwo ebyarangirwe abarangi byayongiire kugumibwa Ruhanga. Na inywe muraakora kurungi eki kukitaho omutima, abantu nkooku bata omutima ha taara erukwakira omu mwirima okuhika obwire kukya, n'enyunyuuzi ey'omu rukyakya ekaimuka omu mitima yanyu.

²⁰Ekikuru muno, mumanye nkooku hataroho burangi bw'omu Bihandiiko Ebirukwera omuntu obu asoborra habwe wenka;

²¹ningira tihakabahoga oburangi omuntu obu arayatwire wenka, baitu abantu bagambisibwa Mwoyo Ahikiriire kwatura ebigambo ebyarugire hali Ruhanga.