Read Runyoro - rutooro 2Pet 2 Bible Online

2Pet 2 - Runyoro - rutooro bible

2Pet 2

¹Abarangi b'ebisuba nkooku baimukire omwihanga lya Isirairi, n'abeegesa b'ebisuba nukwo baliimuka bati omuli inywe, babataahyemu mpora mpora obuhakani oburukuhwerekereza, nangwa n'okwehakana MUKAMA wabu ayabacungwire. Baayereetera bonka okuhwerekerra okwa bwango.

²Baingi balihondera engeso zaabo z'orwanju kandi bagayise abantu omuhanda gw'amazima.

³Habw'omukoijo gwabo balibaihaho sente nibabeegesa ebigambo eby'obugobya. Omusango gukabasinga ira kandi tigukarugahoga. Ekifubiro kyabu kiikara nikibategereza.

⁴Ruhanga ataganyire bamalaika obu baasiisire, baitu yabanaga omu kiinongoro ky'omurro, yababohera okuzimu omu mwirima kasira, baikaleyo okuhika obu balicwerwa omusango.

⁵Kandi ataganyire abantu aba ira n'ensi yabo obu yaleesire okusandaara kw'amaizi omunsi y'abo abatatiina Ruhanga, baitu akajuna Noha ayateereriire abantu bahikirre.

⁶Kandi Ruhanga akookya embuga za Sodomu na Gomora yazifoora iju, yaisingisa omusango ogw'okuhwerekerra, zibe kyokurorraho ky'abo abaliba batarukutiina Ruhanga.

⁷Baitu yajuna Looti, omuntu omurungi ow'akaba atuntuziibwe muno orwanju rw'abantu ababi.

⁸(Ningira omuntu omurungi ogu, ebi yarozire n'ebi yahuliire obu yabaikaramuga nibakora ebitahikire, byasaalizaga omutima gwe omurungi buli kiro.)

⁹Ebi byona bitwoleka Ruhanga nkooku amanyire kujuna abamutiina, akabaiha omu mitalibano; amanyire n'okwikaza ababi ha kifubiro okuhika ha kiro eky'okucwerwa omusango;

¹⁰kandi okukira muno abo abeemarra ha kwegomba okubi okw'emibiri yabo, kandi abarukugaya obusobozi bwa Kristo. Abeegesa b'ebisuba abo, bantu bahoole kandi ntahurra, tibatiina n'okujuma bamalaika ab'ekitiinisa,

¹¹kandi kunu bamalaika noobu baraaba nibabakiraho amaani n'obusobzi, tibabahyemera kandi tibabajunaana musango omumaiso ga MUKAMA.

¹²Baitu abasiisi abo basisana ebisoro ebitaina magezi, ebisoro ebirukulemwa obuhangwa bwabyo, ebyazaalirwe kutegwa n'okwitwa. Bajuma ebintu ebi batarukumanya, bali b'okuhwerekerezibwa nk'ebisoro ebi,

¹³basaalizibwa kubi habw'ebibi ebi baakozire. Eki barukweta kusemererwa, nugo amagenyi ga nyamusana. Abantu abo bitonyezi ebibi kandi bumogo omu kitebe kyanyu, nibeegondeza omu obubi bwabo, babagobeza noobu muba nimulya nabo.

¹⁴Amaiso gaabo gaijwire obusiihani, tibaniha kibi. Batwaliriza abantu abaina emitima etagumire, kandi emitima yabo ekamanyirra omukoijo. Baana bakyenwa!

¹⁵Bakaruga omu muhanda oguterekeriire, baahaba, baatoma omuhanda ogwa Balaamu, mutabani wa Behori, ayagondeze kwetungira ebisembo ebyarugire omu kukora ebitahikire,

¹⁶baitu yacoomerwa habw'ekibi kye. Endogoyi etagamba, ekabaza n'iraka nk'ery'omuntu, yamaraho iraro ly'omurangi ogu.

¹⁷Abantu abo tubeeta maziba agoomere kandi kiho ekirukutwarwa ekiyaga; baahuliirwe omwirima ogukwasire.

¹⁸Obu baba nibabaza ebigambo eby'okwehaahire, batwaliriza omu kwegomba kw'omubiri abantu abakaruga kwecwaho abasiisi.

¹⁹Babanihiza obusinge, kandi kunu bbo, bairu b'engeso mbi; ningira kyona ekisingura omuntu, aba mwiru wakyo.

²⁰Baitu obu bamara kutabuka obubi bw'ensi, habw'okumanya MUKAMA waitu kandi Omujuni Yesu Kristo, bakagaruka kubwetabamu kandi bukabasingura. Enyikara yabo eya hanyuma efooka mbi okukira ey'okubanza.

²¹Kyakubaire kirungi kakuba abantu abo bataramanyire omuhanda ogw'obuhikiriire, okukira kumara kugumanya, bakagurugaho kandi baaleka ebiragiro ebirukwera ebi baahairwe.

²²Kibahikireho nk'orufumo rw'amazima orugamba ruti: “Embwa egarukira ebitanaki byayo”; kandi: “Empunu obu emara kwogebwa, egaruka kwekulingura omu saabu.”