Read Runyoro - rutooro 2Pet 3 Bible Online

2Pet 3 - Runyoro - rutooro bible

2Pet 3

¹Abagonzibwa, enu niyo bbaruha eya kabiri ei mbahandiikiire, kandi omu bbaruha ezi zombi nindengaho kubaijukya n'okusisiimura emitima yanyu ey'amananu.

²Ninyenda mwijuke ebyarangirwe abarangi abahikiriire, hamu n'ebiragiro bya MUKAMA kandi Omujuni ebi mwagambiirwe abakwenda.

³Eky'okubanza, kinu mukyetegereze: omu biro ebya ha mpero, abasekerezi baliija nibasekereza, kandi nibatwalirizibwa okwegomba kw'emibiri yabu,

⁴nibagamba bati: “Akaraganiza kwija, hati araha? Okuruga baisenkuru itwe obu baafiire, ebintu byona biikaire nkooku bikaba biri ensi neehangwa.”

⁵Kandi bakangira kimu Ekyahandiikirwe ekirukugamba ngu: Ira muno iguru likabaho habw'ekigambo kya Ruhanga; kandi ngu: N'ensi ekahangwa yaihwa omu maizi kandi yatebwaho kugabaganiza.

⁶Ekyarugiremu, amaizi ago nugo gaasandaire gahwerekereza ensi ei ekaba eroho omu kasumi ako.

⁷Kandi habw'ekigambo kya Ruhanga eki kyonyini, iguru n'ensi ebiroho hati byahuliirwe omurro, byahwiirwe okuhika ha kiro eky'okucwa omusango n'okuhwerekereza abantu abatatiina Ruhanga.

⁸Abagonzibwa, muteebwa ekigambo kinu ekirukugamba ngu: Hali MUKAMA ekiro kimu kiri nk'emyaka rukumi, kandi emyaka rukumi eri nk'ekiro kimu.

⁹MUKAMA takerererwa okuhikiriza ebi yaraganiize, abantu abamu nkooku bateekereza; baitu inywe nabagumiisiriza, tarukugonza muntu n'omu ahwerekerre, baitu boona beegarukemu.

¹⁰Kandi ekiro kya MUKAMA kiriija nk'omusuma. Obu nubwo iguru lirihwaho n'okuhinda kwingi, n'ebyalihangirwemu biryagibwa omurro, kandi ensi na byona ebigirumu birisiirira.

¹¹Ebintu ebi byona obu biraaba biri by'okuhwaho biti, inywe musemeriire kuba bantu ba mulingo ki? Musemeriire kuba bantu abarukwera kandi abarukutiina Ruhanga omu bwomeezi bwanyu,

¹²mutegeriize kandi nimwegomba ekiro eky'okwija kwa Ruhanga; habwokuba ha kiro eki, iguru liricumikwa omurro lihwerekereziibwe, n'ebyalihangirwemu byagibwe omurro.

¹³Baitu itwe nitutegereza iguru erihyaka n'ensi empyaka nambere abahikiriire baikara, nkooku yaraganiize.

¹⁴Habweki abagonzibwa, ebi nkooku mubyetegeriize, mwekambe nukwo MUKAMA abasange mutaina kabara rundi kamogo, baitu mwina obusinge.

¹⁵Kandi mumanye nkooku tulijunwa okugumiisiriza kwa MUKAMA waitu. Na Paulo, mugenzi waitu omugonzibwa, nukwo yabahandiikiire, naahondera amagezi aga yahairwe.

¹⁶Eki nukwo yakisoboroire ati, nkooku akora omu bbaruha ze zoona. Omuli zo harumu ebintu ebimu ebitarukwetegerezibwa bwango, abasema kandi abaceke ebi bahingisa nkooku bahingisa Ebyahandiikirwe ebindi, bikabarugiramu okuhwerekerra.

¹⁷Habweki inywe abagonzibwa, binu nkooku mwabimanya kara, mwerinde, mutaikara kuhabisibwa ensobi ez'abeemi abo, mukaruga nambere mugumiire.

¹⁸Baitu mweyongere omu mbabazi n'omu kumanya MUKAMA waitu kandi Omujuni Yesu Kristo. Ekitiinisa kibe hali uwe, hati n'ebiro byona. Amiina.