Read Runyoro - rutooro 1Yoh 1 Bible Online

1Yoh 1 - Runyoro - rutooro bible

1Yoh 1

¹Nitubahandiikira ha bya Kigambo ky'obwomeezi ow'akaba aroho kuruga okubanza, ou twahuliireho, ou twarozire n'amaiso gaitu, kandi ou twayetegeriize twamukwataho n'engaro zaitu.

²Obwomeezi obu bukoolekwa, twaburora, tuli bakaiso babwo; kandi na inywe nitubarangirra obwomeezi obu obutahwaho, obukaba buli owa isiitwe, baitu hati butwolekerwe.

³Eki twarozire kandi twahuliire, na inywe nikyo turukubarangirra, nukwo musobole kuteerana na itwe; kandi okuteerana kwaitu kuli omu Isiitwe hamu n'Omwana we Yesu Kristo.

⁴Binu nitubibahandiikira nukwo musobole kusemerererwa kimu.

⁵Ganu nugo makuru aga twahuliire Omwana we naagamba, kandi nugo turukubarangirra tuti: Ruhanga aba musana kandi omuli Uwe tiharumu mwirima naakake.

⁶Kakuba tugamba tuti: Nituteerana nawe, kandi kunu nitugendera omu mwirima, buli nitubiiha ebisuba n'engeso zaitu tiziri z'amazima.

⁷Baitu obu tuba nitugendera omu musana, Uwe nkooku ali musana, buli na itwe tuteeraine hamu, kandi esagama y'Omwana we Yesu etwogyaho buli kibi kyona.

⁸Kakuba tugamba tuti: Titwina kibi, buli nitwebiiha itwenka kandi tuba tutali b'amazima.

⁹Kakuba twatura ebibi byaitu, Ruhanga aba mwesigwa kandi mwinganiza, naija kubituganyira atwogyeho ebitahikire byona.

¹⁰Kakuba tugamba tuti: Titukasiisaga, tuba nitumufoora mubiihi w'ebisuba kandi n'ekigambo kye tikiri omuli itwe.