Read Runyoro - rutooro 1Yoh 2 Bible Online

1Yoh 2 - Runyoro - rutooro bible

1Yoh 2

¹Baana bange, binu nimbibahandiikira nukwo muleke kukora ebibi; baitu omuntu weena obu araakora ekibi, amanye nkooku twina omutonganirizi anyakwikara na Isiitwe, nuwe Yesu Kristo omwinganiza.

²Nuwe ndehwa y'ebibi byaitu, kandi tibiri byaitu byonka, baitu n'eby'ensi yoona.

³Obu turaaba nitukwata ebiragiro bye, nikyo kirukugumya nkooku tumumanyire.

⁴Ogu anyakugamba ati: “Mmumanyire”, kunu tarukukwata biragiro bye, mubiihi w'ebisuba, kandi taina mazima.

⁵Baitu weena anyakuhondera ekigambo kye, ogu nuwe agonzakwo Ruhanga. Aho nuho turukugumiza nkooku tuli omu Ruhanga:

⁶anyakugamba ngu, aikara omu Ruhanga, asemeriire kuraba omu muhanda Kristo ogu yarabiremu.

⁷Abagonzibwa, Ekiragiro ndukubahandiikira tikiri kihyaka, baitu kiragiro kikuru eki mukaba mwina kara. Ekiragiro eki ekikuru niyo nyegesa ei mwahuliire.

⁸Baitu nabwo nimbahandiikira ekiragiro ekihyaka, kandi amazima gaakyo nigazookera omu Kristo n'omuli inywe, habwokuba omwirima nigugenda kuhwaho, kandi omusana ogw'amazima gutandikire kujwa.

⁹Anyakugamba ngu, ali omu musana, kunu naanoba ow'oruganda, ogu aba akyali omu mwirima.

¹⁰Anyakugonza mugenzi we, aikara omu musana, kandi tiharoho ekiramwesiitaza.

¹¹Baitu anyakunoba mugenzi we aba ali omu mwirima; kandi omwirima ogu nugwo agenderamu. Tamanya nambere arukugenda, habwokuba omwirima gumwisire amaiso.

¹²Baana bange, nimbahandiikira habwokuba ebibi byanyu bibaganyirwe habwa Yesu.

¹³Inywe baise-baana, nimbahandiikira habwokuba mumanyire Ogu ayabaireho okuruga kara. Inywe abasigazi, nimbahandiikira habwokuba musingwire Omubi ogu. Na inywe abaana, nimbahandiikira habwokuba Isiitwe nimumumanya.

¹⁴Inywe baise-baana, nimbahandiikira habwokuba mumanyire Ogu ayabaireho okuruga kara. Na inywe abasigazi, nimbahandiikira habwokuba muli b'amaani, ekigambo kya Ruhanga kiikara omuli inywe, kandi musingwire Omubi.

¹⁵Muleke kugonza ensi, noobu byakuba ebintu ebigirumu. Omuntu weena obu agonza ensi, buli aba atarukugonza Isiitwe.

¹⁶Habwokuba byona ebirukusangwa omunsi tibiri bya Isiitwe baitu by'ensi, kandi nibyo binu: okwegomba okubi okw'omubiri, okwegomba okubi okw'amaiso, n'okwenyumiza ha itungo.

¹⁷Ensi na byona ebyegombwamu bihwaho; baitu ogu anyakukora Ruhanga ebi agonza, aikaraho ebiro n'ebiro.

¹⁸Baana bange, akasumi ak'okumalirra kahikire. Mukahurra ngu, arukurwanisa Kristo naija. Na hati abarukurwanisa Kristo baizire baingi; eki nikyo kirukutumanyisa akasumi kandi nkooku kali k'okumalirra.

¹⁹Abantu abo bakaruga omuli itwe, kunu bakaba batali baitu, kakuba babaire baitu, bakwikaire na itwe; baitu bakaturugaho, nukwo kimanywe boona nkooku batali b'ekitebe kyaitu.

²⁰Baitu inywe mukakomwa Ahikiriire Ogu, kandi inywena nimumanya amazima.

²¹Mu kubahandiikira, tindukugenderra kugamba ngu, timumanyire amazima, baitu nimugamanya, kandi nimumanya ebisuba nkooku bitasobora kuruga mu mazima.

²²Nooha arukubiiha ebisuba? Tinuwe ogu arukuhakana Yesu nkooku ali Kristo? Arukurwanisa Kristo, nuwe ogu arukuhakana Ruhanga na Ise mwana.

²³Busaho n'omu anyakwanga Mwana akaikiriza Ise. Ogu anyakwikiriza Mwana, buli aikiriza na Ise.

²⁴Eki mwahuliire okuruga omu kubanza, nikyo mugumye. Eki mwahuliire okuruga kara kakuba mukigumya, obu nubwo muliikara omu Mwana n'omuli Ise.

²⁵Kandi Kristo eki yaturaganiize nikyo kinu: obwomeezi obutahwaho.

²⁶Binu nimbibahandiikira kubahabura hali abo abarukugonza kubahabisa.

²⁷Baitu Mwoyo ogu, Kristo ou yabahaire, aikara omuli inywe, kandi timurukwetaaga muntu ondi weena ow'okubeegesa; habwokuba Mwoyo ou mwahairwe, abeegesa buli kintu. Okwegesa kwe kw'amazima, tikuli kw'ebisuba. Habweki mwikale omu Kristo, nkooku Mwoyo yabeegeseze.

²⁸Hati nu, baana bange, mwikale omuli uwe, nukwo obu alizooka tusangwe tugumire, tuleke kumwehinyaho tukwasirwe ensoni obu aliija.

²⁹Obu muraaba nimumanya Kristo nkooku ahikiriire, nimumanya weena anyakukora ebihikire nkooku azairwe Ruhanga.