Read Runyoro - rutooro 1Yoh 3 Bible Online

1Yoh 3 - Runyoro - rutooro bible

1Yoh 3

¹Murole Isiitwe nkooku yatugondeze, itwe okwetwa baana ba Ruhanga, kandi nukwo tuli. Nikyo ensi etarukutumanyira, habwokuba nawe etamumanye.

²Abagonzibwa, hati tuli baana ba Ruhanga; tikikamanyirwe nkooku tuliba, baitu nitumanya Kristo obu alizooka, nitwija kumusisana habwokuba tulimurora nkooku ali.

³Kandi weena arukumwesiga, ayeyeza, Kristo nkooku yayeziibwe.

⁴Weena anyakukora ekibi, aba n'omusango ogw'okucwa Ebiragiro bya Ruhanga, habwokuba kukora ekibi nukwo kucwa Ebiragiro.

⁵Mumanyire Kristo eki yaiziriire, nukwo kwihaho ebibi, kandi omuli uwe tiharumu kibi.

⁶Busaho n'omu anyakwikara omuli uwe akyakora ekibi; kandi weena anyakukora ekibi buli takamubonaga kandi takamumanyaga.

⁷Baana bange, mutaikiriza muntu n'omu kubahabisa! Ogu anyakukora ebihikire, nawe ahikiriire nka Kristo oku ahikiriire.

⁸Ogu anyakukora ekibi, aba wa sitaani; habwokuba Sitaani akakora ebibi kuruga kara. Ekyaleesire Omwana wa Ruhanga, nukwo kuhwerekereza byona sitaani ebi akora.

⁹Busaho n'omu ayazairwe Ruhanga aikara naakora ebibi ningira obwomeezi bwa Ruhanga bwikara omuli uwe, kandi tasobora kukora ekibi habwokuba akazaarwa Ruhanga.

¹⁰Aho abaana ba Ruhanga n'abaana ba Sitaani nuho bamanyirwa: Weena anyakukora ekitahikire, tali wa Ruhanga kandi ogu atagonza mugenzi we, nawe tali wa Ruhanga.

¹¹Ekigambo eki mwahuliire okuruga kara nikyo kinu: Tugonzangane.

¹²Tuleke kusisana Kaini ow'akaba ali w'Omubi, kandi yaita mugenzi we. Akamwitira ki? Habwokuba ebikorwa bye bikaba biri bibi, baitu eby'owanyina bikaba biri birungi.

¹³Bagenzi bange, kitabahuniriza okurora ensi neebanoba.

¹⁴Itwe tumanyire nkooku twarugire omu rufu, twataaha omu bwomeezi, habwokuba nitugonza bagenzi baitu. Ogu atagira ngonzi, aikara afiire.

¹⁵Weena anyakunoba mugenzi we aba mwisi, kandi nimumanya nkooku hataroho mwisi anyakwina obwomeezi obutahwaho omuli uwe.

¹⁶Aho nuho turukumanyira engonzi nkooku ziri, habwokuba Kristo akahayo obwomeezi bwe habwaitu; na itwe kituhikiriire kuhayo obwomeezi bwaitu habwa bagenzi baitu.

¹⁷Kakuba omuntu aba atungire ebintu by'ensi, kandi akarora mugenzi we aina eki arukwetaaga, akanga kumugirra embabazi, ogu asobora ata kugira ngu, naagonza Ruhanga?

¹⁸Baana bange, okugonza kwaitu kuleke kuba kw'akalimi rundi kwa ha minwa, baitu kuzooke omu bikorwa n'omu mazima.

¹⁹Aho nuho turaamanyira nkooku tuli b'amazima, kandi emitima yaitu nkooku eriteekana omumaiso ga Ruhanga.

²⁰Emitima yaitu noobu etujunaana eta, baitu twikale nitumanya Ruhanga nkooku ali mukuru kukira omutima ebi gurukutujunaana, kandi naamanya ebintu byona.

²¹Abagonzibwa, kakuba emitima yaitu etatucwera musango, buli titwina eky'okutiina omumaiso ga Ruhanga.

²²Kyona eki tumusaba akituha, habwokuba tukwata ebiragiro bye kandi tukora ebi asiima.

²³Kinu nikyo kiragiro kye ekigamba kiti: Kituhikiriire okwikiriza Omwana we Yesu Kristo kandi na itwe okugonzangana, Kristo nkooku yaturagiire.

²⁴Boona abakwata Ebiragiro bya Ruhanga baikara omuli Kristo nawe aikara omuli bo. Mwoyo ou yatuhaire, nuwe atumanyisa Kristo nkooku aikara omuli itwe.