Read Runyoro - rutooro 1Yoh 4 Bible Online

1Yoh 4 - Runyoro - rutooro bible

1Yoh 4

¹Abagonzibwa, muleke kwikiriza buli mwoyo, baitu emyoyo mugyetegereze, nukwo mumanye obu eraaba neeruga hali Ruhanga; habwokuba abarangi baingi ab'ebisuba bararangire omunsi.

²Aho nuho muraamanyira Mwoyo wa Ruhanga: Weena arukurangirra Yesu Kristo nkooku yazairwe omu mubiri, buli aina omwoyo oguruga hali Ruhanga.

³Baitu weena atarukurangirra Yesu, buli taina mwoyo oguruga hali Ruhanga. Ogu nugwo mwoyo gw'ogu arukurwanisa Kristo, ou mwahuliireho nkooku arukwija, kandi ahikire ira omunsi.

⁴Baana bange, inywe muli ba Ruhanga, kandi abarangi abo ab'ebisuba, mubasingwire; habwokuba Mwoyo anyakuli omuli inywe nuwe mukuru okukira oli ayaizire omunsi kurwanisa Kristo.

⁵Bbo b'ensi enu, habwokuba ebi barukugamba by'ensi, kandi ensi ebahuliriza.

⁶Itwe tuli ba Ruhanga. Weena arukumanya Ruhanga atuhuliriza, kandi atali wa Ruhanga tatuhuliriza. Aho nuho tumanyira omwoyo ogw'amazima n'omwoyo ogurukuhabisa.

⁷Abagonzibwa, tugonzangane; habwokuba engonzi ziruga hali Ruhanga. Ogu anyakwina engonzi, aba azairwe Ruhanga kandi amanyire Ruhanga.

⁸Ogu ataina ngonzi tamanya Ruhanga, habwokuba Ruhanga nuwe ngonzi.

⁹Kinu nikyo kyayolekere engonzi za Ruhanga hali itwe: akatuma omunsi Omwana we omu wenka, nukwo atwomeeze.

¹⁰Kandi engonzi ezindukugamba nizo zinu: tukuli kugira ngu niitwe twagondeze Ruhanga, baitu nuwe yatugondeze, nukwo kutuma Omwana we abe ndehwa y'ebibi byaitu.

¹¹Abagonzibwa, Ruhanga obu araaba yatugondeze ati, na itwe kituhikiriire kugonzangana.

¹²Tiharoho muntu araboine Ruhanga; baitu obu tuba nitugonzangana, Ruhanga aikara omuli itwe, kandi engonzi ze zihikirirra kimu omuli itwe.

¹³Aho nuho tumanyira nkooku twikara omu Ruhanga, nawe nkooku aikara omuli itwe habwokuba akatuha Mwoyo we wonyini.

¹⁴Tukarora kandi twagumya nkooku Isiitwe yatumire Omwana we kuba Mujuni w'ensi.

¹⁵Weena anyakwatura Yesu nkooku ali Mwana wa Ruhanga, Ruhanga aikara omuli uwe, nawe aikara omu Ruhanga.

¹⁶Nahabweki, nitumanya kandi nitwikiriza Ruhanga nkooku atugonza. Ruhanga nuwe ngonzi, kandi ogu anyakwikara omu ngonzi, aikara omu Ruhanga na Ruhanga aikara omuli uwe.

¹⁷Ekirukwoleka engonzi nkooku ihikirizibwa omuli itwe nukwo kwikara twina obwesige ha kiro ky'okucwerwa omusango, habwokuba enyikara yaitu omunsi munu, niyo emu n'eya Kristo.

¹⁸Engonzi tiigira butiini. Engonzi z'amazima ibinga obutiini bwona habwokuba anyakutiina, aba naatiina ekifubiro; nukwo kugamba, aba ataina ngonzi ezihikire.

¹⁹Itwe tugonza habwokuba Ruhanga nuwe yabandize kutugonza.

²⁰Kakuba habaho arukugamba ati: “Ningonza Ruhanga”, kandi kunu naanoba mugenzi we, ogu mubiihi w'ebisuba; habwokuba atarukugonza mugenzi we ou arukurora, tasobora kugonza Ruhanga ou atakaroraga.

²¹Kandi kinu nikyo kiragiro Kristo eki yatuhaire ekigamba kiti: Ogu anyakugonza Ruhanga, agonzeege na mugenzi we.