Read Runyoro - rutooro 1Yoh 5 Bible Online

1Yoh 5 - Runyoro - rutooro bible

1Yoh 5

¹Buli muntu anyakwikiriza Yesu nkooku ali Kristo, aba mwana wa Ruhanga; kandi weena anyakugonza Isemwana, agonza n'omwana we.

²Kinu nikyo tumanyiraho nkooku tugonza abaana ba Ruhanga: obu tuba nitugonza Ruhanga kandi nitukwata ebiragiro bye.

³Habwokuba okugonza Ruhanga nukwo kukwata ebiragiro bye. Kandi ebiragiro bye tibirukulemeera.

⁴Weena anyakuzairwe Ruhanga asingura ensi, kandi ekisingura ensi nukwo okwikiriza kwaitu.

⁵Baitu anyakusingura ensi nooha? Tinuwe ogu anyakwikiriza Yesu nkooku ali Mwana wa Ruhanga?

⁶Yesu Kristo akaija naaraba omu maizi ag'okubatizibwa n'omu sagama y'okufa kwe. Ataije omu maizi gonka, baitu akaija omu maizi n'omu sagama.

⁷Kandi Mwoyo nuwe kaiso w'okukigumya, habwokuba Mwoyo nuwe mazima.

⁸Haroho obwakaiso busatu: Mwoyo, amaizi, n'esagama; kandi ebisatu ebi biikirraniza.

⁹Obu turaaba nitwikiriza obwakaiso bwa bantu, obwakaiso bwa Ruhanga nibukiraho obukuru; kandi obwakaiso bwa Ruhanga nubwo bunu: akajuliirra Omwana we.

¹⁰Weena anyakwikiriza Omwana wa Ruhanga, aba aina obwakaiso omu mutima gwe. Ogu atarukwikiriza, afoora Ruhanga mubiihi w'ebisuba, habwokuba taikiriza bwakaiso Ruhanga obu yahaire ha Mwana we.

¹¹Kandi obwakaiso nubwo bunu: Ruhanga akatuha obwomeezi obutahwaho, kandi obwomeezi obu buli omu Mwana we.

¹²Anyakwina Mwana buli aina obwomeezi; baitu ataina Mwana wa Ruhanga taina n'obwomeezi obu.

¹³Binu nimbihandiikira inywe abarukwikiriza Omwana wa Ruhanga, nukwo mumanye nkooku mwina obwomeezi obutahwaho.

¹⁴Kandi bunu nubwo bwesige obu tumwinaho: kakuba tusaba ekintu kyona nkooku asiima, atuhurra.

¹⁵Kandi obu turaaba nitumanya nkooku atuhurra omu kyona eki tumusaba, nitumanya nkooku tuli b'okutunga ebi tumusabire.

¹⁶Kakuba omuntu weena arora mugenzi we naakora ekibi ekitarukurugwamu orufu, amusabire, nukwo Ruhanga amuhe obwomeezi. Eki nikikwata hali abo abatakora kibi ekirukurugwamu rufu. Haroho ekibi ekirukwita; tindukugamba eki nikyo omuntu asemeriire kusaba Ruhanga akimujune.

¹⁷Okusobya kwona kiba kibi, baitu haroho ekibi ekitali ky'okwita.

¹⁸Tumanyire weena ayazairwe Ruhanga nkooku atakyakora kibi; baitu Kristo, Omwana wa Ruhanga, amulinda kandi Omubi tasobora kumukwataho.

¹⁹Tumanyire nkooku tuli ba Ruhanga, kandi ensi yoona nkooku erukulemwa Omubi.

²⁰Kandi nitumanya Omwana wa Ruhanga nkooku yaizire, yatuha okwetegereza nukwo tumanye Ruhanga owamazima; kandi ow'amazima; Ogu nuwe twikaramu habwokuba tuli omu Mwana we Yesu Kristo. Ogu nuwe Ruhanga ow'amazima, kandi nuwe bwomeezi obutahwaho.

²¹Baana bange, mwerinde embandwa.