Read Runyoro - rutooro Bac 1 Bible Online

Bac 1 - Runyoro - rutooro bible

Bac 1

¹Yoswa obuyamazire kufa, Abaisirairi baakaguza MUKAMA bati: “Nibaha abalitwebembera okurumba Abakanaani?”

²MUKAMA yagarukamu ati: “Abaayuda nubo barayebembera; ensi ngibahaire.”

³Abaayuda bagambira bagenzi baabo aba Simyoni bati: “Mwije tugende hamu omunsi enyakutuhairwe, turwanise Abakanaani; na itwe tuligenda na inywe omunsi ei muhairwe.” Nubwo aba Simyoni bagenda naaba Yuda.

⁴Aba Yuda bagenda kurwana, kandi MUKAMA yabasinguza Abakanaani n'Abaperezi; Abaisirairi baasingura abantu abarukuhika omutwaro gumu, bali omukiikaro Bezeki.

⁵Adoni-bezeki, baamusanga Bezeki, baamurwanisa, baasingura Abanyakanaani n'Abaperezi.

⁶Adoni-bezeki yairuka; baitu baamuhondera baamukwata baamutemaho ebyara ebisaija eby'emikono n'eby'amaguru.

⁷Adoni-bezeki yagamba ati: “Abakama ensanju abaatemerweho ebyara ebisaija eby'emikono n'eby'amaguru, baikaraga nibakoma oburagalika obwa ha nsi y'emeeza yange; eki nabakozire, Ruhanga nikyo ankozire.” Baamuleeta Yerusaalemu, oku nuho yagwire.

⁸Abasaija aba Yuda baaseesira Yerusaalemu, baaruhamba, baitu abantu bamwo, orubuga baarucumika omurro.

⁹Obubarugire aho, abasaija ba Yuda baagenda kurwanisa Abanyakanaani abaikaraga omunsi ey'ensozi Negebbu n'omukyeya.

¹⁰Abantu ba Yuda baagenda kurwanisa Abanyakanaani abandi abaikaraga Hebburoni omukasumi ako, eyayetwaga Kiryasi-araba; baasingura abantu ab'orunganda orwa Sesayi, ab'oruganda orwa Ahimani n'orwa Talimayi. Abasaija ba Yuda obubaarugire aho, baasesira abantu abaikaraga omurubuga Debiri.

¹¹Ibara ly'orubuga Debiri, kara rwayetwaga Kiryasi-Seferi.

¹²Kalebbu yagamba ati: “Omuntu araarwanisa orubuga Kiryasi-Seferi akarunyaga, ndaamuha muhara wange Akisa amuswere.”

¹³Osineeri mutabani wa Kenazi muto wa Kalebbu, yarunyaga. Kalebbu nukwo kumuha muhara we Akisa amuswere.

¹⁴Ha kiro eki Akisa yagabukiireho omwa Osineeri, yatererra iba asabe isezaara ekibanja. Akaba yakaikarra ha ndogoyi, yagisimburukaho, Kalebbu ise yamukaguza ati: “Nooyenda ki?”

¹⁵Omwisiki yamugarukamu ati: “Nkusaba ompe ekisembo; nkooku ongabire omunsi eyomere, ompe amaziba g'amaizi.” Kalebbu yaha muhara we amaziba agakaba gali eruguru ha nsozi n'aga ha ifo y'ensozi.

¹⁶Baijukuru b'Omukeeni isezaara Musa, baaramaga n'aba Yuda, baaruga omurubuga Yeriko orukaba rurumu emikindo baagenda omwirungu erya Yuda erinyakuli Negebbu, eherraine Arada, baikara n'Abamaleki.

¹⁷Abantu ba Yuda bakagenda n'abantu ba Simyoni, abo bombi baasingura Abaakanaani abaikaraga omurubuga Zefasi, kandi n'orubuga baarusiisira kimu. Okuruga obu orubuga rwayetwa Horuma.

¹⁸Aba Yuda bagaruka basingura Gaaza, basingura Asikeroni na Ekuroni, n'ensi eziheerraine.

¹⁹MUKAMA akakoonyera aba Yuda, batwara ensi ya bantu ey'ensozi, baitu batasobole kubinga abantu ab'omukyeya, habwokuba abantu abo bakaba banyina ebigaali eby'ebyoma.

²⁰Ensi Hebburoni baagiha Kalebbu, Musa nkooku yagambire. Yabingamu batabani ba Anaki basatu.

²¹Baitu aba Benyamiini batababinge, Abayebusi abaikaraga Yerusaalemu bakaikara hamu n'okuhika hati.

²²Abantu ab'oruganda rwa Yosefu baagenda kuramagira orubuga Beseri; omukasumi ako rwayetwaga Luzi, MUKAMA akabakonyera.

²³Ab'enju ya Yosefu baatuma abantu batate orubuga Beseri.

²⁴Abantu abo entasi, bakarora omusaija naaruga omurubuga, baamugamba bati: “Tukwesengeriize, turagirre omuhanda ogurukutaaha omurubuga.”

²⁵Abantu boona ab'omurubuga, baabaisa empirima, ou bataraisire, nuwe omusaija ogu n'ab'omuka ye.

²⁶Hanyuma, omusaija yagenda omunsi y'Abahiiti, yayombekayo orubuga, yaruruka ibara Luzi, na hati nukwo rwetwa.

²⁷Aba Manaase batabinge abantu abaasangirwe omurubuga Beesi-Saani n'ebyaro byarwo, abaasangirwe omumbuga: Taanaki, Dora, Iburyamu, Megido n'ebyaro byazo, Abakanaani bakongera kwikara omunsi egi.

²⁸Abaisirairi obu baafookere b'amaani baafoora Abakanaani bantu ab'okubakorra emirimo, nabo batababinge.

²⁹Abakanaani abaikaraga omurubuga Gezere, Abefuraimu batababinge baitu bakaikaramu na bo.

³⁰Aba Zebbuluni batabinge abantu abaikaraga omurubuga Naharali na Kitironi; Abakanaani bakongera kwikaramu na bo, baafooka bantu ab'okubakorra emirimo.

³¹Abaaseri batabinge abantu abaikaraga omumbuga Ako na Sidoni, Ahalaabu, Akizibu, Heliba, Afeki na Rrehobbu;

³²baitu Abaaseri bo bakaikara omu Bakanaani abasi b'ensi, habwokuba batababingemu.

³³Aba Nafutaali batabinge abasi b'ensi Besi-semesi, rundi abasi aba Besi-anasi, baikara omu Bakanaani abasi b'ensi egi; nabo abasi b'ensi Besi-semesi n'aba Besi-anasi bafooka bantu ab'okubakorra emirimo.

³⁴Abamooli bakagomeza aba Daani enyuma omunsi y'ensozi, batabaikirize kusirimuka omu kyeya.

³⁵Abamooli bayongera kwikara Aiyaroni, Saalibimu na ha rusozi Heresi, baitu ab'Efuraimu n'aba Manaase baikara nibabalema, nibabakorra emirimo.

³⁶Omutaano gw'Abamooli gwarugaga Sera guraba omwihongo Akurabbimu gutemba eruguru.