Read Runyoro - rutooro Bac 10 Bible Online

Bac 10 - Runyoro - rutooro bible

Bac 10

¹Abimereki obu yamazire kufa, Tora mutabani wa Puha kandi mwijukuru wa Dodo, ow'oruganda rwa Isakara yaimuka kujuna Isirairi; yaikaraga Samiri omunsi ey'ensozi eya Efuraimu.

²Akacwera Isirairi emisango okumara emyaka abiri n'esatu. Hanyuma yafa kandi yaziikwa Samiri.

³Tora obuyarugireho, haija Yairi Omunyagiryadi, ayacweriire Isirairi emisango okumara emyaka abiri n'ebiri.

⁴Akazaara abaana aboojo makumi asatu, abaatembaga enkaina makumi asatu, kandi bakaba baina embuga makumi asatu ezeetwa Havosi Yairi na hati hoona, embuga ezi, ziri omunsi Giryadi.

⁵Yairi yafa kandi yaziikwa omukiikaro Kamoni.

⁶Abantu ba Isirairi bakongera baakora ekibi omumaiso ga MUKAMA nibaramya abacwezi ab'ensi Asiriya n'aba Sidoni, n'aba Mowabbu, n'ab'Abamooni n'embandwa z'ab'Abafirisiti, baasiga MUKAMA baayanga kumuramya.

⁷Na uwe nukwo kubabiihirirwa, yabalekera Abafirisiti n'Abamooni baabasingule.

⁸Bakamara emyaka ikumi na munaana nibabajonjooza, kandi nibahiiganiza Abaisirairi boona abakaba bali obuseeri bwa Yorudaani omunsi ey'Abamooli enyakuli Giryadi.

⁹Abamooni baayambuka ekyambu Yorudaani kandi barwanisa ab'oruganda, rwa Yuda, orwa Benyamini n'orw'Efuraimu. Aho Isirairi nukwo kuba omu muhito ogutagambwa.

¹⁰Nubwo Abaisirairi baataagiire MUKAMA nibagamba bati: “Tukakusiisira, habwokuba tukaleka iwe Ruhanga waitu, twaramya Baali.”

¹¹MUKAMA yabagarukamu ati: “Ntabajune nabaiha omu Banyamisiri kandi nabaiha omu Bamooli nabajuna Abamooni n'Abafirisiti,

¹²Abasidoni, Abamaleki n'Abamahoni, abakaba babajonjoize? Mukantaagira nabajuna;

¹³baitu nabwo mukandugaho mwaramya embandwa; Leero hati tindukwija kwongera kubajuna.

¹⁴Embandwa ezimwayekomiire genda nizo mutaagire, obumuraabaga omukabi, nizo zibajune.”

¹⁵Abantu ba Isirairi baagambira MUKAMA bati: “Tukasiisa; tukole kyona eki orukwenda; kyonka tukwesengeriize, kiro kinu otujune.”

¹⁶Okuruga obu, baafuruka abacwezi ab'amahanga aba bakaba baina, baahereza MUKAMA; kandi MUKAMA na uwe enaku ezi baaboine, ikamusaaliza.

¹⁷Nubwo Abamooni baayesirwe kuramaga, baateera orukande Giryadi; kandi abantu ba Isirairi baayesorooza na bo baateera orukande Mizipa.

¹⁸Abakuru n'abantu aba Giryadi baakaguzangana bati: “Nooha araabanza kurwana n'Abamooni? Ogu araabanza nuwe araaba mukuru ow'okurolerra abantu ba Giryadi boona.”