Read Runyoro - rutooro Bac 11 Bible Online

Bac 11 - Runyoro - rutooro bible

Bac 11

¹Omu kasumi ako, Yefusa Omunyagiryadi, akaba ali murwani emanzi, baitu akaba ali mutabani w'omukazi malaaya. Ise Yefusa nuwe Giryadi.

²Giryadi akazaara abaana na mukazi we; batabani b'omukazi ogu obu baakuzire, baabinga Yefusa, nibamugambira bati: “Iwe toligwetwa omuka ya isiitwe; habwokuba oli mwana w'omukazi ondi.”

³Yefusa nukwo kwirukaho bagenzi be, yaikara omunsi ya Tobu; yateerana n'abantu abatarukugasa abaagendaga na uwe.

⁴Akasumi obukaahingwireho, Abamooni bakarwanisa Abaisirairi.

⁵Abamooni obu baarwanisize Abaisirairi, abakuru b'ensi eya Giryadi baagenda omunsi Tobu, baatabarrayo Yefusa.

⁶Baamugambira bati: “Ija otwebembere nukwo tusobole kurwanisa Abamooni.”

⁷Yefusa yabakaguza ati: “Mutaanobe mwambinga omuka ya ise nyowe? Hati obu mwakabona muli omu kabi nubwo mwanyizira?”

⁸Bakuru b'ensi baamugarukamu bati: “Hati ekitulesiire hali iwe, nitwenda tukutwale orwanise Abamooni, nukwo obe mwebembezi w'abantu boona aba Giryadi.”

⁹Yefusa nubwo yagambiire bakuru ba Giryadi ati: “Obu murangarra omuka kurwana n'Abamooni, kandi MUKAMA akabampa kubasingura, nubwo ndiba mukuru wanyu.”

¹⁰Abakuru ba Giryadi baamugarukamu bati: “MUKAMA nuwe abe kaiso hagati yaitu na iwe; mazima kwo nkooku ogambire, nukwo tulikora.”

¹¹Yefusa nukwo kugenda n'abakuru ba Giryadi, abantu baamufoora mukuru kandi mwebembezi ow'okubarolerra; Yefusa obu akaba ali omukiikaro Mizipa, ebigambo bye byona yabigambira MUKAMA.

¹²Nubwo Yefusa yatumire abakwenda hali omukama w'Abamooni naamukaguza ati: “Ontuzire ki iwe kunyizira kurwanisa ensi yange?”

¹³Omukama w'Abamooni yagarukamu abakwenda ba Yefusa ati: “Habwokuba Abaisirairi obubakaba nibaruga Misiri, bakanyaga ensi yange, okurugirra Arunooni okugarukira Yabboki na Yorudaani; hati nu, ogingarurre hataroho mpaka.”

¹⁴Yefusa yayongera yatuma abakwenda hali omukama w'Abamooni,

¹⁵baamugambira bati: “Yefusa agambire ati: Abaisirairi batanyage ensi ya Mowabbu, kandi batanyage ensi y'Abamooni,

¹⁶baitu obu baarugaga Misiri bakaraba omwirungu, baahika ha nyanja Eyebitoogo, kandi baahika Kadesi.

¹⁷Isirairi nubwo yatumire abakwenda hali omukama wa Edomu naagamba ati: ‘Tukwesengeriize, twikirize turabe omunsi yawe;’ baitu omukama wa Edomu, eki atakihuliirize. Kandi baatumaho n'omukama owa Mowabbu, baitu na uwe ataikirize. Abaisirairi nukwo kwikara Kadesi.

¹⁸Nubwo baakwasire ogw'irungu baagenda nibehinguliriza ensi ya Edomu n'ensi eya Mowabbu, baahika harubaju orw'ensi eya Mowabbu, orwa Burugaizooba; baateera orukande ha rubaju orwa nseeri orw'ekyambu Aranooni baitu ensi Mowabbu batagitaahe; habwokuba Arunooni nugwo gukaba guli mutaano gwa Mowabbu.

¹⁹Abaisirairi nubwo baatumire abakwenda hali Sihoni omukama w'Abamooli; omukama wa Hesiboni, nibagamba bati: ‘Tukwesengeriize, otwikirize turabe omunsi yawe, tugende omunsi yaitu.’

²⁰Baitu Sihoni na uwe ataikirize Abaisirairi kuraba omunsi ye; nukwo kusorooza hamu abantu be, baateera orukande omukiikaro Yahazi, yarwanisa Abaisirairi.

²¹MUKAMA Ruhanga owa Isirairi, yaha abantu be Abaisirairi kusingura Sihoni n'abantube boona, Abaisirairi nukwo baayemazire bati ensi yoona ey'Abamooli baikaramuga.

²²Baayemara ensi ey'Abamooli okuruga ha kyambu Arunooni okuhika ha kyambu Yabboki, kandi okuruga hairungu okuhika ha kyambu Yorudaani.

²³Habweki, MUKAMA Ruhanga ow'Abaisirairi akabinga Abamooli bahigiza abantu be; iwe noogonza kugyegarurra?

²⁴Tosemeriire kutunga ebintu Kemosi embandwa yanyu ebi ebaha kutunga? Baitu ebi byona MUKAMA Ruhanga waitu ebiyatunyagiire, nibyo turaatunga.

²⁵Hati iwe nookira Baraki mutabani wa Zipora omukama wa Mowabbu? Aralengereho kwendereza Abaisirairi, rundi kubarwanisa?

²⁶Abaisirairi baakaba kwikara Hesiboni n'omumbuga zarwo entoito, Aroheri n'omumbuga zarwo entoito, n'omumbuga zoona eza hamikungu eya Arunooni, emyaka ehikire bisatu, akasumi ako koona, kiki ekyakutangire kuzeegarurra?

²⁷Habweki nyowe timbasobiize, kandi ninywe mukozire kubi kundwanisa; MUKAMA Omucwi w'emisango, kiro kinu acweremu abantu ba Isirairi n'abantu b'Amooni.”

²⁸Baitu omukama w'Abamooni, atafeeho ebigambo Yefusa yamutumireho.

²⁹Nubwo Mwoyo wa MUKAMA yaizire hali Yefusa, Yefusa yaraba Giryadi na Manaase, yairrayo yahika Mizipa eya Giryadi. Obuyarugire Mizipa eya Giryadi, yayeyongera omumaiso yahikaho Abamooni.

³⁰Yefusa akaraganiza MUKAMA naagamba ati: “Obwolimpa kusingura Abamooni,

³¹obundiba ningaruka mazire kubasingura, omuntu wena ow'aliruga omunju yange akaija kuntangirra ogu aliba wa MUKAMA, ndimumuhongera abe kihongwa eky'okwokya.”

³²Yefusa nubwo yayambukire ekyambu, yaseesira Abamooni abarwanise; MUKAMA yabamuha kubasingura.

³³Yabateera okurugirra Aroheri okuhika haihi na Minisi embuga makumi abiri zoona n'okuhikira kimu Aberi-keramimu, yabaita muno. Abaisirairi nukwo baajemwire bati Abamooni.

³⁴Kandi Yefusa yaija Mizipa omuka ye, muhara we yaturuka kumutangirra, nazina abantu nibatera ebidongo, nuwe akaba ali mwana we wenka; akaba ataina mwana ondi wena omwojo rundi omwisiki.

³⁵Yefusa obuyamurozire, yatemura engoye ze kandi yagamba ati: “Nsaalirwe mwisiki wange! Wansaaliza muno kandi wandeetera enaku nyingi, habwokuba nyatuliire Ruhanga kandi tinsobora kuhindura ekinaraganiize.”

³⁶Omwisiki yagambira ise ati: “Taata, obworaaba oyatuliire Ruhanga, onkole kyona ekinyakurugire omukwanwa kawe; habwokuba MUKAMA akuholiire enzigu hali abanyanzigwa baawe, Abamooni.”

³⁷Kandi yagambira ise ati: “Nkorra ekintu kimu kinu; ondeke mmale ameezi abiri ngende hansozi eruguru, ndubaterubate, ndirirre obwisiki bwange, nyowe n'ekitebe ky'abaisiki enganjani zange.”

³⁸Ise yagamba ati: “Genda.” Yamwohereza agende kumara ameezi abiri; omwisiki yagenda n'enganjani ze, balirirre obwisiki bwe bali hansozi eruguru.

³⁹Ameezi abiri obugaahoireho, yagaruka hali ise, ise yamukora nkooku yaraganiize.

⁴⁰Omwisiki akaba atakamanyire musaija. Omwihanga lya Isirairi, ekafooka ngeso; abaisiki boona Abaisirairi buli mwaka, bagenda kulirirra muhara wa Yefusa Omunyagiryadi, bamarayo ebiro bbina.