Read Runyoro - rutooro Bac 12 Bible Online

Bac 12 - Runyoro - rutooro bible

Bac 12

¹Abantu ba Efuraimu bakazinisa amahe gaabo baayambuka, baagenda Zafoni, baakaguza Yefusa bati: “Kiki ekya kwambukisize okaija kurwanisa Abamooni, otatwesire tukagenda na iwe? Enju yawe nitwija kugyokya, na iwe tukwokezeemu.”

²Yefusa yabagarukamu ati: “Nyowe n'abantu bange, tukatunga empaka ez'amaani hamu n'Abamooni; kandi obu nabeesire, mutatujunire.

³Obunarozire nkooku mutarukusobora kubanjuna, nayehwamu nayambuka nagenda kubarwanisa, kandi MUKAMA yabampa nabasingura; hati, inywe kiki eki baleesire kundwanisa?”

⁴Aho Yefusa nukwo kusorooza abasaija boona aba Giryadi, yarwana na Abefuraimu; abasaija aba Giryadi baasingura Abefuraimu. Habwokuba baikaraga nibabagamba bati: “Inywe Abagiryadi, abanyakuli hagati ya Efuraimu na Manaase mukairuka mwarugaho Efuraimu.”

⁵Abagiryadi baikaraga ha myogo ya Yorudaani, nukwo batange Abefuraimu kwambuka. Obuhaabahoga omu habantu abairukireho Efuraimu arukugamba ati: “Mpigiza ndabeho.” Abagiryadi baamukaguzaaga bati: “Iwe oli muntu wa Efuraimu?” Obu yagarukamuga ati: “Nangwa”

⁶Bamugambaga bati: “Gamba oti Sibbolesi”. Uwe agamba ati: Sibolesi, habw'okulemwa kukyatura kurungi; aho, nuho bamukwatiraga bamwita, ha myogo ya Yorudaani. Omu kasumi ako, hakafa Abefuraimu emitwaro ena n'enkumi ibiri.

⁷Yefusa akebembera Abaisirairi okumara emyaka mukaaga. Hanyuma Yefusa Omugiryadi ogu, akafa, yaziikwa omurubuga rumu omunsi Giryadi.

⁸Yefusa obuyarugireho Ibuzani owa Beterehemu yacwera Abaisirairi emisango.

⁹Akazaara abaana aboojo makumi asatu; n'abaisiki makumi asatu; bahara be amakumi asatu abo, akabasweza omu bantu abatali b'oruganda rwe, kandi yaleeta abaisiki amakumi asatu aba y'aihire aheeru yabaswererra batabani be. Akebembera Isirairi okumara emyaka musanju.

¹⁰Hanyuma yafa, yaziikwa Beterehemu.

¹¹Ibuzani obuyarugireho, Eroni Omuzeburuni yayebembera Abaisirairi; akabebembera naacwa emisango okumara emyaka ikumi.

¹²Eroni Omuzeburuni na uwe yafa, yaziikwa Aiyaroni, omunsi ya Zebburuni.

¹³Eroni obu yarugireho, Abudoni mutabani wa Hireri Omupirasoni yayebembera Abaisirairi.

¹⁴Akazaara abaana aboojo amakumi ana, kandi akatunga abaijukuru asatu, abaatembaga enkaina nsanju; ogu akebembera Abaisirairi naacwa emisango okumara emyaka munaana.

¹⁵Hanyuma Abudoni mutabani wa Hireri ogu na uwe yafa, yaziikwa Pirasoni omunsi ya Efuraimu, ensi ey'ensozi eya Abameleki.