Read Runyoro - rutooro Bac 13 Bible Online

Bac 13 - Runyoro - rutooro bible

Bac 13

¹Kandi Abaisirairi bakagaruka baakora ebibi omumaiso ga MUKAMA, na uwe nukwo kubalekera Abafirisiti, bakabalema kumara emyaka amakumi ana.

²Hakaba haroho omusaija ow'omu ruganda rwa Daani, ayaikaraga omu rubuga Zoora, ibara lye nuwe Manoha; mukazi we akaba atazaire mwana n'omu.

³Malaika wa MUKAMA akabonekera omukazi ogu yamugambira ati: “Oba ngumba, tokazaaraga mwana; baitu hati, noija kutwara enda, ozaale omwana w'obwojo.

⁴Habweki, oyegendereze kutanywa amaarwa rundi ekyokunywa ekindi eky'amaani, kandi otalirya ekintu ekirukuzira;

⁵habwokuba noija kutwara enda, ozaale omwana w'obwojo. Omwana ogu, isoke lye litalimwibwa, habwokuba okuruga ha kuzaarwa kwe, aliba Munaziri, ahongiirwe Ruhanga; nuwe alibanza kujuna Abaisirairi, abaiheho Abafirisiti.”

⁶Omukazi nubwo yaizire yagambira iba ati: “Mpikirwehoga omuntu wa Ruhanga amaiso ge nigatiinisa muno; nigazooka nk'ag'amalaika wa Ruhanga. Timmukagwize nambere arugire, kandi tangambiire ibara lye;

⁷baitu agambiire ati: ‘Noija kutwara enda, ozaale omwana w'obwojo, habweki, otanywa amaarwa rundi ekyokunywa eky'amaani, kandi otalirya ekintu ekirukuzira, habwokuba omwana ogu, aliba Munaziri ahongiirwe Ruhanga okuruga ha kiro eky'okuzarwa kuhikya eky'okufa kwe.’ ”

⁸Manoha nubwo yayesengeriize MUKAMA naagamba ati: “Ai MUKAMA nkwesengeriize, omuntu wa Ruhanga ou watumire agaruke atusoborre ekitulikora omwana ogu arukwija kuzaarwa.”

⁹Manoha ekiyasabire Ruhanga akakimuha, malaika wa Ruhanga yahikaho omukazi ogu aikaliire omumusiri; baitu Manoha, akaba atali na mukazi we.

¹⁰Omukazi obuyaboine malaika, yairuka bwango, yagambira iba ati: “Weewe, omusaija ayampikireho kiro kiri, ngunu agarukire yambonekera.”

¹¹Manoha yaimuka, yakurata mukazi we, yahikaho omusaija yamukaguza ati: “Niiwe omusaija ayabalize n'omukazi onu?” Yamugarukamu ati: “Ninyowe.”

¹²Manoha yakaguza omusaija ati: “Eki ogambire, obukirihikirra, obwomeezi bw'omwojo ogu, buliba bwa mulingo ki? Kandi alikora ki?”

¹³Malaika wa MUKAMA yagarukamu Manoha ati: “Mukazi wawe ateho omutima okuhikiriza ebi namugambiire.

¹⁴Atalirya ekintu ekirukuruga omu muzabbibbu, atalinywa amarwa rundi ekyokunywa eky'amaani, atalirya kyona ekirukuzirwa. Ahikirize byona ebinamugambire.”

¹⁵Manoha akaba atamanyire omusaija ogu nkooku ali malaika wa MUKAMA, nukwo kumugamba ati: “Nkwesengeriize, leka kugenda bwango oti, leka tukucumbire akabuzi.”

¹⁶Malaika wa MUKAMA yagarukamu Manoha ati: “Noobu ndaikara hanu, tindukwija kulya, obworaaba noogonza, teekaniza ekihongwa okyokeze MUKAMA.”

¹⁷Manoha yakaguza malaika wa MUKAMA ati: “Ibara lyawe niiwe oha? Habwokuba ebyogambire obubirihikirra, twakugondeze kukunyumiza.”

¹⁸Malaika wa MUKAMA yamugarukamu ati: “Ibara lyange noolikaguliza ki? Tosobora kulyetegereza.”

¹⁹Nubwo Manoha yakwata embuzi n'ekihongwa eky'ebyokulya, yakihongera MUKAMA ha mwandara, MUKAMA ogu anyakukora ebyamahano.

²⁰Baitu omurro obu gwamatukire niguruga ha itambiro, Manoha na mukazi we baaroora malaika wa MUKAMA naagugenderamu naatemba omwiguru, nukwo kugwa hansi, bajuumaire.

²¹Okuruga obu, malaika wa MUKAMA atongere kubonekera Manoha na Mukazi we, nukwo kumanya omusaija oli nkooku yabaire malaika wa MUKAMA.

²²Nukwo Manoha kugambira mukaziwe ati: “Mazima kwo nitwija kufa, habwokuba tuboine Ruhanga.”

²³Mukazi we yamugarukamu ati: “MUKAMA obuyaakubaire agenderiire kutwita, ebyonzira byaitu ebitumuhongire tiyaakubiikiriize, binu byona tiyaakubitwolekere, kandi tiyaakutugambiire ebyatugambiire.”

²⁴Omukazi akazaara omwana w'obwojo yamuruka ibara Samusoni; omwana ogu yakura, MUKAMA yamuha omugisa.

²⁵Omwoyo wa MUKAMA yatandika kumukozesa eby'amaani omu rukande rwa Daani, hagati ya Zora na Esitaholi.