Read Runyoro - rutooro Bac 14 Bible Online

Bac 14 - Runyoro - rutooro bible

Bac 14

¹Kiro kimu Samusoni akagenda Timuna, yarorayo omu ha bahara b'Abafirisiti.

²Nubwo yaizire yagambira ise na nyina ati: “Timuna, mboineyo omwisiki, omu ha bahara b'Abafirisiti; omwisiki ogu, nimbasaba mumunswererre.”

³Baitu ise na nyina baamugarukamu bati: “Omu bantu ab'oruganda rwawe, rundi omu bantu baitu boona, obuzirwemu omukazi, nikyo orukugendera kuswera omukazi omu Bafirisiti abatasazirwe?” Samusoni yagarukamu ise ati: “Nkwesengeriize, onswererre omwisiki ogu; habwokuba nimmugonza muno.”

⁴Ise na nyina, bakaba batarukumanya eki nkooku kikaba nikiruga hali MUKAMA; habwokuba MUKAMA akaba naaserra akaanya ak'okurwanisizaaho Abafirisiti. Habwokuba omu kasumi ako, Abafirisiti nubo baalemaga Abaisirairi.

⁵Nubwo Samusoni yagenda Timuna, hamu na ise na nyina, yahika ha misiri ey'emizabbibbu eya Timuna. Aho ensigazi y'entale yamugurrumira;

⁶Mwoyo wa MUKAMA yamwijaho n'amaani, entale egi nukwo kugitaagataagura nkooku omuntu ataagataagura akabuzi; kandi kunu akaba atakwasire kantu. Baitu ise na nyina, atabagambire ekyakaba akozire.

⁷Nubwo yagenzire yabaza n'omukazi; Samusoni yagonza muno omukazi ogu.

⁸Obuhaahingwireho akasumi, Samusoni yagarukayo kumuswera; yakubuutuka arole omutumbi gw'entale eri eyakaba aisire, eky'amahano, kwija kurora omutumbi ogu, gwombekerwemu omuzinga gw'enjoki kandi gurumu n'obwoki.

⁹Yatahamu obwoki, yagenda naalya, obuyagarukire hali ise na nyina, nabo yabahaho baalya, kyonka atabagambire obwoki obu nkooku abwihire omumutumbi gw'entale.

¹⁰Ise Samusoni yagenda nambere hakaba hali omwisiki, oku Samusoni nuho yakoliire obugenyi, engeso y'abasigazi nkooku ekaba eri.

¹¹Baitu abantu ab'ekiikaro eki, habwokuba bakaba nibamutiina, nukwo kukoma abasigazi amakumi asatu baikale na uwe.

¹²Samusoni yabagambira ati: “Kambakoikeze ekikoikyo, ndole obumuraasobora kukiita n'okumanyira kimu amakuru gaakyo omu mwanya ogw'ebiro musanju, obugenyi ebiburaamara. Obumuraakiita, ndaabaha eby'okujwara ebya kitaani makumi asatu, n'eby'okujwara ebirungi makumi asatu.

¹³Baitu obukirabalema, na inywe murampa eby'okujwara ebya kitaani makumi asatu, n'eby'okujwara ebirungi makumi asatu.” Baamugarukamu bati: “Kikoikye tukihurre.”

¹⁴Yabakoikiza ati: “Kanena akarugwamu eky'okulya Kirimaani, akarugwamu ekirukunulirra” Omumwanya ogw'ebiro bisatu, baalemwa kumugambira amakuru ag'ekikoikyo eki.

¹⁵Ha kiro ekya kana, baagambira muka Samusoni bati: “Soonasoona baro, atugambire amakuru ag'ekikoikyo eki, obwotamusonasoone, nitwija kukwokeza omunju ya sso. Nikyo mwatwetiire kwija hanu kutunyagaho ebyaitu?”

¹⁶Muka Samusoni nukwo kutandika kurra omumaiso ga iba naagamba ati: “Nyowe mau okannoba, tongonza; okakoikiza ab'owaitu ekikoikyo, baitu otangambire amakuru gaakyo. Samusoni yagarukamu mukazi we ati: Eki tinkakigambiraga ise nyowe na nyina nyowe, kandi ndaakigambira iwe?”

¹⁷Omukazi yaikara naalirirra iba, okumara ebiro musanju, obugenyi ebi bwamazire; ha kiro ekya musanju, iba yamugambira, habwokuba omukazi akamutamu omunwa. Omukazi nukwo kugenda yakigambira ab'owabo.

¹⁸Ha kiro ekya musanju, izooba litakagwiire, abantu ab'omurubuga ab'owaabu omukazi we, baakaguza Samusoni bati: “Kiki ekinyakunulirra kukira obwoki bw'enjoki? Kandi kiki ekigira amaani okukira entale?” Samusoni yabagambira ati: “Kakuba mutaragobeze na mukazi wange, ekikoikyo kyange timwakusoboire kukiita.”

¹⁹Mwoyo wa MUKAMA ow'amaani yamwijaho, nukwo kugenda Asikeroni omurubuga, yaitamu abasaija amakumi asatu, yabanyagaho eby'okujwara byabo, yabihereza abo abaisire ekikoikyo. Yagaruka omuka ya ise, ekiniga kiraaliire kumwita.

²⁰Kandi muka Samusoni, baamusweza munywani wa Samusoni kimurangira buko.