Read Runyoro - rutooro Bac 15 Bible Online

Bac 15 - Runyoro - rutooro bible

Bac 15

¹Obuhaahingwireho akasumi ha igesa ly'engano, Samusoni yakwata ekyana ky'embuzi yagenda kubungira mukazi we, yagambira isezaara ati: “Ningonza kugenda omukisiika kya mukazi wange.” Baitu isezaara ataikirize Samusoni kutaaha omukisiika.

²Yamugambira ati: “Nyowe nkagumya kwo nti: omukazi okamunobera kimu; nukwo kumuha munywani wawe. Owanyina, muto we, tasemiire kukira oli? Nkwesengeriize nuwe otwalemu.”

³Samusoni yabagambira ati: “Leero hati, Abafirisiti obundabakora akabi, tihaabeho araanjunaana.”

⁴Samusoni yagenda yakwata eboha ebikumi bisatu, yakwata n'ebimuli; eboha ezi yaiboherana emikira, omukira ha gundi, hagati ya buli boha ibiri, yatamu ekimuli.

⁵Ebimuli obuyamazire kubicumika omurro, yataisura eboha zagenda omu ngano y'Abafirisiti ey'ekaba eri omu misiri, omurro gwayokya ebiba by'engano eyekaba egesirwe, n'egi enyakwemeriire, gwayokya n'emiti y'emizaituni.

⁶Abafirisiti nubwo baayekagwize bati: “Boojo n'oha anyakukozire ekintu kinu?” Baabagambira bati: “Ni Samusoni ogu, muko w'Omutimuna, habwokuba isezaara, akakwata mukazi we, yamuha munywani wa Samusoni. Abafirisiti baagenda, omukazi ogu bamwokya hamu n'enju ya ise.

⁷Samusoni yabagambira ati: Obumuraaba nukwo mukora muti, tindukwija kugarukira aho, okuhika obundakabahoora enzigu.”

⁸Yabaita muno muno, yagenda yaikara omurwatika rw'obwingira obuli Etamu.

⁹Nubwo Abafirisiti baizire baateera orukande omunsi ya Yuda, baaramagira orubuga Lehi.

¹⁰Abasaija ba Yuda baabakaguza bati: “Habwaki mutuseesira?” Abafirisiti baagarukamu bati: “Twizire kuboha Samusoni tumukole nkooku yatukozire.”

¹¹Abasaija bikumi bisatu aba Yuda, nubwo baagenzire ha rwatika rw'omwandara ogwa Etemu, baakaguza Samusoni bati: “Torukumanya nkooku tulemwa Abafirisiti, obu kinu otukozire kintu ki?” Yabagarukamu ati: “Eki bankozire, na nyowe nikyo mbakozire.”

¹²Baamugambira bati: “Itwe twizire kukuboha, tukukwase Abafirisiti.” Samusoni yabagambira ati: “Mundahire, inywe inywenka nkooku mutanyite.” Baamugambira bati:

¹³“Nangwa, kyonka nitwija kukuboha tukukwase Abafirisiti;” Nubwo baamuboheseze emiguha ebiri emihyaka, baamwiha omumwandara.

¹⁴Obuyahikire harubuga Lehi, Abafirisiti baija kumutangatangana nibatoka, Mwoyo wa MUKAMA yaija hali Samusoni n'amaani, emiguha eyekaba emubohere emikono ekasisana nk'obugoigo obunyakuhikirweho omurro, empinga zaayaga zaamuruga hamikono.

¹⁵Yarora orusaya ruhyaka orw'endogoyi, yagorra omukono gwe yarukoma, yarwisa abasaija orukumi rumu.

¹⁶Yagamba ati: “Mbatuumire entuumo n'entuumo n'orusaya rw'endogoyi! Orusaya rw'endogoyi ndwisize abasaija rukumi.”

¹⁷Obuyamazire kubaza, orusaya rw'endogoyi, yaruhungura hara; ekiikaro eki kyayetwa Ramasi-Lehi. Nukwo kugamba ngu orusozi orwanagirweho igufa ly'orusaya.

¹⁸Samusoni iroho likaba limuli kubi, nukwo kutaagira MUKAMA naagamba ati: “Nyowe omwana wawe ompaire okusingura kunu, hati nyitwe iroho kandi mpabwe Abafirisiti banu abatasazirwe?”

¹⁹Ruhanga yaigura ekiikaro eky'oruhanga ekikaba kiri Lehi, kyarugwamu amaizi, Samusoni yanywa yaruhuuka. Obuyamazire kunywa, yatunga obusinge kandi yagarukwamu amaani. Habweki, ekiikaro eki kyayetwa Eni-hakole, na hati hoona kiri omunsi Lehi.

²⁰Samusoni akeebembera Abaisirairi okumara emyaka amakumi abiri, omu biro bya Abafirisiti.