Read Runyoro - rutooro Bac 16 Bible Online

Bac 16 - Runyoro - rutooro bible

Bac 16

¹Samusoni akagenda Gaaza yarorayo omukazi malaaya, yatemba ekibatu kye.

²Abantu baagambira Abagaaza bati: “Samusoni aizire hanu;” baagota ekiikaro eki baamulindirra ha irembo ly'orubuga okukiisa obwire. Ekiro kyona baakimara batarukubaza baagira bati: “Ka tulinde okuhikya nyenkya obwire obuburaakyanganuka; nubwo tumwite.”

³Baitu Samusoni yabyama okuhikya omwitumbi, omu itumbi yaimuka yakwata emiryango ey'irembo ly'orubuga n'enyomyo ibiri, yabikuura, ebihongozo, n'ebindi byona yabita hamabega ge, yabitwara ha mutwe gw'akasozi akanyakuli omumaiso g'orubuga Hebburoni.

⁴Eki obu kyahoire, yagonza omukazi ow'akaba ali omu kihanga ekya Soreki, ibara lye Derira.

⁵Abalemi b'Abafirisiti baizira omukazi ogu baamugamba bati: “Musoonasoone akugambire amaani ge amaingi ago nambere garuga, kandi akugambire ekituraakora kumukiza amaani, nukwo tumubohe tumusingule; buli muntu omuli itwe, araakuha ebicweka by'efeeza rukumi n'ekikumi.”

⁶Derira nukwo kugambira Samusoni ati: “Nkwesengeriize, ngambira amaani gawe amaingi ago nambere garuga, kandi abantu nkooku basobora kukuboha, nukwo omuntu akusingule.”

⁷Samusoni yamugambira ati: “Kakuba bambohesa enkorakole musanju embisi, nukwo nsobora kuhwa amaani, nkaba nk'omuntu ondi weena.”

⁸Abalemi b'Abafirisiti nubwo baaleetiire omukazi enkorakole musanju embisi, yazimubohesa.

⁹Omu kasumi ako, omukazi akaba aina abasaija abeeserekere, bali omu kisiika ekya haka ifo. Yayamirra Samusoni ati: “Samusoni, Abafirisiti baakugwera!” Enkorakole yaicwacwana nk'omuguha ogw'obugoigo oku gucweka obu guba guhikirweho omurro. Habweki tibaasobora kumanya amaani ge nambere garuga.

¹⁰Derira nukwo kugambira Samusoni ati: “Dora nonyalingya, ombiihabiihire. Nkwesengeriize ngambira nkooku basobora kukuboha.”

¹¹Samusoni yamugambira ati: “Kakuba bambohesa emiguha emihyaka etakabohahoga, obu nubwo nsobora kuhwa amaani, nkaba nk'omuntu ondi weena.”

¹²Aho Derira yakwata emiguha emihyaka yagimubohesa, yamugambira ati: “Samusoni, Abafirisiti baakugwera!” Abasaija abakaba beeserekere, bakaba bali omu kisiika ekya haka ifo, emiguha ey'ekaba emubohere, akagicwa nk'arukucwa ehuuzo.

¹³Derira yagambira Samusoni ati: “Nahati hoona nookyanyalingya, nombiiha ebisuba; ngambira nkooku basobora kukuboha.” Samusoni yamugambira ati: “Kakuba oyonda isoke ery'ebiyondo musanju ebiri hamutwe gwange, okabiyonda nk'ebiteeko by'enyamumbubi, okabibohera hankondo, nubwo nsobora kuhwa amaani nkaba nk'omuntu ondi weena.”

¹⁴Aho Samusoni obwakaba aky'agwijagiire, Derira yakwata ebiyondo eby'isoke ly'omutwe gwe, yabiyonda byasisana akateeko k'enyamumbubi, yabibohera ha nkondo, yamugambira ati: “Samusoni, Abafirisiti baakugwera!” Samusoni yasisiimuka omuturo, yakuura enkondo omukazi eyakaba arangiireho isoke rye n'akateeko.

¹⁵Omukazi yakaguza Samusoni ati: “Osobora ota kugamba oti: ‘Ninkugonza,’ kandi kunu tondoho? Wakambiihabiiha kasatu, noolema kungambira amaani gawe amaingi nambere garuga.”

¹⁶Obuyamutaireho muno amaani buli kiro, atarukumwikiriza kuhuumuraho, Samusoni nukwo kukwatwa ekiniga.

¹⁷Yagambira omukazi ataina na kimu eki arukumusigirayo, yamugambira ati: “Omuhyo gw'okumwa tigukampikaga ha mutwe, habwokuba obunkaba ninkyaruga omunda ya mau nti, nimpongerwa Ruhanga. Kakuba bammwa isoke, amaani nigampwa, nimba muceke nk'abandi boona.”

¹⁸Derira obuyarozire Samusoni nkooku amugambire amazima, yatumaho abalemi b'Abafirisiti yabagambira ati: “Mwije omurundi gunu gwonka, leero hati angambiire kwo amazima.” Nubwo abalemi b'Abafirisiti baahikireho Derira, baija bakwasire sente.

¹⁹Yagwijagiza Samusoni amutaire habibero, yayeta omusaija yamuragira amwe ebiyondo musanju eby'isoke ebikaba biri hamutwe gwe. Nubwo yatandika kumubonesa, habwokuba amaani gakaba gamuhoire.

²⁰Derira yagamba ati: “Samusoni Abafirisiti baakugwera!” Samusoni yasisiimuka omu turo, naateekereza ati: “Ndayebohorra ngende nkooku nkakora bwona,” atamanye Ruhanga nkooku akaba amurugireho.

²¹Abafirisiti nukwo kumukwata baamunokoramu amaiso, baamuleeta Gaaza, baamubohesa empingo ez'omuherre, baamuta ha mulimo ogw'okusa engano ey'omunkomo.

²²Baitu isoke rye eribaamwire lyaromba.

²³Omu kasumi ako, abalemi Abafirisiti baayesorooza kusemererwa n'okuhongera embandwa yabu Dagoni, nibagamba bati: “Omunyanzigwa waitu, Samusoni embandwa yaitu emututaire omungaro.”

²⁴Abantu obubaamuboine, bahaisaniza embandwa yabu nibagamba bati: “Ruhwerekereza ensi yaitu, ayatwisiremu abantu abaingi, embandwa yaitu amututaire omungaro.”

²⁵Obubaasemeriirwe muno, baagamba bati: “Mwete Samusoni aije atusemeze.” Nubwo baayeta Samusoni aruge omunju y'enkomo, yatandika kubazaanira. Baamwemereza hagati y'enyomyo;

²⁶yagambira omwojo ow'akaba naamunanata ati: “Leka nkwatirre enyomyo ezinyakuhaangiize enju kandi nziigamire.”

²⁷Omu kasumi ako, enju ekaba ijwire abasaija n'abakazi; abalemi boona ab'Afirisiti bakaba bali omu, kandi harusu rw'enju, hakaba haliyo abasaija n'abakazi abarukuhika nk'enkumi isatu, abaasungaga Samusoni naasekesa abantu.

²⁸Samusoni nubwo yayesengeriize MUKAMA naagamba ati: “Ai bambi, MUKAMA Ruhanga, nkwesengeriize onyijuke, ompe amaani, nkwesengeriize omurundi gumu gwonka, Ai bambi Ruhanga, Abafirisiti obamporre enzigu, habw'amaiso gange abiri.”

²⁹Samusoni yahwangura enyomyo ibiri eza hagati ezikaba zikwasire enju, yaziigamira n'amaani, omukono gwe ogw'obulyo guhambiire emu, n'omukono gwe ogw'emoso guhambiire endi.

³⁰Yagamba ati: “Onyikirize ntwarane n'Abafirisiti.” Nubwo yasindikire n'amaani ge goona, enju yagwera abalemi kandi yagwera abantu boona abakaba barumu. Abantu aba yaisire ha kufa kwe, baali baingi okukiraho aba akaba aisire omubwomeezi bwe bwona.

³¹Nubwo bagenzi be neeka ye yoona baija baamutwara, baamuleeta baamuziika hagati y'ensi Zoora na Esitaholi, omukituuro kya Manoha ise. Obu akaba amazire emyaka amakumi abiri nayebembera Isirairi.