Read Runyoro - rutooro Bac 17 Bible Online

Bac 17 - Runyoro - rutooro bible

Bac 17

¹Omunsi ey'ensozi eya Efuraimu, hakaba haliyo omusaija ibara lye Miika.

²Akagambira nyina ati: “Ebicweka by'efeeza rukumi n'ekikumi ei baakwibireho, ei wataireho omukyeno kandi ei wangambiireho, darayo, nyinayo hanu, ninyowe nagitwaire.”

³Ebicweka by'efeeza orukumi n'ekikumi ebi, Miika yabigarurra nyina; nyina yagamba ati: “Efeeza enu ka ngyerekese ngihongere MUKAMA habw'omwana wange, ekorwemu ekisisani ekisarwirwe n'ekyagiibwe; hati kangikugarurre.”

⁴Miika obuyagaruliire nyina sente, nyina yakwataho ebicweka by'efeeza ebikumi bibiri, yabiha omuheesi, omuheesi yakoramu ekisisani ekisarwirwe n'ekyagiibwe; ekisisani eki, yakita omunju ya Miika.

⁵Omusaija Miika ogu, akaba aina ekiikaro kyehabwe eky'okuramizaamu, yakora eky'okujwara ekya ha kifuba ekyetwa efodi na terafimu. Yakoma omu ha batabani be, afooke nyakatagara we.

⁶Omubiro ebi, omu Isirairi, hakaba hatarumu mukama, buli muntu yayekorraga eki arukusiima.

⁷Beterehemu omu Buyudaaya, hakaba haliyo omusaija omusigazi Omuleevi ow'oruganda rwa Yuda, naikara omunsi egi.

⁸Omusaija ogu, akaruga omurubuga Beterehemu omu Buyudaaya, yagenda kweserurra ekiikaro; kandi obwakaba naakyagenda, yahika ha nju ya Miika eyekaba eri omunsi ey'ensozi eya Efuraimu.

⁹Miika yamukaguza ati: “Nooruga ha?” Oli yagarukamu ati: “Nyowe ndi Muleevi owa Beterehemu omu Buyudaaya, ningenda kwikara hoona nambere ndakazoora ekiikaro.”

¹⁰Miika yamugarukamu ati: “Twikale hamu obe nka ise nyowe kandi nyakatagara okumara omwaka gwona, buli mwaka ndaakuhaga ebicweka by'efeeza ikumi, nkuhe ebyokujwara, nteho n'okukuliisa.”

¹¹Omuleevi yasiima kwikara n'omusaija Miika ogu, Miika yamusisanizaaga nk'omwana we.

¹²Miika, Omuleevi ogu nukwo kumufoora nyakatagara we, yaikara na uwe omunju ye.

¹³Hanyuma Miika yagamba ati: “Hati namanya MUKAMA nkooku arukwija kumpa omugisa, habwokuba nyina nyakatagara Omuleevi.”