Read Runyoro - rutooro Bac 18 Bible Online

Bac 18 - Runyoro - rutooro bible

Bac 18

¹Omu biro ebi, omu Isirairi hakaba hatarumu mukama, kandi ab'oruganda rwa Daani bakaba nibeeserurra ensi ey'okwikaramu; habwokuba bakaba batakatungire ensi eyabo habwabo, hagati y'Abaisirairi.

²Abantu ab'oruganda rwa Daani nubwo baakomeremu abasaija batano ab'amagezi omu bantu ab'oruganda rwabo, baabaiha omurubuga Zoora na Esitaholi, baabatuma batate ensi kandi bagyetegereze. Obu baahikire omunsi ey'ensozi eya Efuraimu, baaraara omuba Miika.

³Obu bakaba bakyali omuba Miika, baahurra iraka ery'omusigazi Omuleevi; nukwo kumuhikaho bakamukaguza bati: “Nooha ayakuleesire kunu? Hanu nookoraho ki?”

⁴Yabagarukamu ati: “Miika nuwe yancweriire amagezi ganu, yampa omulimo, kandi hati ndi nyakatagara we.”

⁵Baamugambira bati: “Tukwesengeriize otukagulize Ruhanga nukwo tumanye orugendo rwaitu turukwija kugenda, nkooku ruraaba rurungi.”

⁶Nyakatagara yabagarukamu ati: “Mugende n'obusinge, Ruhanga naija kubalinda omurugendo rwanyu.”

⁷Abasaija abataano abo, nubwo baimukize baahika Laisi, baarora abantu ab'omunsi egi nkooku baina obusinge, engeso y'Abasidoni nkooku ekaba eri, kandi baculiire bataina ekirukubaburaho, batungire, bali hara n'Abasidoni, bataina muntu noomu ou barukukorrana na uwe.

⁸Kandi obu baagarukire hali bagenzi baabu aba Zoora na Estaholi, bagenzi baabu baabakaguza bati: “Mutuleetire makuru ki?”

⁹Babagarukamu bati: “Tukagenda twahika Laisi, tukarora abantu nkooku baina obusinge nk'Abasidoni. Mwije tugende tubarwanise; habwokuba ensi tukagirora, nsi y'orwezo. Nimwenda kwikara aho mutaina ekimurukukora? Muleke kwezigaziga, mugende mutaahe ensi eri, mugirye.

¹⁰Obumuraagenda, nimwija kuhikaho abantu abataina ekibarukwekenga. Ensi ngazi; mazima kwo, Ruhanga agibahaire; eki nikyo ekiikaro ekitarukuburwamu kintu na kimu eky'omunsi.”

¹¹Abasaija rukaaga ab'oruganda rwa Daani, abaina ebyokurwanisa eby'obulemu nukwo kwimukya Zoora na Estaholi.

¹²Baagenda baateera orukande Kiryasi-yalimu omu Buyudaaya. Okuhika na hati, ekiikaro eki nikyetwa rukande rwa Daani, kiri Bugwaizooba bwa Kiryasi-yalimu.

¹³Obubaarugire aho, baayeyongerayo baahika hansi ey'ensozi eya Efuraimu, baataaha omuba Miika.

¹⁴Abasaija abataano abakaba bagenzire kutata ensi Laisi nubwo bakagwize bagenzi baabu bati: “Mumanyire omumaju ganu nkooku harumu eky'okujwara kya hakifuba, n'ekisisani ky'okuramibwa? Habweki nu, muteekereze eki muraakora.”

¹⁵Baakubuutuka, baagenda hanju ya Miika, omusigazi Omuleevi nambere yararaaga, baamuramukya.

¹⁶Abasaija orukaaga ab'oruganda rwa Daani, abakaba baina ebyokurwanisa eby'obulemu, baayemerra hairembo;

¹⁷abasaija abataano baakwata eky'okujwara kya ha kifuba, ekisisani ky'okuramibwa, n'ekisisani ekyagiibwe, nyakatagara akyayemeriire hairembo hamu n'abasaija bali orukaaga abakaba baina ebyokurwanisa eby'obulemu.

¹⁸Abo obubaataahire omunju ya Miika, bamazire kukwata ekisisani ekisarwirwe, bakwasire eky'okujwara hakifuba, ekisisani ky'okuramibwa n'ekisisani ekyagiibwe, nyakatagara yabakaguza ati: “Nimukora ki?”

¹⁹Baamucoomera bati: “Otagamba, akanwa kawe kaigale, ija tugende, obe isiitwe kandi nyakatagara waitu. Ekirukukira oburungi nikiha? Kuba nyakatagara weeka ey'omuntu omu rundi kuba nyakatagara ow'ihanga lyona n'oruganda rwona orwa Isirairi?”

²⁰Nyakatagara obuyahuliire eki, yasemererwa muno; nukwo kukwata eky'okujwara kya hakifuba, ekisisani ky'okuramibwa n'ekisisani ekisarwirwe, yagenda ali hagati y'abantu.

²¹Baakubutuka, baagenda beebembiize abaana, ente, n'ebintu.

²²Obubakaba bairra hara muno enju ya Miika, abataahi abakaba bali omumaju agaheerraine neeye, baateera enduuru, baimukya, baakuraatira ab'oruganda rwa Daani.

²³Obubakaba nibabahondera nibatoka, ab'oruganda rwa Daani baakubuutuka baakaguza Miika bati: “Obaire ki? Habwaki oiziire n'abantu abo boona?”

²⁴Miika yagarukamu ati: “Mutwaire embandwa zange ezinayekoliire, mwatwara nyakatagara, mwagenda, nyowe nsigaize ki? Hati, ninywe muukunkaguza muti: ‘Obaire ki?’ ”

²⁵Ab'oruganda rwa Daani baamugarukamu bati: “Leka kutwomberra, otatuzaanisa, obu turaakutaho engaro, buli iwe ofiire neeka yawe yoona.”

²⁶Nubwo ab'oruganda rwa Daani baagenda; kandi Miika obuyarozire nkooku bakaba nibamukiza amaani, yakubuutuka yagaruka omuka ye.

²⁷Ab'oruganda rwa Daani obubaamazire kutwara nyakatagara n'ebintu Miika ebyakaba akozire, baahika Laisi omunsi ey'abantu abaculeezi kandi abataina ekibarukwekenga, baabaisa empirima, orubuga rwabo baarwokya n'omurro.

²⁸Hakaba hataroho ow'okubajuna, habwokuba omwanya gukaba guli mukooto okuruga Sidoni, kandi bakaba bataina bantu baakorranaga nabo. Orubuga rwabo rukaba ruli omukihanga ekya Besi-Rrehobu. Orubuga baarwombeka buhyaka

²⁹baarwikaramu, baaruruka, ibara lya isenkuru bo, Daani, ayazairwe Isirairi; baitu kara hoona, orubuga oru rwayetwaga Laisi.

³⁰Ab'oruganda rwa Daani, ekisisani kiri ekisarwirwe, bakifoora kyabo; Yonasani mutabani wa Gerosomu, mwijukuru wa Musa, n'abatabani be, nubo baabaire banyakatagara ab'oruganda rwa Daani, okuhikya hakiro ekyabantu bomunsi egi, babanyagire.

³¹Nukwo baataireho bati ekisisani ekisarwirwe, ekyakozirwe Miika, akasumi koona enju ya Ruhanga obwekaba eri Siiro.