Read Runyoro - rutooro Bac 19 Bible Online

Bac 19 - Runyoro - rutooro bible

Bac 19

¹Omu biro ebi, Isirairi obwekaba etaina mukama, hakaba haroho Omuleevi ayaikaraga omubicweka ebya hara eby'ensi ey'ensozi eya Efuraimu, Omuleevi ogu, akaswera omukazi ondi yamwiha Beterehemu orw'omu Buyudaaya.

²Obu baabihiraine na mukazi we, omukazi yayangana, yagaruka omwa ise omurubuga Beterehemu orw'omu Buyudaaya, yamarayo ameezi nk'ana.

³Aho iba nukwo kumukurata, amusonasoone, nukwo asobole kumugarra. Akagenda n'omwiru we n'enkaina ibiri. Yahika omwa isezaara; isezaara obuyamuboine, yaija kumutangirra aijwire omuhimbo.

⁴Isezaara yamutanga na uwe nukwo kumara omwa isezaara ebiro bisatu; Omuleevi n'omuherezaawe bakakunirwa kurungi, baalya, baanywa.

⁵Ha kiro ekyakana, bakazinduka kara, omusaija yayeteekaniza kugenda; baitu isezaara yagaruka yamugambira ati: “Banza onage akantu omunda, obu oraamara kulya, nukwo ogende.”

⁶Nubwo abasaija ababiri abo, baikarra baalya, baanywa hamu; isezaara yagambira muko we ati: “Nkwesengeriize, na hati garuka oraale, oyegonze.”

⁷Omusaija obuyaimukire kugenda, isezaara yamwesengereza ati: Otagenda, na uwe nukwo kugaruka kuraara.

⁸Ha kiro ekya kataano, nabwo yazinduka kara agende; isezaara yagaruka yamugamba ati: “Weewe! Banza olye akookulya, linda izooba libanze ligoroobe.” Baalya hamu.

⁹Omusaija, mukazi we n'omwiru we obubaimukire kugenda, isezaara yamugambira ati: “Dora obwire nibugenda kwira; nkwesengeriize raara. Obwire mbunu bwizire; raara oyegonze; nyenkya oimuke kara, okwate omuhanda, ogaruke owanyu.”

¹⁰Baitu omusaija ogu, atagonze kwongera kuraara; nukwo kwimukya baagenda na mukazi we, yahika haihi na Yebusi, niyo Yerusaalemu. Akaba aina enkaina ibiri ezinyakuroho amatandiiko, na mukazi we ainawe.

¹¹Nambere baahikiire haihi na Yebusi, obwire bukaba bwakwata amaiso, omuheereza nukwo kugambira mukama we ati: “Tukubutuke omurubuga runu Yebusi tugoonye.”

¹²Mukama we yamugarukamu ati: “Titurukwija kukubuka omu rubuga orw'abanyamahanga abatali bantu ba Isirairi; baitu twirreyo omumaiso, tuhike Gibeya.”

¹³Omuheereza yagaruka yagamba ati: “Twirre haihi n'ekimu ha biikaro ebi, tugoonye Gibeya rundi Rama.”

¹⁴Baayeyongera omumaiso baagenda; obwire bwabairirra haihi na Gibeya eya Benyamiini,

¹⁵baakubuutuka baagenda kugoonya Gibeya. Omuleevi yagenda yaikarra omuntangatangano y'emihanda y'orubuga; baitu hatabeho muntu noomu ow'okubagoonyesa omunju ye.

¹⁶Obubakaba bakyali aho, omubwire bw'akairirizi, haija omugurusi ow'akaba nainuka ha musiri gwe. Omugurusi ogu akaba ali muntu nzaarwa ey'omunsi ey'ensozi eya Efuraimu, asuhuukiire omurubuga Gibeya; baitu bakama b'ekiikaro eki, bakaba bali b'oruganda rwa Benyamiini.

¹⁷Obuyarozire omugenzi aikaliire omuntangatangano y'emihanda, omugurusi yamukaguza ati: “Nogenda nkaha kandi n'oruga nkaha?”

¹⁸Omuleevi yagarukamu ati: “Nituruga Beterehemu omu Buyudaaya, nitugenda omu biikaro ebya harubaju eby'ensi ey'ensozi eya Efuraimu, oku nuho owaitu. Nkaba ngenzire Beterehemu Buyudaaya; hati nintaaha; busaho muntu anyakwikirize kuturaaza.

¹⁹Twina obunyansi n'ebyokulya eby'enkaina zaitu, twina omugaati n'eviini, ebyange na mukazi wange n'omusigazi onu, busaho ekitubuzireho.”

²⁰Omugurusi yagamba ati: “Rugayo oije owange, byona ebyorukwenda, ndaabikuha; baitu leka kuraara omumuhanda.”

²¹Yamutaahya omuka, yaha enkaina ze ebyokulya; baanaba ebigere, baalya baanywa.

²²Obubakaba nibakyaalya nibasemererwa, haija abasaija ababi ab'omurubuga oru, baagota enju, baatandika kuteera orwigi; baaragira omugurusi nyineeka bati: “Omusaija ogu anyakutaahirege omunju yawe munu, muturukye, tubyaame nawe.”

²³Omusaija ogu nyineeka, yaturuka yahikaho abasaija abo yabagambira ati: “Bagenzi bange, mbeesengeriize, mutakora ihano nkeeri, omusaija onu ambungiire mutakora ekintu ekibi nkeeki.

²⁴Hanu nyinaho muhara wange, atamanyire musaija, kandi na uwe omusaija onu aina mukazi we, abo leka nubo mbaleetere mubakole kyona eki murukwenda, baitu omusaija ogu, mutamukoraho ekintu ekibi nkeeki.”

²⁵Baitu ebi abasaija bali batabihulirize. Omuleevi oli, nubwo kugwera mukazi we akamubaha kumukora ebibi, baamusaaliza okuhika emamba obwekaba neesara, nubwo baamuleka yagenda.

²⁶Emamba obwekaba neesara omukazi, nubwo yaizire yagwa omumulyango gw'enju y'omusaija ogu, iba nambere akaba ali, yaikaraho, okuhika obwire obubwakiire.

²⁷Obwire obubwakiire, iba yaimuka kara, yakingura enyigi z'enju, yaturuka aheeru, akwate omuhanda gwe, agende. Nambere yanagire amaiso, dara mukazi we agwire omumulyango gw'enju, emikono agitaire ha kiti ky'omulyango.

²⁸Yamugamba ati: “Weewe, imuka tugende.” Baitu omukazi tiyamugarukamu. Iba nukwo kumurambika ha nkaina yakwata omuhanda, yataaha owaabu.

²⁹Obuyataahire omunju ye, yakwata omuhyo, mukazi we yamutematemamu ebicweka ikumi na bibiri, buli kicweka naakita owakyo, yamutwekera ensi yoona eya Isirairi.

³⁰Boona abaaboine ekintu eki, bakagamba bati: “Okuruga ha kiro eki Abaisirairi baarugiire omunsi Misiri, okuhikya ha kiro kya hati, ekintu nka kinu tikikabahoga, kandi tikikabonwaga, mukiteekerezeho, mukyekaguzeho, kandi mukibazeeho.”