Read Runyoro - rutooro Bac 2 Bible Online

Bac 2 - Runyoro - rutooro bible

Bac 2

¹Malaika wa MUKAMA akaruga Girigaali yagenda Bokimu, yagambira Abaisirairi ati: “Nkabaiha omunsi Misiri, nabaleeta omunsi ei narahiire kuha baisenkuru inywe. Nkagamba nti: ‘Ebiro byona, tindicwa ndagaano yange ei ndagaine na inywe,

²kandi na inywe mutalikora endagaano n'abantu ab'ensi enu, museese amatambiro gaabo.’ Baitu timuhondiire ekiragiro kyange. Habwaki mwekolire ekyanyu?”

³Habweki ningamba nti: “Abantu abo tindukwija kubabinga ha murukugenda; baitu balibafookera banyanzigwa, kandi embandwa zaabo zibafookere mutego.”

⁴Malaika wa MUKAMA obuyamazire kugambira Abaisirairi ebigambo ebi, abantu boona baateera omukungo, baarra.

⁵Ekiikaro eki, baakiruka ibara Bokimu. Amakuru gaakyo, abalizi; oku baahongerrayo MUKAMA ekyonzira.

⁶Yoswa obu yaragire abantu, Abaisirairi baagenda, buli muntu kulya ensi ye ei yabagaine.

⁷Omu busumi obwa Yoswa, Abaisirairi baaherezaaga MUKAMA obwire bwona n'omu biro byona eby'abakuru abaahangaire kumukira, abakaba baboine ebikorwa byona ebihuniriza, MUKAMA ebi yakoliire Abaisirairi.

⁸Omuheereza wa MUKAMA Yoswa mutabani wa Nuuni, yafa ahikize emyaka kikumi mu ikumi.

⁹Baamuziika Timunasi-heresi, ha mutaano gw'ensi ye, omunsi ey'ensozi eya Efuraimu ha bukiizi obw'emoso obw'orusozi Gaasi.

¹⁰Abantu boona ab'akasumi ako, nabo baafa, baahondera baisenkurubo; haahonderaho abantu akasumi akandi, abataramanyire MUKAMA rundi kumanya ebikorwa ebi yakoliire Isirairi.

¹¹Abaisirairi bakasobeza MUKAMA baatandika kukorra embandwa Baali,

¹²bakafuruka MUKAMA Ruhanga owa baisenkurubo ayabaihire omunsi Misiri, baatandika kuramya embandwa ez'amahanga agakaba gabaherraine baabiihiza MUKAMA.

¹³Bakasiga MUKAMA baaheereza Baali na Asitarosi.

¹⁴Nukwo MUKAMA kubiihirirwa muno Abaisirairi, yabalekera abanyagi baabanyaga ebyabu; yabalekera abanyanzigwa baabu ababeehinguliriize kubasingura, Abaisirairi batarukusobora kwerwaanaho.

¹⁵Buli kasumi obubaagendaga kurwana, MUKAMA yabaleeteraga akabi, nkooku akaba agambire kandi abarahiriire, batuntura muno.

¹⁶MUKAMA nubwo yataireho Abacwi b'emisango, abebembezi kubajuna abanyanzigwa.

¹⁷Baitu nabwo, Abacwi b'emisango baabu ebi baabagambiraga batabihulirize; baayema; nibakuraatira embandwa, baaziramya; ahonaaho baaleka kukora baisenkurubo ebi baakoraga; baisenkurubo baakwataga ebiragiro bya MUKAMA, baitu bo batabikwate.

¹⁸Akasumi koona MUKAMA obuyabateerahoga Omwebembezi, yakonyeraga Omwebembezi ogu, kandi yabajunaga abanyanzigwa baabu akasumi koona omwebembezi yamaraga ayomiire; MUKAMA yabagirraga embabazi obubasindaga habw'okubonabona n'okucaanda.

¹⁹Baitu omucwi w'emisango obuyafaaga, bagaruka enyuma bakora kubi okukira baisenkurubo, bahondera embandwa, baziheereza kandi baziramya; batarukuleka engeso zaabo ez'obutahurra.

²⁰MUKAMA nukwo kubiihirirwa muno Abaisirairi, yagamba ati: “Ihanga linu habw'okucwa endagaano yange ei naragaine na baisenkurubo baayanga kumpurra,

²¹okuruga hati tinyongere kubinga ihanga na limu ha mahanga ago agasigaireho Yoswa obu yafiire.

²²Amahanga ago ninyija kugakozesa kulenga Abaisirairi kurora obubaraaba nibasobora kugendera omu muhanda gwange nk'abaisenkurubo, rundi tibaakikole.”

²³MUKAMA nukwo kuleka amahanga ago ataikiriize Yoswa kugasingura; kandi atagabinge bwango Yoswa amazire kufa.