Read Runyoro - rutooro Bac 20 Bible Online

Bac 20 - Runyoro - rutooro bible

Bac 20

¹Abantu boona aba Isirairi, otairemu n'ensi eya Giryadi, bakaruga Daani baagenda Beri-seba, ekitebe kyona kyaba muntu omu, kyayesorooleza hali MUKAMA omukiikaro Mizipa.

²Abeebembezi b'abantu boona ab'enganda eza Isirairi, baija omwisorrokaniro ly'abantu ba Ruhanga, abaserikale emitwaro ana ab'ebigere, baasomora empirima.

³Omu kasumi ako, ab'oruganda rwa Benyamiini bakahurra ngu Abaisirairi bagenzire Mizipa. Abaisirairi baakaguza bati: “Mutugambire, ekibi kinu kikaija kita?”

⁴Omuleevi iba n'omukazi ow'akaba aisirwe, yagarukamu ati: “Nkagenda hamu namukazi wange omunsi ya Benyamiini, turaaleyo ekiro kimu.

⁵Kiro eki, abasaija aba Gibeya bakaija kundwanisa, baagota enju ei nkaba ndumu; bakaba nibenda kunyita, mukazi wange, boona baamuhamba ekyarugiremu yafa.

⁶Nkamutwara namutematemamu ebicweka, namutwekera abantu boona ab'omunsi eya Isirairi; habwokuba abasaija abo, bakakora ekibi eky'okuswaza kandi eky'orwanju omu Isirairi.

⁷Inywe abantu ba Isirairi, ekintu eki mukihanuuleho, kandi mutugambire ekisemeriire kukorwa.”

⁸Abantu boona baimukira hamu baagamba bati: “Busaho noomu hali twe araataaha eheema ye, kandi busaho noomu aragaruka omunju ye.

⁹Kinu nikyo turukwija kukoraho Gibeya: nitwija kugenda kugirwanisa, tubandize kuteera akaruuru,

¹⁰buli ruganda rwona orwa Isirairi, habuli kikumi, nitwija kugenda nitwihaho abasaija ikumi, ha buli rukumi twiheho kikumi, ha mitwaro ikumi twiheho omutwaro gumu, ab'okuleeteraga abarwani ebyokulya, bbo nukwo basasuze aba Gibeya eya Benyamiini ebibi byona eby'orwanju ebi baakozire omu Isirairi.”

¹¹Abaisirairi boona nubwo baayesoroize baayeteerana hamu okurwanisa Gibeya.

¹²Enganda za Isirairi, ikatuma abantu barabemu abantu boona ab'oruganda rwa Benyamiini babakaguze bati: “Kinu mukakora kibi kyamulingo ki?

¹³Hati, abantu ababi abo abanyakuli omunsi enu Gibeya, mubatuhe tubaite, nukwo twiheho Isirairi ekihemu.” Baitu ab'oruganda rwa Benyamiini, bagenzi baabu Abaisirairi batabahulirize.

¹⁴Kandi Ababenyamiini baruga omumbuga zaabo, baija Gibeya nukwo basobole kurwanisa Abaisirairi.

¹⁵Ha kiro eki, ab'oruganda rwa Benyamiini omumbuga zaabo, bakasoroozaamu abasaija abakaba nibasobora kurwanisa empirima emitwaro ebiri mu kakaaga, otabaliiremu enzaarwa za Gibeya.

¹⁶Omu basaija abo, hakaba harumu abasaija abaakomerwe rusanju, abaakwataga emoso; buli omu omuli bo, akaba naasobora kurasa ibaale nabutida atarukutaisa.

¹⁷Abantu ba Isirairi, otabaliiremu ab'oruganda rwa Benyamiini, abasaija abakaba nibasobora kurwanisa empirima bakahika emitwaro ana; abo boona bakaba bali bantu barwani.

¹⁸Abantu ba Isirairi, bakaimuka baagenda Beseri baakaguza Ruhanga bati: “Nooha omuli itwe araabanza kuseesira ab'oruganda rwa Benyamiini kubarwanisa?” MUKAMA yagarukamu ati: “Yuda nuwe araabanza.”

¹⁹Kandi abantu ba Isirairi bakaimuka nyenkya kara, baateera orukande haihi na Gibeya.

²⁰Baagenda kurwanisa ab'oruganda rwa Benyamiini; baayemereza amahe gaabo omumaiso haihi n'orubuga Gibeya.

²¹Ha kiro eki, omurubuga Gibeya, hakarugamu ab'oruganda rwa Benyamiini, baita Abaisirairi emitwaro ebiri n'enkumi ibiri.

²²Baitu Abaisirairi bataterebuke, baagaruka baayemereza amahe gaabo omukiikaro kiri kyonyini, eki baagemerizeemu ha kiro eky'okubanza.

²³Baagenda omumaiso ga MUKAMA, bairirwayo nibamulirirra; baamukaguza bati: “Twongere kwiriza haihi amahe gaitu turwanise bagenzi baitu ab'oruganda rwa Benyamiini?” MUKAMA yagarukamu ati: “Mugende mubarwanise.”

²⁴Ha kiro ekya kabiri, Abaisirairi nukwo kwirra haihi ab'oruganda rwa Benyamiini.

²⁵Ab'oruganda rwa Benyamiini baaruga omurubuga Gibeya, baita Abaisirairi omutwaro gumu N'akanaana; abo boona bakaba bali bantu abaakwataga empirima.

²⁶Aho abantu ba Isirairi boona, ihe ryona nubwo baagenzire Beseri, baatandika kurra; bakaikarra omumaiso ga MUKAMA, kiro eki bakasiiba, tibaalya kantu okuhikya orwebagyo muno, baahongera MUKAMA ebihongwa eby'okwokya n'eby'okusaba obusinge.

²⁷Abaisirairi baakaguza MUKAMA. (Omubiro ebi, Esanduuko ey'endagaano ya MUKAMA, oku nuho yaikaraga.

²⁸Finehaasi mutabani wa Eryeza mwijukuru wa Arooni, nuwe akaba ali nyakatagara nahereeza omumaiso gaayo.) Nibagamba bati: “Tugaruke tugende kurwanisa bagenzi baitu ab'oruganda rwa Benyamiini nandiki twerekere?” MUKAMA yagarukamu ati: “Mugende mubarwanise, leero nyenkya, ninyija kubabaha mubasingule.”

²⁹Abaisirairi nukwo kutaho abasaija beehingulirize orubuga Gibeya.

³⁰Ha kiro ekya kasatu, Abaisirairi baasesira ab'oruganda rwa Benyamiini baayemereza amahe gaabo omumaiso g'orubuga nkooku baakozire okubanza.

³¹Ababenyamiini baaturuka kurwanisa Abaisirairi, baahwa omurubuga; baatandika kutema n'okwita Abaisirairi omumihanda, ogumu hali egi, nugwo ogwagendaga Beseri, ogundi nigugenda Gibeya, baabaitira n'omukisaka. Bakaita Abaisirairi nka makumi asatu.

³²Ab'oruganda rwa Benyamiini baateekereza bati: “Abaisirairi bagarukire enyuma nkooku baakozire okubanza; baitu Abaisirairi bakacwa amagezi ag'okugaruka enyuma, Ababenyamiini nukwo baruge omurubuga babahondere bahike omumihanda.”

³³Abantu ba Isirairi boona baimuka, baaruga nambere bakaba bali, baayemerra Baali-tamara; omu kasumi nuko kamu, Abaisirairi abandi abakaba beeserekere Bugwaizooba bwa Gibeya, baajumbutuka nambere bakaba bali.

³⁴Hakaija Abaisirairi omutwaro gumu abaakomerwe kurwanisa Gibeya; obulemu bwasarra; baitu ab'oruganda rwa Benyamiini, batamanye akabi nkooku kakaba kabali haihi.

³⁵Ha kiro eki, MUKAMA yaha Abaisirairi kusingura Ababenyamiini; Abaisirairi baita ab'oruganda rwa Benyamiini emitwaro ebiri, enkumi itaano n'ekikumi; abo boona bakaba bali bantu abakwasi b'empirima.

³⁶Nubwo ab'oruganda rwa Benyamiini baamanya nkooku basingwirwe. Abaisirairi bahigiza Ababenyamiini, habwokuba bakeesiga abasaija abakaba beeserekere Gibeya.

³⁷Abasaija abakaba beeserekere, baajumbutuka baaseesira Gibeya; abantu boona ab'omurubuga baabaisa empirima.

³⁸Abaisirairi, na bataahi baabu abakaba beeserekere, bakataho akamanyiso nuko kanu ngu: “Ab'omurubuga obubalihemba omurro, hakaimuka ekiika ekiri nk'ekicu,

³⁹banu nukwo baije ha bulemu.” Omukasumi ako, ab'oruganda rwa Benyamiini, bakaba batandikire kucumita n'okwita Abaisirairi, bakaba baakaita nka makumi asatu; nukwo kuteekereza bati: “Na hati nitwija kubabinga nkooku twababingire okubanza, omu bulemu obwabandize.”

⁴⁰Baitu akamanyiso ak'omwiika obu kaatandikire omwiika gwaimuka omurubuga, ab'oruganda rwa Benyamiini obubaarozire enyuma; baarora orubuga rwona ndimi z'omurro ogukaba nigusoma okuhika haiguru.

⁴¹Abaisirairi nubwo baakubutukire, ab'oruganda rwa Benyamiini baatiina, habwokuba bakarora akabi nkooku kakaba kabali haihi.

⁴²Nubwo kwiruka. Abaisirairi babaroleriire, baatoma ogw'irungu. Baitu ihe ryona ery'Abaisirairi lyabakurata ahonaaho, Abaisirairi abandi, abo abakaba nibaruga omurubuga, baabagwamu batabeetegekere, baabahwerekereza.

⁴³Abaisirairi baita ab'oruganda rwa Benyamiini, banu baabairukya okubahikiza kimu Burugaizooba bwa Gibeya.

⁴⁴Ab'oruganda rwa Benyamiini, hakafa omutwaro gumu n'akanaana, abo boona bakaba bali basaija emanzi.

⁴⁵Abandi bairuka baatoma obukiizi obw'irungu nibeebinga omwandara ogwa Rimoni; abasaija enkumi itaano hali bo, bakaitirwa omumuhanda, banu baabairukiza kimu obutarora nyuma, baabahikya Gidomu, baabaitamu abasaija enkumi ibiri.

⁴⁶Ab'oruganda rwa Benyamiini abaafiire kiro eki, bakahika emitwaro ebiri n'enkumi itaano, abo kandi baali abakwasi b'empirima, boona abasaija emanzi.

⁴⁷Hakairukaho abasaija rukaaga baakwata ogw'irungu nibeebinga omwandara ogwa Rimoni, oku bakamarayo ameezi ana.

⁴⁸Abaisirairi, baakubuutukira ab'oruganda rwa Benyamiini abantu baabaisa empirima, oteho n'ebisoro, na kyona ekibaakasangire. Embuga zoona ezi baasangire, baazokya.