Read Runyoro - rutooro Bac 21 Bible Online

Bac 21 - Runyoro - rutooro bible

Bac 21

¹Abaisirairi bakaba barahiire bali Mizipa ngu: “Busaho noomu omuli itwe ow'alisweeza muhara we omu ruganda rwa Benyamiini.”

²Abantu baagenda Beseri bairirwayo bali omumaiso ga Ruhanga, nibasinda kandi nibarra muno.

³Baakaguza bati: “Ai MUKAMA Ruhanga owa Isirairi, kinu kisobokere kita kubaho omu Isirairi, oruganda rumu kuburaho omu Isirairi?”

⁴Ha kiro ekyakurasireho, abantu bakaimuka nyenkya kara, baayombeka itambiro, baahonga ebihongwa eby'okwokya n'eby'okusaba obusinge.

⁵Abantu ba Isirairi baakaguza bati: “Ha nganda eza Isirairi niruha orutaragenzire omwisorrokaniro omumaiso ga MUKAMA?” Habwokuba bakaba barahiire nibagamba bati: “Omuntu ogu ataligenda Mizipa omumaiso ga MUKAMA, araabaga w'okwitwa.”

⁶Abaisirairi nubwo baagiriire mugenzi wabo Benyamiini embabazi, baagamba bati: “Kiro kinu, Isirairi arugirweho oruganda rumu.

⁷Nkooku twasangirwe twarahira MUKAMA tuti, Ababenyamiini titulibaha bahara baitu kubaswera, abo abanyakusigaireho, abakazi turababaihira nkaha?”

⁸Nukwo kukaguza bati: “Ruganda ki ha nganda eza Isirairi orutaragenzire Mizipa omumaiso ga MUKAMA? Busaho muntu n'omu arugire Yabesi-giryadi ayaizire omurusiisira omwisorrokaniro.

⁹Habwokuba abantu obubeesirwege, tihabaireho noomu ha bantu aba Yabesi-giryadi.”

¹⁰Ekitebe nukwo kutumayo abasaija omutwaro gumu n'enkumi ibiri, ha basaija baabu abarukukirra kimu obumanzi baabaragira bati: “Mugende mwite abantu boona aba Yabesi-giryadi, abakazi n'abaana.

¹¹Muhwerekereze abasaija boona n'abakazi boona abanyakumanyire abasaija, abakazi abatamanyire basaija abo mutabakwataho.”

¹²Omu bantu aba Yabesi-giryadi, bakasangamu abaisiki bbina empikirre, abatakairraga haihi musaija; abo baabaleeta omurukande orwa Siiro omunsi ya Kanaani.

¹³Ekitebe kyona nukwo kweta ab'oruganda rwa Benyamiini abakaba bali ha mwandara ogwa Rimoni, baabasabira obusinge.

¹⁴Omu kasumi ako, Ababenyamiini bagarukayo, Abaisirairi baabaha abakazi ha baisiki aba Yabesi-giryadi abasigaire bataisirwe, baitu abakazi abo bakaba bali bake, batabamale.

¹⁵Abantu bagirra Ababenyamiini embabazi, habwokuba MUKAMA akaba ayahukaniize enganda za Isirairi.

¹⁶Bakuru b'ekitebe nukwo kwekaguza bati: “Abakazi ab'oruganda rwa Benyamiini boona obubaraaba baahwerekeriire, turaacwa magezi ki abo abasaija abanyakusigaireho kubaserurra abakazi ab'okuswera?”

¹⁷Tusobora tuta hali abo abaasigaireho, kubatungira abakazi, nukwo Isirairi ekaleka kuburwaho oruganda ha nganda zaayo?

¹⁸Itwe titurukusobora kubaha bahara baitu bakabaswera habwokuba Abaisirairi bakarahira nibagamba bati: “Akyenwe ogu ow'aliha omukazi kuswerwa ow'omuruganda rwa Benyamiini.”

¹⁹Baagamba bati: “Omurubuga Siiro oruli omumatemba ga Beseri, ha bukiizi obwa Burugaizooba obw'omuhanda ogurukuruga Beseri nigugenda Sekemu, habayo ekiro kikuru ekya buli mwaka eky'obugenyi bwa MUKAMA.”

²⁰Baaragira ab'oruganda rwa Benyamiini bati: “Mugende mwesereke omu misiri ey'emizabbibbu,

²¹mugunule amaiso, obu muraarora abaisiki ba Siiro nibaija kuzina, mujumbutuke omu mizabbibbu mubagweere, buli omu omuli inywe nuho ayeyihire omukazi ow'okuswera, mwegarukire owanyu omunsi eya Benyamiini.

²²Baise b'abaisiki abo rundi banyanyabo obubaliija kubajunaana, tulibagambira tuti: ‘Mubaganyire, habwokuba buli omu hali bo, akeetwarra omukazi ow'okuswera, abasaija boona nkooku bakora omu bwire bw'obulemu. Kakuba mwabahaire abakazi, mwakubaire muliire endahiro yanyu, kandi mukozire ekibi.’ ”

²³Ab'oruganda rwa Benyamiini nukwo baakozire bati, baayetwarra abakazi abarukubamara, ababaanyagire omubazini, baayegarukira owaabu, baayombeka buhyaka embuga zaabo, baikarra baagwagwana.

²⁴Omu kasumi ako, abantu ba Isirairi nubwo baayahukaine, buli omu yagaruka omu ruganda rwe, n'omu bantu n'omuka ye, buli omu yagenda omubutaka bwe.

²⁵Omu kasumi ako, omu Isirairi hakaba hatarumu mukama, buli muntu yayekorraga ekyakasiimire.