Read Runyoro - rutooro Bac 3 Bible Online

Bac 3 - Runyoro - rutooro bible

Bac 3

¹Ganu nugo amahanga MUKAMA yasigireho ageekonyeze kulenga Abaisirairi, abataramanyire bulemu obwabaire mu Kanaani.

²Eki akakikora nukwo abantu aba Isirairi ab'ebiro byona, bamanye kurwana, okukira muno, abakaba batakagendaga mu bulemu.

³Abantu abaasigirweho nubo banu: Abakama abataano ab'Abafirisiti, Abanyakanaani boona, Abasidoni n'Abahiivi abaikaraga omu nsozi eza Lebanoni, okubandiza ha rusozi Baali-heremoni, okuhikira kimu hantaaho ya Hamasi.

⁴Abantu abo, bakaba bali b'okulenga Abaisirairi, nukwo kyetegerezebwe Abaisirairi obu baraaba nibahondera ebiragiro bya MUKAMA, ebiyaragiire baisenkurubo naatuma Musa.

⁵Aho, Abaisirairi baikara hagati omu Baakanaani, Abahiiti, Abamooli, Abaperezi, Abahiivi n'Abayebusi;

⁶baaswera bahara baabo, kandi na bahara baabo baabaha batabani b'abanyamahanga babaswere, baataho n'okuramya embandwa zaabo.

⁷Abaisirairi bakeebwa MUKAMA Ruhanga wabo; baakora ebirukumubiihiza kandi baaramya ebisisani bya Baali na Aseera.

⁸MUKAMA nukwo kubabiihirirwa muno, akabalekera omukama Kusani-Risasaimu abasingule. Bakamara emyaka munaana bali bantu be.

⁹Abaisirairi obubaateeriire MUKAMA omuranga, na uwe nukwo kutuma omuntu ayabaihire omu bwiru. Omuntu ogu, nuwe Osineeri mutabani wa Kenazi, muto wa Kalebbu.

¹⁰Mwoyo wa MUKAMA yamwijaho, yafooka mwebembezi wa Isirairi, yaramaga kurwana, MUKAMA yamusinguza omukama wa Mesopotamiya.

¹¹Ensi nukwo kugwagwana okumara emyaka amakumi ana, hanyuma yafa.

¹²Osineeri obu yamazire kufa, abantu ba Isirairi bakongera kukora ekibi omumaiso ga MUKAMA. Habweki yafoora omukama Egironi owa Mowabbu w'amaani kubakira.

¹³Egironi yayekoba n'Abamooni n'Abamaleki, baarwanisa Abaisirairi baabasingura, banyaga Yeriko orubuga orw'emiti y'emikindo.

¹⁴Abaisirairi baaba bantu ba Egironi, okumara emyaka ikumi na munaana.

¹⁵Abaisirairi obubaagarukire kuterra MUKAMA omuranga, na uwe nukwo kubatumira omuntu ow'okubaiha omu bwiru. Ogu nuwe Ehudi, mutabani wa Gera ow'oruganda rwa Benyamiini, omusaija ayakwataga emoso. Abantu ba Isirairi nuwe baatumire atwarre Egironi omukama wa Mowabbu ebisembo byabo.

¹⁶Ehudi, akeheeseza empirima ey'amoogi abiri, erukuhikya obura bwa sentimita ataano, yagijwarrana omungoye ze, ha rubaju rwe orw'obulyo.

¹⁷Akatwarra Egironi omusoro, Egironi akaba ali musaija anyesire muno.

¹⁸Ehudi obuyamazire kuhemba ebisembo, abasaija abaizire babyetwekere, yabaragira barugeho.

¹⁹Ehudi wenka yagarukira h'amabaale agabaizirwe aga Girigali, yagarukayo hali omukama Egironi yamugambira ati: “Agutamba, nyina ekigambo eky'ensita ekindukwenda kukubaliza.” Aho omukama yagambira abaheereza ati: “Mutuhigize!” Boona baagenda.

²⁰Omukama akaba aikaliire ali wenka, omukisiika ekya haiguru omu mabeho; Ehudi yamwirra haihi yamugambira ati: “MUKAMA akuntumireho nkugambire ekigambo.” Omukama yaimuka yayemerra.

²¹Ehudi n'omukono gwe ogw'emoso, yasomora empirima eyekaba eri harubaju rwe orw'obulyo yagicumisa omukama enda,

²²yoona n'ekiti kyayo byahweeramu, kandi yamirwa ebisajwa. Ehudi atagisomole omunda y'omukama, empirima yamuturuukanira enyuma.

²³Nubwo Ehudi yakinga enyigi, yaziboha yaturuka aheeru,

²⁴yagenda. Abaheereza baija baasanga enyigi iboherwe, baateekereza ngu omukama arumu kyonka agenzire kwekonyera.

²⁵Baalindirra okumara akasumi akabaateekeriize ngu nikamara, baitu omukama obuyalemere kukingura orwigi, baakwata ekisumuruzo baarukingura. Bakasanga omukama wabo agwire hansi afiire.

²⁶Obubakaba bakyalindiriire, Ehudi yacwa yayegendera, yaraba nambere hali amabaale agabaizire, yatoma ogwa Seyira.

²⁷Obu yahikire oku omunsi ey'ensozi eya Efuraimu, yateera engwara kweta Abaisirairi baramage; yabeebembera kusirimuka ensozi.

²⁸Yabagamba ati: “Mumpondere! Ruhanga abasingwize abanyanzigwa banyu Abamowabbu.” Habweki, baamuhondera, baanyaga ekiikaro Abamowabbu nambere basobora kwambukira ekyambu Yorudaani; bataikirize muntu noomu kwambuka.

²⁹Ha kiro eki, bakaita abaserikale Abamowabbu haihi omutwaro gumu; abarukukira oburungi omu kurwana. Busaho noomu ayacwire.

³⁰Ha kiro eki, Abaisirairi bakasingura Abamowabbu, ensi yaba n'obusinge okumara emyaka kinaana.

³¹Ayakurasire ogu, nuwe Samugara mutabani wa Anasi, ayaisire Abafirisiti rukaaga, yabaisa omuhunda kabinga nte; ogu na uwe akajuna Isirairi.