Read Runyoro - rutooro Bac 4 Bible Online

Bac 4 - Runyoro - rutooro bible

Bac 4

¹Ehudi obu yamazire kufa, Abaisirairi baayongera kukora ebirukubiihiza MUKAMA,

²na uwe nukwo kubalekera Yabini omukama wa Kanaani ayalemaga Hazora, abasingule. Sisera, ayaikaraga Harosesi ey'abamahanga akaba ali mukuru w'ihe rye.

³Nubwo Abaisirairi baataagiire MUKAMA abakoonyere, habwokuba Yabini akaba aina ebigaali eby'ebyoma rwenda, kandi akalema abantu ba Isirairi kubi muno okumara emyaka amakumi abiri.

⁴Omu kasumi ako, Debbora omurangikati mukazi wa Lapidosi, nuwe akaba naacwera Abaisirairi emisango.

⁵Yakiraga kwikarra hansi y'omuti omukindo ogwa Debbora ogukaba guli hagati y'ensi Rama na Beseri omunsi ey'ensozi eya Efuraimu. Oku nuho abantu ba Isirairi baagendaga abacwere emisango.

⁶Debbora kiro kimu akatuma beete Baraki mutabani wa Abinohamu owakaba ali Kedesi omunsi ya Nafutaali, yamugambira ati: “MUKAMA Ruhanga ow'Abaisirairi naakuragira ati: ‘Geenda osorooleze abasaija bawe ha rusozi Tabbora, omu ba Nafutali oihemu omutwaro gumu, n'omuba Zebbuluni oihemu omutwaro gumu.

⁷Ninyija kuleeta Sisera, engabwa y'ihe erya Yabini hamu n'ebigaali bye n'amahe ge, akusange ha kyambu Kisoni, kandi ndaamukuha omusingule.’ ”

⁸Baraki yamugarukamu ati: “Obworaikiriza kugenda na nyowe ndaagenda, baitu obwotaagende, na nyowe tingende.”

⁹Debbora yagamba ati: “Ego, ndaagenda na iwe, kimu kyonka, ekitiinisa ky'obusinguzi torukwija kukitunga, habwokuba, MUKAMA naija kwikiriza Sisera asingurwe omukazi.” Nubwo Debbora yaimukire yagenda na Baraki ha kyambu Kisoni.

¹⁰Baraki yayeta ab'oruganda rwa Zebbuluni n'orwa Nafutaali, baije ha kyambu Kisoni, abasaija omutwaro gumu baamuhondera, na Debbora yagenda na uwe.

¹¹Omu kasumi ako, Heberi omukeeni ayayahukaine n'Abakeeni, baijukuru ba Hobabu muramu wa Musa, akaba atiire eheema ye, agenzire kara kuhika ha muhomozi ogukaba guli Zaananimu enyakuli haihi na Kedesi.

¹²Sisera obuyamanyire Baraki mutabani wa Abinohamu nkooku atembere orusozi Tabbora,

¹³Yasorooza ebigaali bye rwenda yayeta abasaija be boona, baruge Harosesi ey'Abamahanga, bagende ha kyambu Kisoni.

¹⁴Debbora yagambira Baraki ati; “Imuka ogende habwokuba kiro kinu, MUKAMA akuhaire kusingura Sisera. MUKAMA tinuwe akwebembiire kuramaga?” Baraki yasirimuka orusozi Tabbora, abasaija omutwaro gumu bamuhondiire.

¹⁵MUKAMA yaburanganiza Sisera, n'ihe rye lyona, n'ebigaali byona, omumaiso ga Baraki, Sisera yasimburruka ekigaalikye yairuka.

¹⁶Baraki yahondera ebigaali niihe lya Sisera, okuhika Harosesi ey'Abamahanga, ihe ryona erya Sisera yalihwerekereza n'empirima, hatasigaleho muntu noomu.

¹⁷Baitu Sisera akairuka, yahika ha heema ya Yayeri muka Heberi Omukeeni, habwokuba Yabini omukama wa Hazora, akaba ali w'omuganjano neeka ya Heberi,

¹⁸Yayeri yaturuka kutangaana Sisera, yamugamba ati: “MUKAMA wange, kubuutuka owange, leka kutiina.” Aho Sisera yakubuutuka yataaha omu heema ya Yayeri, Yayeri yamuswekerra orugoye. Sisera yagambira

¹⁹Yayeri ati: “Nkwesengeriize, mpa otwiizi tuke tw'okunywa, habwokuba nyina iroho.” Nubwo, Yayeri yafundukura endyanga y'amata, yamuha ekyokunywa kandi yagaruka yamusweka.

²⁰Sisera yagambira Yayeri ati: “Oyemerre ha mulyango gw'eheema, kakuba haija omuntu akakukaguza ati: ‘Hanu haroho omuntu?’ Ogambe oti: ‘Nangwa.’ ”

²¹Baitu Yayeri muka Heberi yakwata enkondo y'eheema, kandi yakwata enyondo, yagenda naasooba nambere Sisera akaba ali, enkondo yagimuterra omuruhaga rw'omutwe, yataahira kimu omwitaka. Sisera akaba akyagwijagiire muno habw'obujwahi. Nubwo Sisera yafa.

²²Kandi Baraki obwakaba naahondera Sisera, Yayeri yaturuka kumwitirana, yamugambira ati: “Ija, nkwoleke omusaija ou orukuserra.” Baraki yataaha omu heema ya Yayeri, kwija kurora, akasanga Sisera afiire, enkondo y'eheema emuturukaine omutwe.

²³Ha kiro eki, Ruhanga nukwo yahoire ati Abaisirairi kusingura Yabini omukama wa Kanaani,

²⁴kandi baagenda nibamukehya amaani okuhikya obubamuhwerekereriize kimu.