Read Runyoro - rutooro Bac 5 Bible Online

Bac 5 - Runyoro - rutooro bible

Bac 5

¹Ha kiro eki, nubwo Debbora na Baraki mutabani wa Abinohamu baazinire ekizina kinu:

²Musiime MUKAMA! Abeebembezi bakaimuka kwebembera Isirairi, abantu baayehayo bonka habw'okwegondeza!

³Muhurre inywe abakama, mutege amatu inywe abalemi; Kanzine eby'okukugiza MUKAMA, Ruhanga ow'Abaisirairi.

⁴MUKAMA, obuwaimukize kuruga omunsi Seyiri, obuwarubasire kuruga omukicweka ky'ensi Edomu, ensi ekatengeeta, kandi iguru lyabundaara, ego ebicu bikanaga enjura.

⁵Ensozi ikatengeeta omumaiso ga MUKAMA, wa Sinai omumaiso ga MUKAMA Ruhanga wa Isirairi.

⁶Omu biro bya Samugara mutabani wa Anasi, n'omu biro bya Yayeri, abantu bakaba batakyagendera hamu, kandi abagenzi baarabaga emihanda eya ha rubaju.

⁷Abebembezi b'abantu bakaba bahoire omu Isirairi okuhikya iwe Debbora obuwaimukire, waimuka nk'omuzaire w'ihanga lya Isirairi.

⁸Abantu obubaayekomiire kuramya embandwa, obulemu tibwahwaga omumalembo gaabo. H'Abaisirairi emitwaro ena, haroho ayarozirwe aina icumu rundi engabu?

⁹Musiime MUKAMA, omutima gwange guli na inywe, abakuru b'amahe ga Isirairi abaayekomere inywenka omubantu habw'okwegondeza. Mukugize MUKAMA.

¹⁰Mukirangirre inywe abanyakutemba endogoyi ezirukwera, inywe abanyakwikarra ha birago ebirungi na inywe ab'arukurubata hoona ha mukagenda.

¹¹Muhurre amaraka g'abazini abanyakuli ha maziba, oku nuho baikara, nibamanyisa abantu obusinguzi bwa MUKAMA, obusinguzi bw'abantu be abakuru omu Isirairi. Nubwo abantu ba MUKAMA baarubata baagenda ha irembo.

¹²Sisiimuka, sisiimuka iwe Debbora! Sisiimuka, sisiimuka, ozine ekizina! Baraki imuka oyebembere abanyagwa bawe, iwe mutabani wa Abinohamu.

¹³Nubwo abantu abarangwa ibara abaasigaireho baarubasire; abantu ba MUKAMA nubwo baarubasire baagenda nambere arukurwanisiza ab'amaani.

¹⁴Abasaija abaarugire omuruganda rwa Efuraimu baarugayo baayemerra omukihanga, baahondera iwe Benyamini n'abantu ab'oruganda rwawe, abakuru b'amahe baaruga omuruganda rwa Makiri kandi abakwasi b'omwigo ogw'omukuru wiihe lyona baaruga omu ruganda rwa Zebbuluni.

¹⁵Abalemi ab'oruganda rwa Isakara bakaija na Debbora na Isakara omwesigwa hali Baraki baamuhondera bwango baagenda omukihanga. Baitu abantu ab'oruganda rwa Rubbeni bakaikara nibagurukagurukya tibaacwamu kwija.

¹⁶Kiki ekyakwikaize omumaliisizo g'entaama, kuhuliriza emizira ey'abarukweta entaama? Omubantu ab'oruganda rwa Rubbeni, hakaba harumu abantu abarukugurukagurukya muno.

¹⁷Abantu aba Giryadi bakaikara obuseeri bw'ekyambu Yorudaani; kandi abantu ba Daani kiki ekyabaikaize omu meeri? Abantu ab'Aseeri bakaikara ha musa gw'enyanja baikara n'obusinge haihi n'emyogo.

¹⁸Abantu ba Zebbuluni bakeeheerayo kimu; naaba Nafutaali baagendera kimu omumaiso g'irwaniro.

¹⁹Abakama baija baarwana; abakama aba Kanaani nabo nubwo barwaine, barwanira Taanaki, haihi n'amaizi ga Megido; kyonka tibaine feeza baanyagire.

²⁰Enyunyuuzi zikaruga haiguru zaarwana, obuzikaba niziruga omu biikaro byazo, zaarwanisa Sisera.

²¹Empaya ey'ekyambu Kisoni yabakukumba, ebigonzi eby'amaani eby'ekyambu Kisoni. Jwambura, iwe bwomeezi bwange.

²²Nubwo haizire embaraasi niisiriba, niiteera emirindi.

²³Malaika wa MUKAMA yagamba ati: Mukyene orubuga Merozi, mukyene muno abantu abanyakurwikaramu, habwokuba bataije kukonyera MUKAMA, kumukonyera obuyarwanisaaga ab'amaani.

²⁴Omu bakazi boona, Yayeri muka Heberi Omukeeni, ahaisanizibwe, omu bakazi boona abanyakuraara omu heema, anyumizibwe.

²⁵Sisera akasaba amaizi, uwe yamuhamu amata; yamuleetera omwisi omu bbakuli ey'ekitiinisa.

²⁶Yayeri yakwata enkondo ey'eheema, omu mukono gwe ogw'obulyo yakwata enyondo; yateerra enkondo omukanenero ka Sisera, yakabaganiza, enkondo yakaturuukana, yamusasangura omutwe.

²⁷Amaani gaamuhwa yagwa, yamukabira ha bigere, amaani gamuhwa yamukabira ha bigere, nambere yagwire nuho yaferiire.

²⁸“Nyina Sisera yarorra omu idirisa yalinguliriza omu kahengeezi, yakaguza ati: ‘ekigaali kye kibaire ki kukeerererwa kiti? Kiki ekitangire embaraasi ze kugaruka?’

²⁹Abakazi abarukukirra kimu amagezi baagarukamu eki akaba ayegarukiremu wenka emirundi nyingi, nibagamba bati:

³⁰‘Nibaseerra kandi nibabagana eminyago. Omusaija omu nagamba ngu: Nyowe nintwara omuzaana omu rundi babiri. Kandi nibagamba ngu omunyago ogw'ebintu ebihindwirwe n'erangi gwa Sisera, omunyago ogw'ebintu ebihindwirwe n'erangi byatebwamu amanyumizo, n'ebintu bibiri ebihindwirwe n'erangi byatebwamu amanyumizo, munyago gw'okujwara omubikya byange!’”

³¹“Abanyanzigwa baawe nukwo bahwerekerre bati, Ai MUKAMA! Baitu abanyakukugonza, basisane nk'izooba, obuliba nirituruka n'amaani gaalyo.” Ensi ekatunga obusinge kumara emyaka amakumi ana.