Read Runyoro - rutooro Bac 6 Bible Online

Bac 6 - Runyoro - rutooro bible

Bac 6

¹Abaana ba Isirairi bakakora ekibi, baasisira MUKAMA, na uwe nukwo kubaleka balemwe Abanyamidyani okumara emyaka musanju.

²Abanyamidyani bakaba bali b'amaani okukira Abaisirairi, habweki Abaisirairi nukwo kwesereka omumaingira noomu biikaro ebindi ebikaba biri omu nsozi.

³Habwokuba buli kasumi Abaisirairi obubaasigaga embibo, Abanyamidyani n'Abamaleki n'abantu aba Burugaizooba baijaga babaseesira;

⁴baateeraga enkande, bahwerekereza ebibyarwa by'ensi okuhikira kimu Gaaza, ensi erukukira kubaheererra; batwara entaama zoona, ente, n'endogoyi, tibaagiraga kantu na kamu akabaalekeraga Abaisirairi.

⁵Habwokuba baijaga n'ente zaabo, n'eheema zaabo, baija bali baingi nk'enzige; bbo n'engamiya zaabo, tibaasoboraga kubarwa; habweki, obu baabaga nibaija nikyo baasiisiraga ensi.

⁶Abaisirairi bakajonjozibwa muno Abanyamidyani nukwo kuteerra MUKAMA omuranga abakoonyere.

⁷Abaana ba Isirairi obubaataagiire MUKAMA habw'okukorwa kubi Abanyamidyani,

⁸MUKAMA yabatumira omurangi. Ogu yabagambira ati: “MUKAMA Ruhanga ow'Abaisirairi naagamba ati: ‘Nkabeebembera nabaiha omunsi Misiri, nabaiha omubwiru,

⁹nabajuna Abanyamisiri, na abo boona abaabajonjozaaga nababinga, inywe mutakabahikire, naabaha ensi yaabo;

¹⁰kandi nkabagambira nyowe nkooku ndi MUKAMA Ruhanga wanyu, mutaliha ekitiinisa baaruhanga ab'Abamooli, bakama b'ensi ei murukwikaramu. Baitu ebigambo byange mutabiteho mutima.’ ”

¹¹Nubwo malaika wa MUKAMA yaizire yaikarra hansi y'omuti omuhomozi ogukaba guli omukyaro Ofura, omuti ogu gukaba guli gwa Yowaasi, ow'oruganda rwa Abyezeeri. Gidyoni omutabani wa Yowaasi akaba naahuura engano omundeeba, nukwo agisereke Abanyamidyani.

¹²Malaika wa MUKAMA yamubonekera, ati: “MUKAMA ali hamu naiwe, iwe omusaija ow'amaani kandi emanzi.”

¹³Gidyoni na uwe yamukaguza ati: “Waitu ompulirize, MUKAMA obwali na itwe, habwaki tugwerwa binu byona? Ebyamahano ebingi MUKAMA ebiyakorraga, baisenkuruitwe ebibaatugambiire nkooku yabaihire Misiri, biraha? Baitu hati, MUKAMA atunagire hara, yatulekera Abanyamidyani.”

¹⁴MUKAMA yamuhindukira yagamba ati: “Genda n'amaani gawe agoinago, ojune Abaisirairi obaiheho Abanyamidyani nyowe nyenka ninyowe nakutuma.”

¹⁵Gidyoni yakaguza MUKAMA ati: “MUKAMA, nsobora nta kujuna Isirairi? Omu bantu ba Manaase oruganda rwange nurwo rurukukirra kimu obuke; kandi omu kika kyaitu, ninyowe mmalirrayo.”

¹⁶MUKAMA yamugambira ati: “Nyowe ninyija kuba naiwe. Abanyamidyani oraabahwerekereza nk'arukuhwerekereza omuntu omu.”

¹⁷Gidyoni yagambira MUKAMA ati: “Hati obworaaba nongonza, nyoleka akarorwaho mmanye nti niiwe orukubaza na nyowe.

¹⁸Nkwesengeeriize, otaruga hanu okuhikya obundakakuhikaho nkakuleetera ekisembo kyange nkakikwoleka.” MUKAMA yagamba ati: “Ndaalindirra okuhikya obworagaruka.”

¹⁹Nubwo Gidyoni yagenda omunju ye, yacumba enyama ey'embuzi ento, n'obukeeki obutatumbisiibwe obuyaihire omunsaano erukuhikya kiloguraamu ikumi; enyama yagita omukiibo, kandi omucwe yaguta omukibindi, yabiretera malaika wa MUKAMA hansi y'omuti omuhomozi, yabimusembereza.

²⁰Malaika wa MUKAMA yamugambira ati: “Twara enyama n'obukeeki obutatumbisiibwe obite hamwandara ogu, obiseeseerre omucwe.” Na uwe nukwo yakora.

²¹Nubwo malaika wa MUKAMA yagoroire omukono yata entuli y'omwigo ogu akaba akwasire, ha nyama na ha bukeeki obutatumbisibwe, omurro gwamatuka omumwandara, gwasiiriiza enyama n'obukeeki. Malaika wa MUKAMA yamuburaho.

²²Aho Gidyoni nubwo yamanyire omuntu owaboine nkooku abaire malaika wa MUKAMA, yagamba ati: “Eee! MUKAMA Ruhanga wange! Nkoku hati, ndozire malaika wa MUKAMA amaiso na amaiso.”

²³Baitu MUKAMA yamugambira ati: “Huumura, leka kutiina, torukwija kufa.”

²⁴Nubwo Gidyoni yayombekiire MUKAMA itambiro omukiikaro eki, yaliruka ibara “MUKAMA nuwe Businge.” Na hati hoona likyali omukiikaro Ofura eky'ab'Abyezeeri.

²⁵Ha kiro eki omu bwire bw'ekiro, MUKAMA yagambira Gidyoni ati: “Kwata enimi ya sso n'eya kabiri ha ngundu, enyakuhikize emyaka musanju, oseese itambiro sso eri yayombekiire Baali, otemateme ekisisani ky'embandwa enkazi Asera enyakuliri haihi,

²⁶aho nuho oyombekere MUKAMA Ruhanga wawe itambiro haruguru y'ekisiika egumire, amabaale gaalyo ogainganainganize kurungi; hanyuma okwate enimi eya kabiri ogihonge ebe kihongwa eky'okwokya, okyokiise enku ez'ekisisani ekya Asera ekyosesire.”

²⁷Gidyoni, omu baheereza be aba akaba ainabo, nukwo kwihamu abasaija ikumi yakora nkooku MUKAMA yamuragiire. Habw'okutiina muno abeeka ye n'ab'orubuga kumurora naalyombeka nyamusana, nukwo kulyombeka omu bwire bw'ekiro.

²⁸Nyenkya kara abantu ab'omurubuga obubaimukire, bakasanga itambiro lya Baali liseesirwe, ekisisani kya Asera ekikaba kiriri haihi kitematemerwe, enimi eya kabiri ehongiirwe ha itambiro Gidyoni eri yayombekere.

²⁹Abantu bayekaguza ngu nooha akozire eki? Hanyuma okukaguliiriza baagumiza kimu bati: “Gidyoni mutabani wa Yowaasi nuwe akozire ekintu kinu.”

³⁰Nubwo abasaija ab'omurubuga baagambiire Yowaasi bati: “Turukya mutabani wawe afe, habwokuba aseesire itambiro lya Baali, yatematema ekisisani kya Asera ekibaire kiriheeriire.”

³¹Baitu Yowaasi yagambira boona abaamwesoroliizeeho ati: “Nimurwanirra Baali? Nimusagika ebigambo bye? Omuntu weena arukumurwanira, w'okwitwa kiro kya nyenkya. Baali obwaraaba ali ruhanga, mumuleke ayerwanirre wenka, habwokuba itambiro lye liseesirwe.”

³²Okuruga ha kiro eki, Gidyoni nukwo kurukwa ibara Yerubaali, nukwo kugamba “Leka Baali amurwanise, habwokuba akaseesa itambiro lye.”

³³Abanyamidyani boona, Abamaleki n'abantu aba Burugaizooba nubwo baayesoroize hamu, baayambuka ekyambu Yorudaani, baateera orukande omukyeya Yezereeri.

³⁴Mwoyo wa Ruhanga yatemba Gidyoni, Gidyoni nukwo kuteera engwara, yayeta ab'Abyezeeri bamuhondere.

³⁵Yatuma abakwenda barabe omu bantu boona ab'oruganda rwa Manaase, nabo baayetwa kumuhondera. Kandi yatuma abakwenda hali ab'oruganda rwa Aseri; ab'oruganda rwa Zebbuluni n'ab'oruganda rwa Nafutaali, na bo baagenda kumwitirana.

³⁶Nubwo Gidyoni yagambiire Ruhanga ati: “Obworankozesa kujuna Isirairi nkooku ogambire,

³⁷ninta ebyoya by'entaama ha rubuga orunyakuhuulirwaho, nyenkya obundaasanga ebyoya byonka nibyo bijubire, itaka lyona lyomere, obu nubwo ndaamanya nti orankozesa kujuna Isirairi nkooku ogambire.”

³⁸Nukwo kyabaire. Ekiro ekyakurasireho, obu yaimukire kara, yamiga ebyoya by'entaama, yakamuuramu orume orurukwijuza ebbakuli.

³⁹Gidyoni nubwo yagambiire Ruhanga ati: “Leka kumbihirirwa, ka mbaze omurundi gumu, omurundi gumu gwonka, nkwesengeriize. Hati, leka ebyoya biikale byomere, itaka niryo lijube.”

⁴⁰Ekiro eki, eki nakyo MUKAMA yakikora, ebyoya byonka nibyo byali byomere, baitu ha itaka lyona hagwireho orume.